SJ Chrósćicy –

Drohotka Ramnow 3:3 (0:2)

Zestawa SJ Chrósćicy: Škoda – Rätze (84. Wencel), F. Cyž (54. Mark), Zynda, B. Cyž, L. Zahrodnik (65. Bogusz), Handrik (54. Młynk), Hawš, G. Zahrodnik, Graf (65. Matik), M. Zahrodnik

Kermušnu njedźelu witachu Chróšćenjo koparjow z Ramnowa do swójskeho stadiona. Chróšćenjo chcychu na domjacym trawniku seriju dale wutwarić, wšako su tam hišće bjez poražki.

Domjacy spytachu partiju wot spočatka sem dominować. Přez kontrolowany natwar chcychu sej šansy wuhrać. Tak so tež husto hač k šěsnatce předrěchu. Kaž hižo w zašłych tydźenjach pak bě tam zwjetša kónc. Tohodla sej domjacy cyłk jenož někotre šansy wuhra. Hosćo so poněčim tež w hrě přizjewichu. Tež tu njedyrbješe wrotar přehusto zapřimnyć. Tola po nimale poł hodźinje ležeše bul we wrotach. Zmylk w natwarje wuži hóstny nadběhowar Stiev Kricke a docpě 0:1 (27.). SJC pak njeda so wot zastatka wottrašić. Krótko do połčasa wužichu Ramnowscy­ koparjo dalši zmylk a Paul Groba třěli bul wyše wrotarja do saka. Tak pochłostachu hosćo zmylkaj Chróšćanow a dźěchu z předskokom 0:2 do přestawki.