To a tamne (21.11.24)
Wjacore hodźiny w garaži čakać dyrbješe 200 ludźi w Stuttgarće. Wopačny alarm bě awtomatisku hašensku připrawu aktiwizował a wrota wulkeje garaže w pincy domu wosrjedź města zawrěł. Paliło pak so njeje. Prawdźepodobnje bě hołbjacy njerjad alarm zawinił. Technikarjo spytachu podarmo, wrota wotewrěć. Skónčnje wohnjowa wobora wulku dźěru do nich wurěza. Pad nětko přepytuja.
Kołwrótne swětowe rekordy docpěchu tele dny zaso w Hamburgu. Zaměr je zapis do Guinnessoweje knihi swětowych rekordow. Tak je Muhamed Kahrimovic 76 kokosowych worjechow w běchu 30 sekundow z ruku rozbił. Palina Glebova je z nohu dartowe kłoki do powětrowych balonow třěliła a 22 z nich rozprasnyła. Joe Alexander móže w powětře lětace kłoki z ruku popadnyć. Guinness World Records Day přiwabja kóžde lěto wjele zajimcow.
To a tamne (19.11.24)
Wosebje hłódni drje běchu paduši, kotřiž su so do předrumnosće pjekarnje w hornjofrankskim Selbje zadobyli. Tam pokradnychu 30 mlokowych całtow, policija zdźěla. Hódnota rubizny wučinja 45 eurow. Hewak njejsu paduši ničo sobu wzali. Policija pad přepytuje. Tukaja na to, zo su so skućićeljo derje wuznali, dokelž je wěcna škoda skerje snadna.
Wopačni sobudźěłaćerjo banki su mandźelskeju w rudnohórskim Annabergu-Buchholzu wo 15 000 eurow wobšudźili. Porik je pjenjezy na pozdatne wěstotne konto přepokazał. Muž bě so telefonisce jako přistajeny banki wudawał a warnował, zo so kriminelni na konto mandźelskeju měrja. Zo njemóhli pjenjezy wotknihować, měłoj mandźelskaj pjenjezy na wosebite konto přepokazać. Jako njeběchu pjenjezy po dnjach, kaž slubjene, přeco hišće wróćo, wołachu policiju.
To a tamne (18.11.24)
Swojoraznu wellness je sej nošna kruwa w Jendźelskej popřała. Wona zabłudźi so do płuwanskeho basenka na priwatnej ležownosći a njemóžeše so sama wjace wuswobodźić. Dospołnje překwapjeny wobsedźer wołaše wohnjowu woboru. Ta wotpušći pool a zwěrjo z pasom wućahny. Skótny lěkar zwěsći, zo stej kruwa a jeje njenarodźene ćelo strowej.
Honjeńcu z policiju je sej 15lětny mopedist w Rudnych horinach dowolił. Wobsadka policajskeho awta bě dweju mopedistow zadźeržała. Jako zastojnicy z awta wulězechu, jedyn z njeju na chětro riskantne wašnje wotjědźe. Policisća młodostneho přesćěhowachu. Dyrbjachu pak so toho wzdać, jako moped na wuskich chódnikach ćěkaše. Zastojnicy pak běchu sej čisło napisali a wočakowachu 15lětneho doma. Po prěnim přepytowanju steješe wón pod wliwom cannabisa. Wón dyrbi z čućiwej pokutu ličić.
To a tamne (15.11.24)
Jeno spódnju drastu woblečeny je so šofer nakładneho awta na awtodróze 70 njedaloko bayerskeho Bamberga sam wuzamknył. Dokelž tež mobilny telefon w kabinje ležeše, wołaše muž nuzowu pomoc. Při temperaturach wokoło nule smědźeše so 54lětny w policajskim awće woćoplić, doniž pomocna słužba awto njewotamkny. Što muž w spódnich cholowach na dróze chcyše, njeje znate.
W kostimje mjedwjedźa su jebarjo spytali, awtowu zawěsćernju wobšudźić. W Kaliforniskej prezentowachu pozdatne widejo awtomatiskeje kamery, kotraž pokazuje, kak so mjedwjedź do parkowaceho awta zadobudźe a z pazorami sedła rozdrapa. Fachowc za dźiwje zwěrjata pak jebanstwo spózna. W bydlenju namaka policija kostim a rězniske hoki. Wobšudnicy chcychu 133 000 eurow wuzbytkować. Policija skućićelow zaja.
To a tamne (14.11.24)
Roznošowar paketow je w badensko-württembergskim Rheinfeldenje paket pokradnył, kotryž bě druhi roznošowar runje wotstajił. Póstownik widźeše, kak 41lětny paket do swojeho awta tykny a wotjědźe. Swědk zazwoni policiju a paducha wjacore kilometrow přesćěhowaše. W Lörrachu zastojnicy złóstnika zajachu. Wón dyrbi so nětko zamołwić. Što w pakeće bě, njeje znate.
Namócnosćam popjelneje srjedy w badensko-württembergskim Biberachu sćěhuja sudniske konsekwency. 40lětnemu ratarjej wumjetuja ranjenje krajneho měra a spjećowanje přećiwo policistam. 14. februara běchu ratarjo před halu, w kotrejž planowachu Zeleni politisku popjelnu srjedu, hnój mjetali a juchu wukidali. Slědowachu rozestajenja z policiju. Ratarjej pósłachu chłostanku 3 200 eurow. Tón pak nochce pokutu zapłaćić.
To a tamne (13.11.24)
Silwester praskotaki zakazać? Wo tym wuradźuje hižo nětko Berlinska policija. Wuchadźejo z nazhonjenjow minjeneho lěta chcedźa tež lětsa na łoskoćiwych městnach zwjazkoweje stolicy praskanju zadźěwać. Loni běchu wjacore tajke pasma zarjadowali. Za to běchu wohnjostroje na druhich blakach ćim hórše. Policija je 400 ludźi nachwilnje zajała, 54 policistow so zrani. Wosebje strašne je, hdyž wužiwaja ludźi trašawki a pistole.
Wo spektakularnym rubjenju wjace hač wosom milionow eurow pjenjez ze składa transportneho předewzaća wuradźuja tuchwilu před Bremenskim krajnym sudnistwom. Wobskoržena je 32lětna žona. Wona bě w meji 2021 pjenjezy w kontejneru na koleskach schowała a na dwór firma dowjezła. Tam čakachu kumpanojo w awće. Na to ćekny žona do Turkowskeje. Jej hrozy dźesać lět jastwa.
To a tamne (12.11.24)
Na wšěch 590 kilogramow kokaina su sobudźěłaćerjo wulkowikowarja sadu a zeleniny w Grimmje pola Lipska w bananowych kistach namakali. Wopojny jěd je wjace hač dźesać milinow eurow hódny, krajny kriminalny zarjad zdźěla. Zawod bě policiju informował, po tym zo běchu mjez bananami podhladne pakćiki wuhladali. Drogi běchu na 33 kistow rozdźělene. Cłownicy kokain sćazachu. Wotkal drogi pochadźeja, hišće njewědźa.
Wuměłski wikowar, kotryž steji předawanja falšowanych mólbow dla před Berlinskim sudnistwom, je wumjetowanja wotpokazał. Statne rěčnistwo twjerdźi, zo je muž mólby pólsko-francoskeho wuměłca Louisa Marcoussisa a toho mandźelskeje Alice Halička-Marcoussisy falšował a za dohromady 91 000 eurow předał. Wikowar twjerdźi, zo je mólby na přesadźowanju kupił.
To a tamne (11.11.24)
Zaměrnje duchownych wobšudźiłoj staj bratraj-dwójnikaj w Francoskej. Za to je jeju sudnistwo w Le Havre zasudźiło. Hłowny skućićel bě so pola duchownych přizjewił, twjerdźo, zo je tón jeho zmandźelił a zo tči w pjenježnych wuskosćach. Druhdy wudawaše so skućićel jako policist a wulesći sej po tutym puću bankowe daty. Zo je so zaměrnje na duchownych měrił, jebak z tym wopodstatni, zo chcyše so za splažne znjewužiwanje wjećić.
Zajeli su policajskeho nawodu wotrjada za hospodarsku kriminalitu španiskeje narodneje policije. Muž je zhromadnje ze swojej mandźelskej pječa sam z drogami wikował, pjenjezy „płokał“ a so wobtykać dał. Při přepytowanju domu namakachu zastojnicy wjace hač 20 milionow eurow, kotrež běchu zdźěla w sćěnach schowane. W běrowje šefa policije nańdźechu dalši milion eurow.
To a tamne (08.11.24)
Dosć krótki probowy čas jězbneje dowolnosće popřał je sej młody muž w Berlinje. Ze swojim 500 PS sylnym awtom smaleše wón 192 km/h spěšnje po měšćanskej awtodróze, hdźež je najwjace 80 km/h dowolenych. Nětko dyrbi wón na psychologiske přepytowanje. Nimo toho hrozy jemu pokuta 1 600 eurow a tři měsacy bjez jězbneje dowolnosće.
Cyły skład brónjow namakali su policisća w awće muža ze Sakskeje, jako jeho na awtodróze njedaloko Bayreutha zadźeržachu. Tamnym šoferam bě muž z agresiwnym zadźerženjom a nalěpkami reichsbürgerow na awće napadnył. Zastojnicy namakachu wulku třělbu, teleskopowy retl, precizny katapult a 19 centimetrow dołhi nóž w awće. 61lětny muž smědźeše dale jěć, po tym zo bě wšitke brónje wotedał. Policisća napisachu skóržbu ranjenja zakonja wo brónjach dla.
To a tamne (07.11.24)
Konjace wubědźowanja wotprajili su dźensa po wšej Francoskej. Po tutym puću demonstruje konjaca branša přećiwo planowanemu zwyšenju dawkow na konjace wjety. Stawki w konjacym sporće su w Francoskej přewšo rědke. Tamniše knježerstwo chce z raznymi naprawami 60 miliardow eurow w etaće zalutować. Nimo nowych kreditow planuja tež wyše dawki. Branša pak z tym liči, zo wohrožuja dawki dźěłowe městna.
Seriju wjace hač 50 zadobywanjow do domow wuslědźiła je policija w Saksko-Anhaltskej. Tam su mjeztym 14lětneho młodostneho a 25lětnu žonu zajeli. Wobaj běštaj cwólbu nawjedowałoj, kotraž bě we wjacorych zwjazkowych krajach aktiwna. Paduši wurumowachu domske wodnjo, jako njebě nichtó tu. Při tym zawostajichu wulku wěcnu škodu.
