To a tamne (08.06.18)
Bronza, slěbro a nětko snano złoto? Studenća Lipšćanskeje Wysokeje šule za techniku wuličeja sej za Robocup 2018 dosć dobre šany na koparski titul. 15. junija wotleća woni do kanadiskeho Montreala. Sobu změja dźewjeć małych roboterow, kotrež potom na kumštnym trawniku kopańcu hraja. Wotpowědnu software běchu studenća sami wuwili. Na dotalnych swětowych mišterstwach su sej hižo bronzowu a slěbornu medalju zawěsćili.
W myjerni awtow tčacy wostał je rentnar w Bochumje. Wohnjowa wobora dyrbješe muža wuswobodźić. Tón bě z awta wulězł, jako připrawa hižo dźěłaše. Tak dósta so muž z nohu do šćětkow, kotrež kolesa awta rjedźachu. Ze železnej žerdźu móžachu wobornicy rentnarja po dźesać minutach wuswobodźić a dowjezechu jeho do chorownje.
To a tamne (07.06.18)
Znateho krosnowarja po fasadach Alaina Roberta (55) su zajeli, jako tón spyta, bjez kóždeho zawěsćenja na wysokodom w juhokorejskej stolicy Seoulu zalězć. Na 77. poschodźe 555 metrow wysokeho Lotte World Towera bě krosnowanje za chrobłeho Francozu po dwěmaj hodźinomaj skónčene. Z wisatej platformu dowjezechu jeho na třěchu 123poschodoweho twarjenja. Policija jemu wumjetuje, zo njeje wobsedźerja mróčeloškrabaka do swojeje akcije wo dowolnosć prosył.
Z cirkusa ćeknjeny elefant je so po porynsko-pfalcskim Neuwiedźe přechodźował. Při tym so ani awtow ani pěškow njeboješe. Zwěrjo bě měrne, a sobudźěłaćerjo cirkusa móžachu je bjez problemow zaso wróćo wjesć. Prawdźepodobnje bě elefant elektriski płót swojeho wobhrodźenja roztorhał. Jeho puć na swobodźe wšak bě runje kilometer dołhi.
To a tamne (06.06.18)
Wulět z awtom maćerje je so za bratrow w starobje šěsć a wosom lět w Delnjofrankskej runje hišće někak zbožownje skónčił. Hólcaj z Rothfelsa běštaj so rano zahe skradźu z domu zminyłoj, jako mać hišće spaše. Z jeje awtom jědźeštaj cyłkownje dźewjeć kilometrow, mjez sobu so wotměnjejo. Skónčnje zrazyštaj do nabóčneho wobhrodźenja. Tam jeju policija wotewza. Wobaj wostaštaj njezranjenaj, awto maćerje pak dyrbjachu wotwlec dać, w policajskej rozprawje rěka.
Kofej z brokolijom, espreso z brokolijom a cappuccino z brokolijom poskićeja wot najnowšeho w scenowej kofejowni „Commonfolk Coffee“ w awstralskim Melbournje. Za to měšeja zeleninowy próšk do kofeja abo sypaja jón na ješć. Pječa ma łžička próška telko wutkow kaž cyła porcija zeleniny. Reakcije ludźi na nowu kreaciju wšak su tež chětro měšane.
To a tamne (05.06.18)
Zo móže čołm z betona spěšny być, su studenća Lipšćanskeje wysokeje šule za techniku dopokazali. Na wubědźowanju tajkich nastrojow w Nižozemskej běchu woni z třomi złotymi, třomi slěbornymi a dwěmaj brozowymaj medaljomaj najwuspěšniši wšěch nastupjenych 17 mustwow. Jich pjeć metrow dołhi čołm wažeše 42 kilogramow. Runje tak wulki plastowy čołm přińdźe na 25 do 30 kg.
Z hońtwjerskim nožom wobrónjeny je muž w delnjosakskim Hitzackeru spytał tykanc kradnyć. Byrnjež jemu to zakazali, zastupi 54lětny do pjekarnje. Tam wućahny nóž a wotkra sej někotre skibki tykanca. Kupcaj staj muža přemóhłoj a jemu nóž wotewzałoj. Paduch so zminy – bjez noža a tykanca. Policija přepytuje nětko wobrónjeneho padustwa dla. Čehodla bě jemu zakazane do wobchoda zastupić, njeje znate.
To a tamne (04.06.18)
Powětrowej balonkaj stej sobotu pola Drježdźan zasadźenje helikoptera zawiniłoj. Wěža lětanišća bě policiju wo zadźěwku w čarje informowała, po kotrejž mašiny přileća. Wobsadka policajskeho helikoptera wšak zwěsći, zo njejstej balonaj strašnej. Wuknjacy zakładneje šule běchu balonki na dnju dźěsća pušćeli a mějachu samo dowolnosć, kotraž je w susodstwje lětanišća stajnje trěbna.
Piwčenja dla su w Bremerhavenje policiju wołali. Rentnarka bě zdźěliła, zo sedźi ptačk w jeje kuchni a žałostnje piwči. Zastojnicy piwčenje tohorunja słyšachu. Te pak pochadźeše wot kuroweho alarmowaka na wjerchu, kotrehož baterije běchu słabe, a je hnydom wuměnichu.
Z ćahom sama kupać jěła je pjećlětna w hessenskim Bad Arolsenje. Hakle w dźěćacym bazenku wona personalej napadny. Staršej běstej jej dźeń do toho přilubiłoj, zo kupać pojědu. Dokelž to holčce spěšnje dosć njeńdźeše, sej wona sama do kupjele wuleća
To a tamne (01.06.18)
Zwěrjacu pomoc je stražnistwo Wojerowskeho zwěrjenca minjeny kónc tydźenja dóstało. W nocy na njedźelu bě so pjeć wosobow z Wojerowskeje kónčiny do coologiskeje zahrody zadobyło a wótře wołajo po terenje běhało. Na to reagujo započachu šěre čaple škrěčeć. Sobudźěłaćerjej města, kiž runje nimo běžeše, njewšědna hara napadny. Zadobywarjow wuhladajo wón policiju informowaše, kotraž skućićelow nachwilnje zaja. Nětko přepytuje kriminalna policija.
Agilny rój pčołkow je w Awstriskej wohnjowu woboru zaběrał. Tysacy pčołow bě so najprjedy na kolesu a potom na awće zaměstniło, kaž rěčnik wohnjoweje wobory w Kremsu, 80 kilometrow sewjernje Wiena, zdźěli. Za tajke situacije specielnje wukubłany wohnjowy wobornik pčołki popadny a přesydli, po tym zo bě je z wodu popryskał.
To a tamne (31.05.18)
Eksotiski had w bydlenju je podružnicu w Zhorjelskim nutřkownym měsće chětro wustróžił. Zwěrjo so na balkonje słónčeše a skónčnje na ramik wokna zalěze, policija zdźěli. Alarmowani policisća skazachu fachowca, kiž hada jako njejědojteho juhoaziskeho wuža (Natter) identifikowaše. Kak bě so połdra metra dołhi had na balkon dóstał a komu słuša, dotal njewědźa. Nětko je zwěrjo najprjedy raz w Zhorjelskim zwěrjencu.
Za spektakularne wuchowanje dźěsća z balkona sławjeny migrant z Malija Mamoudou Gassama je w Francoskej dowolnosć přebywanja dóstał. Statny prezident Emmanuel Macron bě jemu to přilubił. Nětko ma wón francoske staćanstwo a dźěło pola wohnjoweje wobory dóstać.
To a tamne (30.05.18)
Kruwa na twarskich róštach je w Bayerskej zasadźenje wohnjoweje wobory zawiniła. „Pytajo za wotměnu“ dósta so skoćo, z pastwy ćeknywši, na róšty, kotrež běchu při mosće připrawjene. Tam so přełama a wosta tčacy. Dźěłaćerjo njeběchu róšty wotpowědnje zawěsćili. Pućowarjo kruwu skónčnje wuhladachu. Dokelž policisća pomhać njemóžachu, natwarichu wohnjowi wobornicy ekstra za nju drjewjany mosćik.
Sněhowy płuh pokradnyli su njeznaći tele dny w hessenskim Melsungenje. Nastroj, kotryž je poprawom jězdźidłam zymskeje słužby přišrubowany, płaći nimale 3 000 eurow. Wón ležeše na twarnišću při kupnicy, kaž policija piše. Što paduši ze sněhowym płuhom při tuchwilnym lětnim wjedrje z 30 stopnjemi chcedźa, to drje wostanje jich potajnstwo.
To a tamne (29.05.18)
Dokelž je přepřećelnje strowił, muž w Münsteru nětko w jastwje sedźi. Pytany, wot drogow wotwisny bě jako pěšk policistej napadnył, jako jemu kiwaše. Na prašenje, hač so znajetaj, wón rjekny: „Haj, wy sće mje tola před šěsć lětami zajał.“ Na to zastojnik wupokaz muža kontrolowaše, při čimž so wukopa, zo 33lětny statnemu rěčnistwu hišće 4 100 eurow dołži. Dokelž pjenjezy njeměješe a tež žanu krutu adresu, dowjezechu jeho do jastwa.
„Spidermanej“ z afriskeho Malija, kiž je dźěćo na štwórtym poschodźe bydlenskeho domu wuchował, chcedźa francoske staćanstwo spožčić. To je statny prezident Emmanuel Macron 22lětnemu wosobinsce přilubił. Mamoudou Gassama bě po balkonach lězł a hólčkej, kotryž wisaše na wonkownym boku wobhrodźenja, žiwjenje wuchował. Gassama je bjez papjerow w Francoskej.
To a tamne (28.05.18)
„Hrabnjenčko“ móža sej zajimcy nětko w suweněrowym wobchodźe Běłeho domu kupić. Tam předawaja wopominanski pjenjez, kotryž běchu za wjerškowe zetkanje prezidenta USA Donalda Trumpa a knježerstwoweho šefa Sewjerneje Koreje Kima Jong Una zhotowili. Trump pak je wjeršk wotprajił, a tak dóstanu ludźo dopomnjenku nětko za 59 město 85 dolarow.
Rědke zwěrjata w interneće skazać a je z paketom pósłać njeje hižo ničo jónkrótne. Kaž němski hłowny cłowny zarjad w Frankfurće nad Mohanom zdźěla, běchu tam loni 1 700 transportowanych zwěrjatow zwěsćili. W ručnym wačoku turista z Algeriskeje nańdźechu na přikład štyri žiwe nopawy. Woranaj z Indoneskeje w póstowym pakeće njejstej telko zboža měłoj. Jedyn bě hižo zeschnyty, tamny krótko na to zahiny.
