To a tamne (02.05.24)
Njezapomnity drje wostanje 62lětnemu mužej z westfalskeho Lippstadta wčerawši prěni skok z parašutom: Krótko do přizemjenja na lětanišću w Bürenje zatorhny jeho sylny wětřik, tak zo přizemi skónčnje na wjeršku štoma. Wohnjowi wobornicy jeho z pomocu rěbla ze šěsć metrow wysokosće wuswobodźichu. Najebać někotre wobodrjenja hałzow dla wosta muž njezranjeny. Hač so hišće raz na tajki skok zwaži, njeje znate.
Hoberski hotdog steji wotnětka na sławnym New Yorkskim naměsće Times Square. Něhdźe 20 metrow dołha twórba ameriskeju wuměłcow Jena Catrona a Paula Outlawa je hač do 13. junija wustajena. Skulptura „Hot Dog in the City“ steji na wosebitym wozu a so do wysokosće wuzběhnje. Hižo nětko je twórba „skulptura, swjedźeń a kritika“ a wulki magnet wobydlerjam a turistam, kaž rěka.
To a tamne (30.04.24)
Njeznaty je na parkowanišću w Budyšinje młodemu mužej – w socialnych medijach jako „Anzeigenhauptmeister“ znatemu – do mjezwoča dyrił. Wón bu lochce zranjeny a medicinisce zastarany. Policija přepytuje pad zranjenja ćěła dla. Hižo dlěši čas wuskušuje 18lětny systematisce wopak parkowacych a informuje policiju. Swoju sobotnišu „akciju“ na parkowanišću běše sam w socialnych medijach připowědźił a tak wjace hač 100 wćipnych přiwabił.
Tři měsacy po swojej diagnozy schorjenja na rak, přewozmje kral Wulkeje Britaniskeje Charles III. zaso zjawne terminy. Zhromadnje ze swojej žonu kralownu Camillu wopyta dźensa centrum za schorjenja na rak, tak připowědźi kralowski palast. Wobaj chcetaj so tam z pacientami kaž tež z medicinskimi specialistami zetkać.
To a tamne (29.04.24)
Fanojo Jana Feddera – woblubowaneho lěta 2019 zemrěteho Hamburgskeho filmoweho hrajerja – maja přichodne dny składnosć, něšto ze zawostajenstwa policajskeho komisara na přesadźowanju kupić. Wudowa Marion Fedder poskićuje na internetnej awkciji mjez druhim oldtimer, motorske, tačelak a elektriske nastroje. Fedder bě jako zběrar starych wěcow znaty. Mercedes pochadźa z lěta 1960, Moto Guzzi z lěta 1978.
Z 212 km/h po puću był je šofer wosoboweho awta sobotu na awtodróze A 10 na Třiróžku Habolskeho kraja sewjero-zapadnje Berlina. Dowolene je tam 120 km/h. Policija z toho wuchadźe, zo jědźeše šofer wotpohladanje přespěšnje, dokelž dźeržeše sej ruku před mjezwočo. Pomhać pak jemu tole ničo njebudźe.
To a tamne (26.04.24)
Psa na jewišću dźiwadła w Ulmje přihladowarjo nětko tola widźeć njebudu. Weterinarny zarjad města je zasadźenje psa w inscenaciji „Lessons in Love and Violence“ wotpokazał. Štyrinohač měješe při wustupje solistki něhdźe 15 mjeńšin jej poboku na jewišću stać. Na castingach běchu psy měrnje wostali. Najebać to je weterinarny zarjad měnjenje, zo je hara orchestra za nje přewulka.
Na wšě 84 kilogramow zawarjenych peperonijow při sebi měješe paduch w swojej karje, jako jeho policija w Bremerhavenje kontrolowaše. Wotkal 23lětny peperonije we wjacorych kanistrach měješe a dokal z nimi chcyše, njemóžeše wón zastojnikam „plawsibelnje“ rozkłasć. Policija je tuž přepytowanje padustwa dla zahajiła a pyta za wobsedźerjom žiwidłow. Prawdźepodobnje pochadźeja peperonije ze składa hosćencarja abo wobchoda wulkowikowarja.
To a tamne (25.04.24)
Ćeknjenej konjej stej wčera rano po centrumje Londona smaliłoj. Wjacori ludźo so zranichu. Na wobrazach je widźeć, kak bruny a běły kóń sedłanej a zgratowanej – tola bjez jěcharja – po dróhach Londonskeho West End běhatej. Při tym zrazyštej do taksija. Po informacijach medijow jednaše so wo konjej britiskeho wójska. Po tym zo běštej jěcharjow wotćisnyłoj, błudźeštej zwěrjeći dlěši čas po měsće.
Stawizny nuznikow w ćahach wobswětli nowa wustajeńca w muzeju němskeje železnicy w Nürnbergu. Přehladka je zdobom wotbłyšć stawiznow Němskeje, zamołwići twjerdźa. Mjez wjace hač 150 eksponatami je nócny hornc ze salonoweho ćaha reichskanclera Otta von Bismarcka 1860. Wustajeńca rysuje pak tež socialne stawizniske aspekty železnicy: Z prěnimi nuznikami přistajichu 1886 prěnje rjedźerki ćahow.
To a tamne (24.04.24)
Črije za najwjetšej noze swěta zhotowił je šewc Georg Wessels (71) w Sewjerorynsko-Westfalskej a je nowe črije 28lětnemu Jeisonje Rodriguezej we Venezueli wosobinsce přepodał. Rodriguez chorosće dla spochi dale rosće a trjeba mjeztym črije wulkosće 70 za noze, kotrež stej dlěšej hač 40 centimetrow. Ze swojimi 2,36 metrami ma młody muž přiběracy ćělne bolosće a problemy w bydlenju. Pjenjezy za lěkowanje pak wón nima. Tuž je dale a bóle na pomoc pokazany.
Nócny wulět bobra w zahrodźe w sewjerorynsko-westfalskim Hagenje je so w swětłowym šachće pinčneho wokna skónčił. Wobydlerjo wołachu policiju, kotraž pak njemóžeše pomhać, wšako zwěrjo w šachće kruće tčeše. Wohnjowi wobornicy bobra skónčnje wuswobodźichu a po přepytowanju z dowolnosću skótneho lěkarja w přirodźe zaso wusadźichu.
To a tamne (23.04.24)
Do wuhenja padnył je šup minjeny kónc tydźenja w Berlinje – a bu w druhim pospyće wot wohnjoweje wobory wuchowany. Wobornicy běchu spočatnje z rěblom podarmo spytali, šupa wućahnyć. Skótna lěkarka móžeše pomhać: Wona zwěrjo pohłuši. Na to móžachu małeho šupa wuchować. „Wšitcy běchu zbožowni“, wohnjowa wobora piše.
Njelubozne zetkanje z dingami w Awstralskej měł je spěwar Johannes Oerding (42). Hnydom pjeć dźiwich psow jeho wobkružichu, měrjo so na całty spěwarja. „To je ći naraz cyle hinak“, hudźbnik nowinarjam rjekny. Oerding njeměješe ničo při sebi, zo móhł so zakitować. Na zbožo njeje so ničo stało. Na potrjechenych městnach, na přikład na kupje Fraser Island, zamołwići doraznje před zwěrjatami warnuja. Te njeměrja so jenož na jědź turistow, ale wohrožuja tež dźěći.
To a tamne (22.04.24)
Cyłkownje 2 094 přeńdźenjow nastupajo předpisanu spěšnosć je policija w Braniborskej we wobłuku marathona błyskačow minjeny pjatk zwěsćiła. Na akciji bě so 286 zastojnikow wobdźěliło, kotřiž na 131 městnach w zwjazkowym kraju spěšnosć šoferow kontrolowachu. Loni bě tam při 74 000 wobchadnych zražkach 11 000 ludźi znjezbožiło, 108 smjertnje.
Metalowe platy na železniske kolije połožili su njeznaći njedaloko dwórnišća w Rotenburgu na sewjerowuchodźe Delnjeje Sakskeje a su tak ćah wobškodźili. Na lokomotiwje a na kolijach nasta škoda wjacorych dźesaćitysacy eurow. 24lětny lokomotiwnik bě ze swojim ćahom regionalneho předewzaća Metronom krótko po wopušćenju dwórnišća přez 23 kilogramow ćežke dźěle zjěł. Nichtó ze 600 pasažěrow w ćahu so njezrani. Policija pyta za swědkami.
To a tamne (19.04.24)
Spodźiwne zwuki w hawbje nad kuchinskimi kachlemi su swójbu w poruhrskim Hünxe pohnuli, z nuzowym čisłom 110 wohnjowu woboru wołać. Wobydlerjo na to tukachu, zo je so zwěrjo do hawby zabłudźiło. Dobrowólni wohnjowi wobornicy na to dwě wjewjerčce wuswobodźichu. Zwěrjeći běštej so přez klapu wonkowneje murje do kuchnje předrěłoj. Jednu wjewjerčku přepodachu skótnemu lěkarjej, tamna so hnydom zminy.
Z nowej družinu lodu su Italčenjo składnostnje tuchwilneho předsydstwa skupiny G7 swojemu dobremu mjenu jako najkreatiwniši narod słódkeho lodu wotpowědowali: Składnostnje zetkanja wonkownych ministrow skupiny najwjetšich industrijnych krajow swěta na kupje Capri w Neapelskim zaliwje su nowu družinu „Gelato G7“ předstajili: Wšelake słody w barbach wšěch krajow.
To a tamne (18.04.24)
Njewšědny přirodny biologiski spektakl wočakuja prawje bórze w USA: Inwaziju miliardow cikadow. Larwy překasancow wotpočuja hišće w zemi a so wudrapaja, je-li so zemja na 18 stopnjow woćopliła. Lětsa budźe wosebje zlě, dokelž su hnydom dwě hoberskej populaciji na rjedźe. Cikady su njestrašne, šěrja pak njesměrnu haru. Čehodla so cikady hakle po wjele lětach jewja, hišće njewědźa.
Mortweho muža do banki přiwjezła je žona w Brazilskej, zo by kredit dóstała. Muž sedźeše w kolesatym stole, medije rozprawjeja. Na wideju je widźeć, kak žona z mužom rěči a spyta, jeho k podpisanju zrěčenja pohnuć. Sobudźěłaćerjam banki wona rozłoži, zo so mužej strowotnisce derje njeńdźe. Tući wołachu na to lěkarja, kotryž smjerć muža zwěsći. Policija žonu zaja. Ta twjerdźi, zo bě muž hišće žiwy, jako z nim do banki přińdźe.
