Palestinska organizacija Hamas je dźensa znowa israelskich ...
Trump chce lěhwo migrantow
Stabilny eksport do Jendźelskeje
Zražka lětadła nad Washingtonom
Washington (dpa/SN). Njedaloko lětanišća stolicy USA Washingtona stej pasažěrske lětadło z 64 pasažěrami a helikopter wójska w powětře do so zrazyłoj. Regionalne lětadło předewzaća American Airlines je na to do rěki Potomac padnyło. Po informacijach medijow su pomocnicy wjacore ćěła z rěki wućahnyli. Mjeztym su wulku pytansku akciju zahajili. We Washingtonje je tuchwilu jara zyma. Rěka, při kotrejž stolica leži, je zdźěla zamjerznjena. Zwjazkowa policija FBI njetuka na teroristiski nadpad. Za to njepředleža žane dopokazy. Lětanišćo Ronald Reagan Washington National Airport su po njezbožu zawrěli. Wšitke wotlěty a přizemjenja na lětanišću su přetorhnyli. Hłowna hala wostanje pak dale přistupna. W běhu dnja informuja zamołwići zjawnosć wo nadrobnosćach.
Na internetnych platformach namakaš widejo, na kotrymž widźiš nócnu zražku w powětře z wulkim wohenjom. Hač so woprawdźe wo potrjechene lětadło jedna, njeje jasne. Wotkal je helikopter přišoł, tohorunja njewědźa.
Scholz: Zasada ranjena
Wothłosowanje zwjazkoweho sejma wo migraciji zbudźa diskusiju
Berlin (dpa/SN). Zwjazkowy kancler Olaf Scholz (SPD) je wot CDU/CSU, AfD a FDP zhromadnje wobzamknjeny naćisk za přiwótřenje migraciskeje politiki jako „złamanje tabuwa“ wopisował. 29. januar je „najskerje jara wuznamny dźeń w stawiznach zwjazkoweje republiki Němskeje“ był, rjekny Scholz wčera wječor w sćelaku ARD. Unija je po słowach Scholza zasadu raniła, kotraž je mjez demokratami w Němskej knježiła. „Mjenujcy konsens, zo njeje žanoho zhromadneho dźěła demokratiskich stron z ekstremnymi prawicarjemi. Dźensa pak je so tole stało“, wón zwurazni.
Zwjazkowy sejm bě do toho z wjetšinu hłosow naćiskej přihłosował, kotryž zmóžnja wotpokazanje za azylom pytacych při mjezach Němskeje. Naćiskej CDU/CSU je tež frakcija AfD přihłosowała. Zeleni, BSW a Lěwica jón wotpokazachu. Naćisk njeje zawjazowacy.
Dobre wuhlady?
Łobjo zaso wužiwajomne
Drježdźany (dpa/SN). Łódźe smědźa Łobjo w Sakskej wot přichodneje póndźele zaso bjez zadźěwkow wužiwać. Jězbna čara, kotruž su zawrěli, po tym zo je so před štyrjomi měsacami Carolinowy most sypnył, je zaso swobodna. „Hač do 17. februara pak dyrbja so łódźe za to přizjewić“, rjekny Karsten Wild Drježdźanskeho zarjada za wodowe dróhi a łódźnistwo. Po tym njeje přizjewjenje wjace trěbne. Łódźe smědźa pak kaž při ampli stajnje jenož do jedneho směra jězdźić.
Parniki Běłeje floty maja wuwzaćne rjadowanje. Předwčerawšim, štwórtk, je wulětniska łódź August sylny jako prěnja swojeho razu pod mostom jěła. Jej sćěhowachu štyri historiske parniki bjez pasažěrow. Wšitke łódźe běchu po puću do łódźnicy, zo bychu je tam na nowu sezonu přihotowali.
Zapadny dźěl Carolinoweho mosta bě so w nocy na 11. september 2024 njewočakowano na něhdźe sto metrow zwjezł a do Łobja padnył. Wot toho časa je tež zbywacy dźěl mosta zawrjeny a wobchad łódźow bě přetorhnjeny. To bě za susodnu Čěsku wulki problem, dokelž je Łobjo jenički zwisk po wodźe do Hamburga.
Tramwajce na pruwowanskej jězbje
To a tamne (30.01.25)
Runje sydom mjeńšin je trało – potom běchu tysacy zastupnych lisćikow za Eurovision Song Contest w meji w Baselu wupředate. Nawal zajimcow bě hoberski, jako předpředań wčera dopołdnja w 10 hodź. zahajichu. To zdźěli šwicarski rozhłós SRF jako zarjadowar wubědźowanja. Cyłkownje su 42 000 kartkow předali. Přistup mějachu jenož ći, kotřiž běchu so do toho registrowali.
Wurosćeny kenguru je muža w Awstralskej ćežko zranił. Zwěrjo nadběhowaše 50lětneho, jako so tón z domskeho k swojemu awtu poda. Kenguru do muža z pjasćemi biješe, kopaše a kusaše. Muž poćerpje chutne zranjenja na hrudźi a hłuboke rany kusnjenja dla na rukomaj, policija zdźěla. Kenguru bě dwaj metraj wulki. Nadpady tutych zwěrjatow w Awstralskej su jara rědke. Muske zwěrjata chileja druhdy k agresiwnosći.
Na surowe podawki njezabyć
Berlin (dpa/SN). Zwjazkowy sejm je dźensa swjatočnje na wopory nacionalsocializma wopominał. Přičina bě 80. róčnica wuswobodźenja koncentraciskeho lěhwa Auschwitz. Prezidentka zwjazkoweho sejma Bärbel Bas w swojej narěči napominaše, na surowe podawki tehdyšeho časa njezabyć a to přichodnym generacijam dale posrědkować. Podobnje zwuraznichu to zwjazkowy prezident Frank-Walter Steinmeier a Roman Schwarzman, přežiwjenc holocausta.
Němskich zastojnikow pósłać
Berlin (dpa/SN). Zwjazkowe knježerstwo hotuje so na zasadźenje němskich fachowcow za škit mjezow na pomjeznym přechodźe Rafah mjez Gazaskim pasmom a Egyptowskej. Kaž powěsćernja dpa z kruhow knježerstwa zhoni, chcedźa wobzamknjenje knježerstwa lěta 2005 tak změnić, zo je tež zasadźenje wobrónjenych policistow móžne. Po wobzamknjenju z lěta 2005 móžachu jenož njewobrónjenych zastojnikow pósłać. Tole je jim mjeztym přestrašne.
Kongo žada sej pomoc UNO
