Póst Germania Budyšin –

Sokoł Ralbicy/Hórki 2:0 (2:0)

Zestawa hosći: Chr. Gloxyn – Matka, Rachela (58. Korjeńk), Schultz, A. Wałda, T. Wałda , D. Gloxyn, Nuk, D. Šołta, Domaška, Šewc

Po dypku přećiwo druhemu tabulki z Kulowa čakaše z třećim tabulki znowa ćežki nadawk na chowancow trenarja Tomaša Henčela. Přećiwnik je za swoju robustnu a konsekwentnu kopańcu znaty.

Hra započinaše so wurunana a wobě mustwje so raz na přećiwniske wrota zwažištej. Hosćićel běše z wětřikom w chribjeće wosebje přez standardy strašny. Tajki wunjese tež nawjedowanje. Po róžku suny so Aleksandrej Wałdźe bul přez hłowu a Karl-Eric Bernhardt steješe prawje a bul spody łaty do wrotow zhłójčkowa. Nětko běchu Sokoljo prašani. Nazhonity Pětr Domaška přesadźi so w šěsnatce a bu potorhnjeny. Hewak wěsty třělc Denny Gloxyn pak zwrěšći z pokutnym kopom na sylnje dźeržacym wrotarju (33.). Hdyž njejstej dwaj daraj dosć, Sokoljo domjacym tež hišće třeći darichu. Po zamjeće njezamóchu bul w šěsnatce wujasnić a kulowaty nastroj dósta so k Felixej Stöltznerej, kotryž njeměješe ćeže, bul do wrotow sunyć (42.).

Awtor dźensa

André Strelow

Carlo Ancelotti, Niko Kovac, Hansi Flick a nětko Julian Nagelsmann. Lisćina trenarjow pola FC Bayern Mnichow, kotřiž njeběchu ani dwě lěće w zastojnstwje, je so wo jedne mjeno po­dlěšiła. Ze sumu 25 milionow eurow, telko płaćachu Bayerojo do Lipska na RB za Nagelsmanna, bě jeho FCB jako dotal najdróšeho trenarja kupił. Jenož 21 měsacow pozdźišo wón swój job hižo zaso wotby.

Kickerowy turněr we Wotrowje

Wotrowska młodźina přewjedźe jutře we Wotrowje w starej šuli zaso kickerowy turněr, na kotrymž smě so 64 dwójkow wobdźělić. Wot 13 hodź. smědźa so mustwa zahrać, nastup je 14 hodź. planowany a hrać budu wot 14.30 hodź. Z mytowanjom dobyćerjow liča organizatorojo wokoło 22.30 hodź. Startowy pjenjez wučinja 10 eurow na hrajerja.

Tójšto hrow kónc tydźenja

Koparsku rezerwu SJ Chrósćicy wočakuje njedźelu ćežka hra w Pančicach-Kukowje na twjerdym hrajnišću. Prěnje koparske mustwo SJ Chrósćicy hraje w nimale samsnym času w Ramnowje.

25.03.  13:00  HZ Wulka Dubrawa II/    Radwor II –

  Ralbicy II/Njebjelčicy II

25.03.  15:00  Rakečanske ST –

  Radebergerske ST

25.03.  15:00  Biskopičanske KT II –

  ST Radwor

25.03.  15:00  Póst Germ. Budyšin –

  Sokoł Ralbicy/Hórki

25.03.  15:00  Módro-běli Kulow –

  SG Großnaundorf

26.03.  12:30  ST Němske Pazlicy II –

  SJ Njebjelčicy

26.03.  14:00  ST Marijina hwězda –

  SJ Chrósćicy II

26.03.  15:00  Drohotka Ramnow –

  SJ Chrósćicy

Funinio festiwal

To w stawiznach Viktorije Worklecy hišće było njeje, njeporažene w aktualnej sezonje a to bjez wotedaća sadźby.

Worklečanki nastupichu minjenu sobotu swój posledni, a zdobom tež domjacy, hrajny dźeń. Jako hosća mějachu módro-běłych z Wojerec a hrajerki z Rózborka. Prěnja hra dnja startowaše přećiwo Wojerow­čankam. Přez zmužite nadaća a stajne zmylki hosća móžachu sej domjacy jasny předskok nadźěłać, kiž so tež hač do kónca njezměni (25:9).

W druhej sadźbje hosćo kusk lěpje do hry přińdźechu, a tak smešowachu tón abo tamny bul do pola Worklečankow. Tute pak so zamylić njedachu a wuhrachu sej ze stabilnymi přiwzaćemi a dobrymi přihrawkami přez srjedźny nadběh jasne sadźbowe dobyće 25:8.

W třećej a poslednjej sadźbje hry móžachu přihladowarjo rjane změny bula sćěhować. Tola holcy z Worklec njedachu ničo zapalić. Přichodne wulke 3 dypki pućowachu na hižo derje pjelnjene dypkowe konto.