To a tamne (05.04.16)
W błóće tčacy wostało je awto pola badensko-württembergskeho Bad Wimpfena, dokelž bě so jeho šofer na nawigaciski nastroj spušćał. Při tym so w lěsu dospołnje zabłudźi. Skónčnje so awto tež hišće po mokrej skłoninje dele suny. 35lětny zazwoni nuzowe čisło policije. Ta pak dyrbješe so pěši po błóće k njemu předrěć. Mjeztym wšak bě na pomoc wołany traktor awto zaso na puć sćahnył.
Cyle naheho šofera po puću do bordela su policisća w posaarskim Völklingenje zadźerželi. 38lětny sedźeše njezdrasćeny za wodźidłom, jako jeho sobotu rano kontrolowachu. Dokelž njeměješe jězbnu dowolnosć, dyrbješe muž pěši dale hić – po tym zo bě so zdrasćił. Čehodla bě nahi po puću, wón sam njewědźeše.
To a tamne (04.04.16)
Dweju wjewjerčkow dla staj šoferaj awta w sewjerorynsko-westfalskim Pulheimje nuzowe čisło policije woliłoj a ju wo pomoc prosyłoj. Hrymzakaj běštej so pod awtomaj schowałoj a nochcyštej swój schow wopušćić. Šoferaj pak nochcyštaj jej „na žadyn pad sobu wzać“. Zastojnicy wuprajichu wjewjerčkomaj na to „zakaz přebywanja“. A to pomhaše. Hrymzakaj so nablaku zminyštej. Po měnjenju policistow běchu uniformy pola njeju wotpowědny zaćišć zawostajili.
Po awtodróze domoj nóžkowała je žona w Posaarskej, dokelž nochcyše hižo dlěje pódla mandźelskeho w awće sedźeć. Policajske awto so 63lětneje pola Heusweilera dohlada a je ju sobu wzało. Po swójskich informacijach bě so wona z mužom toho wašnja jězdźenja dla tak zwadźiła, zo na parkowanišću wulěze a pěši dale dźěše. Muž jědźeše runu smuhu domoj.
To a tamne (01.04.16)
Wosom dnjow w póstowym pakćiku přežiwiła je siamska kóčka we Wulkej Britaniskej. Wobsedźerka chcyše zynkonošaki z jendźelskeho Cornwalla do hrabinstwa West Sussex słać. Při tym kóčka skradźu do paketa zalěze, bjeztoho zo by to něchtó pytnył. Po 420kilometrowskej jězbje běše wona po wosom dnjach wša lačna a wuhłódnjena. Skótny lěkar ju zastara a móžeše dźakowano značce na pasku wobsedźerku zwěsćić. Žonje je jeje njekedźbliwosć kóčce napřećo „žałostnje žel“, wona nowinarjam rjekny.
Sobu najwuspěšni zběrar šmigow je 76lětny Günter Uhlig z delnjosakskeho Wiedensahla njedaloko Hannovera. Mjeztym je 36 400 šmigow w swojim domje znosył, nowinarjo rozprawjeja. Wšitke rumnosće w pincy domu su z nimi nakopjene. Čara za sobu składźenych šmigow by dlěša hač 60 km była.
To a tamne (31.03.16)
Wopaki pokładźeneje pizzy dla je žona w ameriskim Hartfordźe nuzowe čisło policije woliła. Policiji wona skoržeše, zo nochce jej pizzeria pjenjezy wróćić. Pokiw zastojnikow, zo jedna so wo nuzowe čisło za žiwjenjastrašne situacije, žonu njewottraši. Wona prošeše policistow, hač njemóhli do pizzerije jěć a naležnosć zrjadować. Žona wšak bě połojcu pizzy hižo zjědła a so hakle po tym rozsudźiła so hóršić.
Přemjenować Hasu Lenina na Johna Lennonowu, to su wobydlerjo ukrainskeje wsy wotpokazali. Něhdźe 5 000 ludźi je so tam wukazanemu přemjenowanju na dobro 1980 morjeneho spěwarja Beatlesow wuspěšnje spjećowało, kaž nowiny rozprawjeja. Guwerner bě přemjenowanje po zakonju přetłóčić chcył. Dojednali su so skónčnje na kompromis. Hasa rěka wotnětka Słowjanska.
To a tamne (30.03.16)
Do chětro njepřijomneho połoženja je so muž w mecklenburgsko-předpomorskim Parchimje dźens w nocy přinjesł, po tym zo bě so z bydlenja wuzamknył. 19lětny chcyše, přez listowu škałbu w durjach klučik dosahnyć, kotryž wotnutřka wisaše. Při tym pak z ruku w škałbje tčacy wosta. Hakle přiwołana wohnjowa wobora móžeše jeho wuswobodźić.
Wjace hač sto britiskich puntow (130 eurow) je sej šofer taksijoweje posłužby Uber wot wopiteho hosća žadał, kiž chcyše poprawom jenož pjeć milow wjezeny być. Po tym zo bě sej tón wusnył, jědźeše šofer po hoberskim wokołopuću wjace hač 20 milow po Londonje, kaž nawigaciski system dopokazuje. Uber chce pad pruwować, kaž nowiny pisaja. Pjenjezy su mužej hižo wróćili.
To a tamne (29.03.16)
Dospołnje wopita šoferka wosoboweho awta je sej při wobchadnej kontroli w Rathenowje w nocy na sobotu přidatny hněw naparała. Policisća běchu za awtom 30lětneje jěli a ju ze signalom „Stopp Polizei“ zastać namołwjeli. Na to žona zasta, storči wróćo a zrazy do policajskeho awta. Test wunjese 1,95 promilow alkohola. Zastojnicy wobchowachu sej jězbnu dowolnosć a test kreje.
Wulki žołdk a prózdnja móšeń: Darmojědźk je sej k jutram w Gotha hnydom dwójce swjedźenski wobjed popřał, bjez toho zo by płaćił. 49lětna žona ze Sömmerdy bě sej najprjedy w aziskim hosćencu tři hłowne jědźe a napoje skazała. Jako so spjećowaše zapłaćić, zakazachu jej dalši zastup do hosćenca. Na to pak poda so k Italčanej, hdźež so za 72 eurow nasyći a napi – a znowa njezapłaći. Tež tam nochcedźa ju nětko wjace widźeć.
