Venedig (dpa/SN). Syn ameriskeho prezidenta Donald Trump jr. ma mjerzanje hońtwjerskeho wulěta njedaloko Venediga dla. 47lětny je na swojim wopyće w sewjernej italskej kónčinje kónc minjeneho lěta ilegalnje na škitane dźiwje ptački ­třělał. Škitarjo přirody žadaja sej nětko wot prawicarskeje ministerskeje prezidentki Georgije Meloni, Američana na­jebać toho mócneho nana pochłostać.

We wideju je widźeć, kak syn prezi­denta we wojerskej drasće wosrjedź třělenych ptačkow hordźe wo hońtwje rozprawja. Na zemi leža mortwje ptački kaž dźiwje husy, kački a pocpule jako hońtwjerske trofeje. Mjez morjenymi zwěrjatami je přewšo rědka oranžojta husyca. Lěwicarska opozicija chce Trumpa jr. nětko wobskoržić. Měšćanski radźićel Zelenych Andrea Zanoni rjekny hladajo na wopyt z USA: „Woni njemóža so tu kaž wulcy knjezojo wupěrać.“ Scena je w kónčinje Valle Pirimpie nastała, kotraž ma wosebity škitny status EU. Wukrajnikam je hońtwa w tutej kónčinje zakazana. Opozicija žada sej w tym zwisku tež stejišćo italskeho ministra za wobswět, kiž bě hońtwje w tutej kónčinje přizwolił.

Hač do grjekskeje stolicy Athena su wuskutki zemjerženja we wokolinje grjekskeje dowoloweje kupy Santorini pytnyć. Wobydlerjo wčera popołdnju wo střa­senjach rozprawjachu, kotrež mějachu swoje wuchadźišćo w 230 kilometrow zdalenej mórskej kónčinje. Najmócniše rženje ze sylnosću „5“ slědźerjow w jich wěsćenju posylnja, zo připowědźa so wulke zemjerženje.

Nimale 20 000 wohroženych zwěrjatow wuchowali su policisća we wjacore tydźenje trajacej akciji přećiwo pašowarjam dźiwich zwěrjatow. Při tym su we 138 krajach a regionach 365 podhladnych zajeli. Zwěrjata dowjezechu do škitnych centrumow, doniž někotre ­zaso do jich domizny njedowjezu. Po informacijach Interpol su wjace hač 12 000 ptačkow, 5 000 nopawow a 18 wulkich dźiwich kóčkow wuswobodźili.

Brüssel (dpa/SN). Zwjazkowy kancler Olaf Scholz (SPD) je na zetkanju wodźacych ­zastupnikow EU w Brüsselu potwjerdźił, zo zhromadne europske zadołženje na dobro inwesticijow do brónjenja wot­pokazuje. Tajka perspektiwa njeje předstajomna, rjekny Scholz po wuradźowanjach. Wón poćahowaše so na rozmyslowanja, hornje mjezy zadołženja statow zběhnyć, zo móhli so kraje lěpje na wohroženja ze stron Ruskeje přihotować.

Demonstracije dale traja

Berlin (dpa/SN). Organizatorojo demonstracijow přećiwo prawicarskemu ekstremizmej chcedźa po masowych protestach minjenych dnjow dale ćišć na politiku wukonjeć. „Protestna žołma hač k wólbam zwjazkoweho sejma dale traje“, rjekny Christoph Bautz wot akciskeho zwjazka Campact nowinarjam. „Nadźijamy so, zo ludźo hišće raz to tym rozmysluja, hač chcedźa woprawdźe AfD wolić“, tak Bautz. Unija bě z wobzamknjenjom wo migraciji protesty zbudźiła.

Gauland z hotela wupokazany