To a tamne (31.03.25)
Lěta trajaca zwada wo psyči dawk w sewjerorynsko-westfalskim Hildenje je skónčena. Muž bě so jako lubowar psow w interneće stajnje zaso z psami pokazał. Na to bě jemu měšćanske zarjadnistwo zličbowanku 1 404 eurow za psyči dawk pósłało, dokelž njebě muž jako wobsedźer psow scyła zapisany. Sudnistwo nětko rozsudźi, zo njebě zličbowanka woprawnjena. Psy słušachu mjenujcy dźowce, přećelce, znatym abo susodam.
Atrapa błyskača na priwatnej ležownosći njedaloko württembergskeho Tuttlingena je jara wuspěšna. Wobsedźer zahrody na kromje wsy Frittlingen twjerdźi, zo šoferojo tam nětko wo wjele kedźbliwišo jědu. Zakazać jemu atrapu njemóža. Přiwšěm je sej policija nastroj bliže wobhladała, kotryž runa so błyskačowemu sćežorej. W nim pak njesteji awtomatiska kamera, ale kórkowa škleńca.
To a tamne (28.03.25)
Nachwilnje do chorownje zapokazać dyrbjeli su britiskeho krala Charlesa III. Přičina su wšelake wuskutki terapije přećiwo rakej, Buckinghamowy palast zdźěla. Wšitke terminy su po namjeće lěkarjow wotprajili. Kral je mjeztym zaso na swojim Londonskim kuble Clarence House. 76lětny bě w februaru 2023 zdźělił, zo je na rak schorjeł. Wot toho časa jeho lěkuja.
Njekedźbliwe zadźerženje wužiwarjow e-scooterow je přičina mnohich wobchadnych njezbožow. Tole su slědźerjo Göteborgskeje uniwersity při přepytowanju zwěsćili. Najčasćišo wobkedźbuja, zo jědu ludźo jenož z jednej ruku, zo hibaja so w skupinach abo zo maja mobilny telefon w ruce. Wosebje překwapiło je fachowcow zwólniwosć wužiwarjow, so do strašnych situacijow podać. Štóž roler sam njewobsedźi, nječini sej starosće wo móžnych sćěhach a škodach, w rozprawje rěka.
To a tamne (27.03.25)
Wobsedźerka 15 000 eurow, kotrež bě sprawna sobujěduca w spěšniku ICE namakała, je so přizjewiła. 34lětna ze Schleswigsko-Holsteinskeje bě hižo njedźelu pola policije skoržiła, dokelž z toho wuchadźeše, zo su jej pjenjezy pokradnyli. Wona pak měješe zbožo: 33lětna z Lipska bě tobołu z pjenjezami w spěšniku z Hannovera do Mnichowa wuhladała a policiji přepodała. Pjenjezy za nowe awto chcedźa žonje nětko přepodać.
Z balonom płuna w ruce su 27lětneho šofera wosoboweho awta w Berlinje lepili. Muž bě napadnył, dokelž z wočinjenym woknom zastojnikam nadawaše a płun z balona zadycha. Jako jeho policisća zadźeržachu, bě šofer chětro agresiwny. Hakle po dlěšim času wočini durje a so jim raznje spjećowaše. Policisća dyrbjachu jeho namócnje z awta wućahnyć a sputać. Nětko hrozy jemu chłostanje.
To a tamne (26.03.25)
Nadhodźiny w swětnišćowej staciji ISS dwěmaj astronawtomaj USA njezapłaća. Tole zdźěla swětnišćowy zarjad NASA. Runje druhim přistajenym knježerstwa dóstanjetaj wonaj mzdu za 40 hodźinski dźěłowy tydźeń. Nimo toho wšak přewozmje NASA kóšty za transport, přebywanje a zastaranje w ISS. Techniskeje pany dla dyrbještaj wobaj dźewjeć měsacow na swój nawrót na zemju čakać.
Po dwanaće hodźinach čakanja na lodźe jězora su pomocnicy w Alasce nana a toho dwě dźěsći wuchowali. Lětadło swójby bě so hižo nimale dospołnje podnuriło, medije USA rozprawjeja. Přiwšěm mějachu wšitcy třo hišće wulke zbožo: Małe lětadło bě z njeznateje přičiny na zamjerznjenym jězoru přizemić dyrbjało. Wot toho časa pomocnicy za nim pytachu. Skónčnje mašinu w njesměrnej lodowej pusćinje Alaski wuhladachu.
To a tamne (25.03.25)
Na wšěch 15 000 eurow je žona w spěšniku ICE ducy z Hannovera do Mnichowa namakała. 33lětna přizjewi so na to pola zwjazkoweje policije. Pjenjezy ležachu w tobole na prózdnym sedle w ćahu. Žona tošu policistam přepoda, kotřiž pjenjezy přeličichu. Dotal njeje so nichtó jako wobsedźer pjenjez přizjewił. Žona ma prawo na namakanske myto. Najprjedy raz pak policija pjenjezy wobchowa.
Pjany pasažěr je na lětanišću w Bremenje zapozdźenje wotlěta mašiny na kupu Mallorca zawinował. Jako pilot lětadło hižo na wotlět přihotowaše, sobudźěłaćerjam pjany muž napadny. 53lětny so přikazam stewardesow spjećowaše a jim dosć agresiwnje nadawaše. Pilot swoje přihoty na to přetorhny a muža z lětadła wupokaza. Mašina z dowolnikami móžeše hakle z 45 mjeńšinami zapozdźenja do směra na Španisku wotlećeć.
To a tamne (24.03.25)
Złota rubizna w hódnoće wjacorych statysac dolarow w staće Florida w USA je zaso pola swojeho wobsedźerja. Debjenki su ćěło paducha po přirodnym puću wopušćili, policija zdźěla. Paduch bě nawušnicy spóžrěł, jako jeho policija lepi. Na to běchu skućićela dwaj tydźenjej w chorowni pod dohladom policije wobkedźbowali. Röntgenowy nastroj zastojnikam při tym pomhaše.
Něhdźe 500 dróhow francoskeje stolicy w přichodnym času za awta zawru. Při woprašowanju wobydlerjow je so wjetšina za to wuprajiła, nowe pasma za pěškow wutworić. Na wothłosowanju pak so jeničce štyri procenty ze wšěch 1,4 milionow zapisanych wolerjow wobdźěli. Přichodne lěta móhło w Parisu 10 000 parkowanišćow wotpadnyć. Šoferojo awtow dyrbja so na wulke wokołopuće nastajić. Kotre drohi to potrjechi, hišće njewědźa.
To a tamne (21.03.25)
Hdyž lube domjace zwěrjo zahinje, potom su wobsedźerjo často hórko zrudźeni. W Chinje spyta tuž dźeń a wjace ludźi so z klonom swojeho lubuška tróštować. Za to dyrbja žarowacy často wjele pjenjez zapłaćić. Kaž rozprawja Hongkongska nowina „South China Morning Post“, płaći klonowanje w normalnym padźe něhdźe 150 000 do 380 000 Yuan, to je něhdźe 19 000 do 48 000 eurow.
Svenja Suhr zhotowja w swojej tkajerni w Oranienburgu płaty z cyle wosebiteho materiala: z psyčeje wołmy. Wosebje derje hodźa so za to dołhe psyče kosmy, kaž maja je Labradory, leobergery abo samojedy. Tkalča rozprawja, zo je husty kožuch woblubowanych štyrinohačow nimale 80 procentow ćopliši hač tón wowcow. Najwjace zajimcow da sej płat jako dopomnjenku na swoje domjace zwěrjo zhotowić.
To a tamne (20.03.25)
Finska wostanje kraj z najzbožownišimi ludźimi swěta. Kraj na sewjeru Europy je sej wosmy raz za sobu wodźace městno na swět wopřijacej lisćinje zbožownych ludźi zawěsćił. Sćěhuja Danska, Islandska a Šwedska. Němska je wot 24. na 22. Městno postupiła. USA je wo jedne městno na 24. poziciju zestupiła, najšpatniše hódnoćenje w stawiznach kraja.
Nadměrne wužiwanje digitalnych medijow wuskutkuje so špatnje na derjeměće dorosćenych w Němskej. To je wuslědk reprezentatiwneho naprašowanja instituta Stragetija & slědźenje. 1 680 dorosćenych je so na naprašowanju wobdźěliło. Najbóle ćerpi skupina 18 do 27lětnych. 92 procentow ludźi tuteje starobneje skupiny wužiwa socialne medije. Jenož 32 proc. čuje so po tym hišće derje. Zwěsćichu zdobom, zo su młodostni w Němskej mjeztym dźesać hodźin wob dźeń w interneće po puću.
To a tamne (19.03.25)
Sudniske jednanje wočakuje sakski kultusowy minister Conrad Clemens (CDU), po tym zo bě 2023 ze spěšnosću 80 km/h po dróze smalił, w kotrejž je jenož 30 km/h dowolenych. Najebać to, zo je Clemens zwólniwy, pokutu zapłaćić a jězbnu dowolnosć na wěsty čas wotedać, chce sudnik pruwować, hač njejedna so tola wo zakazane wubědźowanje awtow. To by raznišo pochłostał.
Honač Hermann njetrjeba hižo dlěje na wotpočnišću při awtodróze 28 we Wuchodnej Friziskej žiworić. Škitarjam zwěrjatow je so poradźiło, wosamoćeneho honača popadnyć a do zwěrjatownje dowjezć. Wot policije Hermann mjenowany honač bě tydźenje dołho kedźbnosć zbudźił, jako spłóšiwje po parkowanišću běhaše. Popadnyć pak jeho njemóžachu. Přiwšěm njeje zwěrjo ženje nadróžny wobchad wohrožowało.
To a tamne (18.03.25)
Njemdry muž je w Magdeburgu tomu zadźěwał, zo jeho awto wotwjezu. Sobudźěłaćerjo zarjada za porjad chcychu wóz wotwjezć dać. Pasy krana běchu hižo přiwjazane, jako so muž do awta sydny. Wón storkaše awto tak dołho doprědka a dozady, doniž so pasy njepušćichu. Potom wón přez chódnik twochny.
Mjenje drjewa su paduši naposledk w Braniborskej pokradnyli. Loni su 257 padow registrowali, 2023 bě jich hišće 328 padow. Policija z toho wuchadźa, zo płaćizna drjewa kriminelnu energiju paduchow wobwliwuje. Mjeztym wobsedźerjo lěsow drjewo z nastrojemi GPS škitaja.
