Awtor dźensa
Jan Hrjehor
Awtorka dźensa
Halena Jancyna
Volleyball Nations League je nowosć na polu wolejbula w lěće 2018. W nowym formaće hraje 16 mustwow dohromady šěsć tydźenjow dołho wo titul. Předkoło traje 35 dnjow, finalne sydom. Najprjedy hraje kóždy přećiwo kóždemu, w šestym a zdobom poslednim tydźenju postaji šěsć najlěpšich mustwow dobyćerja.
Pola žonow hraja lětsa narodne mustwa z Němskeje, Brazilskeje, Chiny, Italskeje, Japanskeje, Nižozemskeje, Ruskeje, Serbiskeje, Južneje Koreje, Thailandskeje, Turkowskeje a USA. To su tak mjenowane coreteamy, kotrež tworja jadro. Nimo nich wobsteji polo wobdźělnikow hišće z challengerteamow, kotrež mjenowane wubranki wužaduja. To su Argentinska, Belgiska, Dominikanska republika a Pólska. Pola muži je zestawa trochu hinaša: Argentinska, Brazilska, China, Francoska, Iran, Italska, Japanska, Pólska, Ruska, Serbiska a USA su coreteamy, Awstralska, Bołharska, Kanada a Južna Koreja challengerteamy. Tučasnje je tak, zo hrajetej w Stuttgarće a Ludwigsburgu žónske a muske narodne wolejbulowe mustwo w nations league.
Awtor dźensa
Clemens Šmit
„Tutón cyły multikulti-humbuk mje chětro rozhněwa! Hdyž, potom ma to tak kaž tehdy rěkać – nic hinak!“ Jako testowachu chowancy narodneho koparskeho trenarja Joachima Löwa minjeny pjatk přećiwo Sawdi-Arabskej, wudyrichu w socialnych syćach paralelnje ze zahwizdanjom zaso horce diskutuje. Přičina njebě ani skerje słaby wukon němskich koparjow ani prašenje, štó sej kotreho (statneho) prezidenta bóle česći. Ně, po cyłym interneće hadrowachu so ludźo znowa cyle druheje přičiny dla. Samo w kruhu znatych sym hižo podobne diskusije dožiwił.
Čehodla pak so někotři tu tak jara wadźa a rozestajeja? Rěč je wo aktualnym přimjenje němskeho koparskeho mustwa jako „die Mannschaft“. Při tym njejsu přimjena za narodne wubranki poprawom ničo wosebiteho. Brazilčenjo maja swoju „seleção“, po słowje wubranku. Jendźelčenjo juskaja za „three lions“, potajkim za tři lawy. Dale stej tež tak mjenowanej „squadra azzurra“ za Italčanow a „furia roja“ za Španičanow swětoznatej. A što nětk z němskim přimjenom njetrjechi?
Awtor dźensa
Jurij Bjeńš
Wo postupje resp. zestupje je mjeztym w nimale wšitkich koparskich ligach a klasach rozsudźene. Wjeselo mištrow a postupnikow bě wšudźe wulke, nic jenož w Mnichowje, ale na přikład tež w Nürnbergu, Magdeburgu a Biskopicach. Někotre mustwa su so takrjec w poslednjej mjeńšinje před zestupom wuchowali kaž Dynamo Drježdźany abo Budissa Budyšin. Zestupnicy pak běchu husto hłuboko zraženi a zrudni. W prěnjej zwjazkowej lize je to tónraz na tradicije bohatej klubaj trjechiło: 1. FC Köln a Hamburgski SV.
Haj, kopańca je dźensa brutalny gšeft. Jenož, štóž wot swojeho ćěła wobstajnje maksimalny wukon wužaduje, ma šansu na dlěšodobny wuspěch. Njemyslu tu jenož na nadarjenych hrajerjow, kotřiž su přez ćežke zranjenja, často přez brutalne foule zawinowane, w swojej karjerje wohroženi. Myslu pak runje tak na pady, hdźež su so wulkotni koparjo ćělneho přenapinanja dla na trawniku zwjezli a zemrěli.
Awtor dźensa
Michał Nuk
Hižo dołho je w Budyskej měšćanskej radźe rěč wo zdźerženju Króny. Při wšěch diskusijach wo předani abo wottorhanju zarjadowanišća su wšelake skupiny, kotrež maja wosebite zajimy na městnosći. Jedna z nich su čłonojo billardoweje sekcije „BiGa Budyšin“ sportoweho towarstwa MSV 04. Hrajerjo a hrajerki zetkawaja so štyri króć wob tydźeń w Billardowej garaži k zhromadnemu treningej a wotměwaja tu turněry kaž tež domjace hry we wobłuku krajneje ligi pool-billarda. Po wuprajenju nawody sekcije Steffena Hohlfelda by tuchwilu jara ćežko było podobnje wulku rumnosć namakać, hdźež móhli trening a wubědźowanja na aktualnym stawje zaručić.
Hišće w NDRskim času bě kehelowy billard w Sakskej a Braniborskej popularny – mjez Serbami so wosebje Beno Pětška z błótowskich Bórkowow za sport z kijom a kulemi horješe a je hišće dźensa za tamniše 5. mustwo aktiwny.
Awtor dźensa
André Strelow
Sezona w profijowej kaž tež amaterskej kopańcy Němskeje so nachila. Škoda, zo běše napjatosć w najwyšej zwjazkowej lize hižo po krótkim času zaso fuk. Šesty raz za sobu su Bayerojo mištersku šklu do Mnichowa wotwjezeli. Za chowancow trenarja Juppa Heynckesa je to mjeztym rutina. Na mjezynarodnej runinje pak běše za nich w połfinalu jězba zakónčena. Real Madrid pokaza cyle jednorje wjetšu překlepanosć, byrnjež Bayerojo we woběmaj partijomaj wjac hrajnych podźělow a šansow měli. Nětko ma trenar Heynckes hišće šansu na pokalne dobyće w Berlinje. Z wuspěchom by swoje dźěło wurjadnje zakónčił a so na wuměnk podał. Přesłapili su chowancy Petera Stögera z Dortmunda. Něhdyša lochka hra je preč, cyłkej BVB faluje konstantnosć. Tež byki z Lipska dožiwichu wočakowanu ćežku druhu sezonu a zběrachu prěnje nazhonjenja na europskej runinje. Dokelž sobotu dypkowu hru dobychu, móhli so woni hišće za městno europskeje ligi kwalifikować. Jeli pak přěhraja, móže so stać, zo póńdu z prózdnymaj rukomaj z hrajneje doby 2018/2019.
Awtor dźensa
Jurij Nuk
Nětko započina so poprawna lětuša lochkoatletiska sezona pod hołym njebjom we wšej šěrokosći swojich mnohich disciplinow. Tydźenje crossowych wubědźowanjow mjez druhim we Wostrowcu, w Połčnicy, Mužakowje, Biskopicach a na horu Mnišonc su nimo. W tutych tradicionalnych a woblubowanych wurisanjach je so w jednotliwych starobnych klasach wo prědnje městna wojowało. To je tola přeswědčiwy přikład a dopokaz, zo je čłowjek z wotpowědnej krutej wolu a starobje přiměrjenym prawym treningom nimale čas swojeho žiwjenja kmany, so w běhanju a nimale runje tak w płuwanju kaž kolesowanju wubědźować. Prawidłowne sportowanje tyje našemu imunowemu systemej, překruty a wopačny trening pak strowoće skerje zeškodźi.
Awtor dźensa
Stefan Šmit
Dźensa chcu so na tutym městnje temje abo lěpje prajene chutnemu problemej wěnować, kotryž wuhladaš stajnje zaso na sportnišćach resp. na kromje trawnika. Rěč je wo přehnatym fanatizmje někotrych fanow a w přiběracej měrje tež staršich, kotřiž sćěhuja hru swojeho dźěsća. Wšojedne hač napřećo sudnikej, přećiwniskemu mustwu abo samo swójskemu dźěsću – kotre słowa někotři trenarjo, mustwowi nawodźa abo samo starši na kromje hrajnišća wot so dawaja – nima po mojim měnjenju ničo, ale woprawdźe docyła ničo ze sportom a wosebje z respektom činić. To je jeničce hańba!
Snano dyrbi sej kóždy – wšojedne hač přiwisnik, trenar abo tež aktiwny kopar – druhdy tola zaso raz definiciju sporta přečitać a wuwědomić. Přetož po njej woznamjenja zapřijeće sport: aktiwita ćěła, kotraž je za zabawu a kotraž přewjedźe so z wjeselom.
Tola runje tele wjeselo, kotrež ma sport a w tym padźe kopańća być, někotři ze swojej zasakliwosću, z njemóžnymi wuprajenjemi a z přehnatym fanatizmom cyle jednorje skóncuja.
Awtor dźensa
Toni Ryćer
Hakle njedawno smy hody swjećili, a hižo su jutry nimo. Hdźe jenož čas wostanje. Jako dźěćo njemóžach wočakować, zo dny, měsacy a lěta za sobu dóstanu. Šulski čas dźě docyła mojim předstawam njewotpowědowaše. Dźensa chcył časniki najradšo zadźeržeć, zo móhł wšě swoje plany zeskutkownić. Nochcu pak skoržić.