Nowa „Miss Germany“ je policajska zastojnica Nadine Berneis ze Stuttgarta. 28lětna móžeše so při wólbach w nocy na njedźelu w Europskim parku Rust pola­ Freiburga přećiwo 15 dalšim wob­dźělnicam přesadźić a je sej tak sama són spjelniła, kaž wona rjekny. Berneis bě najstarša wobdźělnica, najmłódša bě 19 lět. Třeće městno wobsadźi 22lětna studentka Anastasia Aksak z Lipska.

Wopita šoferka je ze swojim awtom w sewjerorynsko-westfalskim Sundernje do wabjenskeje tafle za jězdźenje bjez alko­hola zrazyła. Awto wosta mjez murju a taflu tčacy, tak zo dyrbješe žona do­moj nóžkować. Tam wona policistam wobkrući, zo bě njezbožo zawinowała. Na plakaće wabjenskeje kampanje wob­chadneje straže wabještej bleša wody a klučik awta z hesłom „Přećeljo za žiwjenje“ za strózbe jězdźenje. Policija wuka­za pře­pytowanje kreje 21lětneje a sćaza jeje jězbnu dowolnosć.

Paducha we łožu wobchoda spicy našła je policija zawčerawšim w Bielefeldźe. 29lětny bě so přez wokno do wobchoda zadobył. Po wšěm zdaću pak bě tak mučny, zo so do jednoho z łožow lehny a sej wusny. Kedźbliwa swědka jemu nóclěh skazy a zawoła policiju. Jako zastojnicy młodeho muža wubudźichu, bě wón wězo chětro hněwny a so z rukomaj a nohomaj wobaraše. Wuspać smědźeše so na to w celi policajskeho rewěra.

Kumštny dinosawrier w kružnym wobchadźe w bayerskim Abensbergu skićeše šoferam spodźiwny wobraz. Žona bě ně­hdźe dwuapołmetersku dźiwnu kreaturu wuhladała a to policiji přizjewiła. Kaž so wukopa, jednaše so wo dinosawriera, zhubjeneho z něhdźe 40 kilometrow zdaleneho Altmühltalskeho muzeja. Postawa, kotraž napodobnja družinu sawrierow Coelophysisa, bě wobškodźena a njeměješe žane panochty a žanu wopuš. Štó je jenož dwaceći kilogramow ćežki eksemplar z platy na hórce wonkowneho areala muzeja wutorhnył a do kružneho wobchada stajił, njeje jasne.

Kedźbu, hdyž sej knihu kupiće! Žona bě sej w interneće roman wo rjekach kupiła, zo móhła ju w dowolu woměrje čitać. Na lětanišću pak bu njejapcy zadźeržana. Roentgenowa připrawa pokaza, zo bě w knize pistola schowana. Wustróžana 59lětna powědaše, zo ničo wo „strašnym wobsahu“ njewě. Na zbožo jej to policija wěrješe, a tak móžeše swój zasłuženy dowol nastupić, wězo bjez pistole.

Wjetši kašć za tołše ćěło woznamjenja wjace pjenjez za pohrjeb. Tak mjenowany wosebity popłatk za wjetše kašće chcedźa w nowoseelandskim Hastingsu přesadźić. Normalnje pali so kašć z ćěłom dwě a poł hodźinje, ekstra wulki porno tomu hač do pjeć a poł hodźiny. Za nje dyrbja tuž 121 eurow připłaćić.

Nimo je zhromadne hońtwjerske wjeselo. Dokelž je pos z třělbu na hajnika třělił, ma to nětko sćěhi za 74lětneho. Wón dyrbi swoje hońtwjerske wopismo wotedać, dokelž njeje třělbu zawěsćenu měł. Jako so z wuchodźowarku rozmołwješe, je so jeho pos w awće z hońtwjerskej třělbu hrajkał, na hajnika třělił a jeho tak na ruce zranił.

Po turbulentnej jězbje z pokradnjenym awtom sam telefonisce pola policije přizjewił je so chětro natutkany 24lětny w badensko-württembergskim Ludwigsburgu. Po wšěm zdaću je sej potom tola hinak přemyslił a so radšo zminył. Policija muža na to pytaše a namaka jeho skónčnje doma w bydlenju. Bjez jězbneje dowolnosće bě młody muž z awtom runjewon přez kružny wobchad jěł, do parkowaceho awta zrazył a na to do štoma, doniž jeho sćěna domu njezadźerža.