Widźał, słyšał, napisał (09.04.18)
Awtor dźensa
Toni Ryćer
Hakle njedawno smy hody swjećili, a hižo su jutry nimo. Hdźe jenož čas wostanje. Jako dźěćo njemóžach wočakować, zo dny, měsacy a lěta za sobu dóstanu. Šulski čas dźě docyła mojim předstawam njewotpowědowaše. Dźensa chcył časniki najradšo zadźeržeć, zo móhł wšě swoje plany zeskutkownić. Nochcu pak skoržić.
Widźał, słyšał, napisał (03.04.18)
Awtor dźensa
Tomaš Faska
Kóžde serbske sportnišćo ma swoje wosebitosće. Tež kóždy mjeńši abo wjetši koparski stadion je na swoje wašnje jónkrótny – hač w Ralbicach, Chrósćicach abo druhdźe. Wšudźe pak je trawnik zeleny, smužki su běłe, a na woběmaj kóncomaj hrajnišća steja wrota. Te su dźensa tež wšudźe ze samsneho materiala, z metala – a to přewažnje z aluminija. Něhdy wšak běchu pobóčnej žerdźi a prěčna łata koparskich wrotow z drjewa. Ja sam sym tajke hišće zeznał. A sprawnje prajene, hustodosć jako wrotar mjez žerdźomaj stejo mějach před tajkim drjewjanym kolosom mjenje respekta hač pozdźišo před železnymi wrotami. Štóž je, za bulom skakajo, hižo raz ćělny kontakt z njepowalnym ćělesom měł, wě, wo čim rěču.
Ale, što rěka njepowalny? Z tej kajkosću bě to pola drjewjanych wrotow druhdy chětro łoskoćiwa wěc. A hižo sym při temje swojeje dźensnišeje kolumny. Wjerću koło časow zaso raz wróćo a hladam na 3. apryl 1971. Třeći dźeń jutrownika před 47 lětami směmy mjenujcy historiski datum mjenować – štož postajenje materiala wrotow za kopanišća nastupa.
Widźał, słyšał, napisał (26.03.18)
Awtor dźensa
Jan Hrjehor
Gerat Lipič z Róžanta dźěła w Bayerskej zhromadnje z olympiskej dobyćerku, kotraž je tež hišće swětowa wicemišterka a jedna z najlěpšich spěšnosněhakowarkow swěta, na twarnišću při Tegernskim jězoru. Jemu pak njeje wědome, štó pomocnica je ... . Loni, zawěsće w lěćnym času, tak dokładnje to njewěm, bě Róžeńčan, kiž je hižo přez lětdźesatkaj na zapadźe pola Mnichowa přistajeny twarskeje firmy Wolfbauer, při Tegernskim jězoru zasadźeny. Tam bydli mjez druhim tež Uli Hoeneß, prezident FC Bayerna Mnichow.
Widźał, słyšał, napisał (19.03.18)
Mjeztym 20. raz wotměja spočatk junija w Zhorjelcu „Swjedźeń wolejbula“. Woblubowany to wjeršk sezony, tež mjez serbskimi wolejbulistkami a wolejbulistami. Wšo dohromady 24 mustwow wojuje tam w třoch kategorijach wo dobyće. Jedna so wo turněry muži, žonow a wólnočasnych sportowcow Tež lětsa stej Viktoria Worklecy a ST Marijina hwězda zaso pódla. Za organizatora VfB Zhorjelc je to jubilej a zdobom kónčny dypk. Budźe to poslednje wubědźowanje tajkeho razu, dokelž towarstwo personelnych přičin dla po 25 lětach rozpušća. 30. junija so w towarstwje swěcy hasnu.
Widźał, słyšał, napisał (13.03.18)
„Hdyž sej mysliš, zo mysliš, potom sej jenož mysliš, zo mysliš ...“ – Chróšćanske druhe koparske mustwo ma nowu „kmótru“. Juliane Werding je jemu minjenu sobotu tři wažne dypki přećiwo kontrahentej z Lubuša zawěsćiła. Haj, tak to je. W kabinach Sokoła spěwa Měrćin Štrawba, za Horjansku rezerwu su to němske šlagry. Nastało bě wšitko při jědnatce, přeradźi mi nadběhowar Chróšćanow a zamołwity za hudźbu w kabinje. Wo kotru jědnatku so tu jedna, jědnatku při kopańcy abo znatu sobotnu zabawu, wšak nochcyše mi rjec. Ćim rjeńšo, zo stej kónc tydźenja wobě zastupnistwje koparjow SJC z dobyćom do druheje połserije startowałoj. Štó by sej to myslił?
Widźał, słyšał, napisał (05.03.18)
Poprawom nochcych w póstnym času žane słódkosće chłóšćić. Sprawnje pak přiznawam, zo sym so toho předewzaća poměrnje spěšnje wzdał. Zo pak bych swojemu ćěłu tola něšto dobreho popřał, předewzach sej kóždy dźeń znajmjeńša poł hodźinki sportować. Pozitiwny pódlanski efekt je tón, zo při sportowanju stajnje něšto dožiwješ.
Sibirske temperatury minjeny tydźeń ćehnjechu nas na lód. Tak smy tydźenja cyłe popołdnjo na Kamjentnym haće za čornym pukom honili. Lód bě jara kruty a nimale tak hładki kaž w hali – perfektne to wobstejnosće. Puk pak bě tak spěšny, zo so hač do rohodźe na kromje suny a so tam chowaše. Runje na tych městnach pak bě lód přećeńki a tuž móžno njebě jón tam zaso wotewzać. Mandźelska sobuhrajerja wšak měnješe, zo so jej to poradźi. A woprawdźe. Móžachmy bórze zaso lodohokej hrać, ale hakle po tym zo bě wona cyle přemokana z lódzymneho hata wulězła. Na tym městnje hišće raz wutrobny dźak za angažowane zasadźenje a runočasnje wuběrnu show.
Widźał, słyšał, napisał (12.02.18)
Awtor dźensa
André Strelow
Zhromadźizna sudnikow wotmě so kónc januara w Němskich Pazlicach, kotřiž hwizdaja hry we wokrjesnej wyšej lize Zapadołužiskeho koparskeho zwjazka abo chcedźa to přichodny čas wyše činić. Tež wobkedźbowarjo refereejow běchu přitomni. Ronny Martick a Marc Oliver Löw pokazaštaj jim nimale tři hodźiny trajace specielne na sudnikow wusměrjene zwučowanja.
Widźał, słyšał, napisał (29.01.18)
Kónc lěta je cyle wěsće nimale kóždy sportowc wo wukonach w swojej družinje přemyslował. Kóždy chce wšak wědźeć, hač su so nałožene mocy a wudawki zadanili. Tajka bilanca wuspěchow aktiwnych běharjow po srjedźnych a dołhich čarach w minjenej sezonje 2017 we wobłuku doskónčneho zaměstnjenja, wuhódnoćenja a mytowanja hłowneju rjadneju lisćinow našeju Łužicow, Wopačanskeho cupa běharjow a Łužiskeje běhanskeje serije kaž tež Drježdźanskeje wobwodneje serije, je zrealizowana. Poslednje lońše hódnoćenske wubědźowanje za Wopačanski cup kaž tež za Drježdźansku seriju běše 17. Biskopičanski Butrowohórski běh w septembru, a za Łužisku seriju běše to 39. Oberlichtenauski silwesterski běh.
Widźał, słyšał, napisał (08.01.18)
Jutře za měsac je tak daloko. W južnokorejskim Pyeonchangu zahaja so 23. olympiske hry w zymskich disciplinach. Kóžde štyri lěta zetkawaja so sportowcy z cyłeho swěta, zo bychu mocy měrili. A nimale kóždy, kiž je tónle podawk jako wobdźělnik dožiwił, drje wobhladuje to jako wjeršk swojeho ćěłozwučowanskeho wuwića.
Južna Koreja tele zymske hry prěni raz wuhotuje. Lětnju olympiadu wšak je hižo 1988 organizować směła.
Nětko potajkim Zymske olympiske hry w Južnej Koreji. Dwójce bě wony region ze 44 000 wobydlerjemi hižo kandidował a zwrěšćił, a to w lětomaj 2010 a 2014. Kónčina, kotrejež mjeno móžeš do serbšćiny přełožić z „Měr a wuspěch“, dyrbješe so kanadiskemu Vancouverej resp. ruskemu Sočijej kłonić. Nětko pak přesadźichu so požadarjo z prowincy w horinach Taebaek chětro jasnje přećiwo francoskemu Annecy a „našemu“ Mnichowej.
Widźał, słyšał, napisał (27.12.17)
W zymje volleyball hrać? Haj, to je w kóždej sportowni móžno. A što je z beachvolleyballom? Ně, je dźě přezyma, a často mjerznje! Mam pak něšto noweho za was: snowvolleyball. Mysliće-li runje na krótke cholowy, pěsk a wysoke temperatury, móžeće to hnydom zabyć. Tu su volleyballisća ćopłu sportowu drastu woblečeni a hraja w sněze. Nimo toho maja koparske črije wobute.
Snowvolleyball je wosebita warianta volleyballa, při kotrejž je hrajnišćo w sněze. Regularije wotpowěduja tym beachvolleyballa. Snowvolleyballowa hra pak wotměwa so na wysokosći něhdźe 2 000 metrow. Snowvolleyball njeje žana wunamakanka z Němskeje. Wuwili běchu tule sportowu družinu w lěće 2009 w awstriskim Wagrainu. Po wjacorych turněrach w Alpach připózna awstriski volleyballowy zwjazk 7. nowembra 2011 snowvolleyball jako oficialnu sportowu družinu. Před lětomaj bě tak daloko, zo je ju Europske volleyballowe zjednoćenstwo (CEV) oficialnje do programa přiwzało. Wotnětka buchu turněry pod hesłom Snow Volleyball European Tour přewjedźene.
