Budyšin (SN/MkWj). Skupina senatorow z Čěskeje republiki je minjeny pjatk Łužicu wopytała. Hłowny zaměr jězby politikarjow bě so bliže z kónčinu zeznajomić, kotraž je mnohim z nich jenož „marginalnje“ znata, kaž ze zdźělenki Budyskeho krajnoradneho zarjada wuchadźa. Tón bě wopyt čěskich hosći přihotował, po tym zo bě senator Jiří Vosecký w februaru pola krajneho rady Michaela Hariga (CDU) pobył. Senatorojo přisłušeja dźěłowej skupinje, zaběracej so wosebje z regionalnym wuwićom a z móžnosćemi spěchowanja, kotrež so w pomjeznej kónčinje z pomocu wotpowědnych programow Europskeje unije skića. Z wulkim zajimom sćěhowachu čěscy hosćo tuž přednošk 1. přirjadnika krajneho rady, něhdyšeho Łazowskeho wjesnjanosty Uda Wićaza, wo Budyskim wokrjesu.

Dospołnje nimokulił je so dobry skutk 69lětneho w badensko-württembergskim Dettingenje: Muž chcyše wčera z pomocu płunoweho palaka njerodź wotpalić, kotraž na boku susoda při płoće rosćeše. Při tym pak so dwaj metraj wysoki a 24 metrow dołhi žiwy płót susoda zapali. Płomjenja so nimo toho hišće na parkowace awto rozpřestrěchu, načinjejo ně­hdźe 10 000 eurow škody. 17 wobornikow dyrbješe woheń hašeć.

Špatne kmanosće kucharjenja su 27lětneho Braniborčana bjezmała do jastwa přinjesli. Muž bě sobotu rano rybu w pónoji pražił, před telewizorom pak na nju zabył. Susod, kur wuhladawši, zawoła policiju a wohnjowu woboru. Při přepruwowanju personalijow zastojnicy zwěsćichu, zo předleži wukaz zajeća, dokelž njebě wón chłostanku zapłaćił. Muž pokutu nablaku zapłaći a so tak zajeću wuwiny.