Wot kolegow a přećelow dóstach ke kulowatym narodninam surfowanski kurs darjeny. Srjedź septembra běše skónčnje tak daloko. Podachmy so do italskeho Torbole. Po zapokazanju so prašach, hač to docyła zmištruju. Po tym zo bě nam wučer surfowanje z wětřikom teoretisce wujasnił, stejach krótki čas pozdźišo na wodźe a móžach posrědkowane informacije nałožować. Započatk běše chětro ćežki. Po njeličomnych čarach a padanjach do wody čujach so dale a wěsćiši. Po třoch dnjach smalach po jězoru ze začućom dospołneje swobody. Kóždemu zajimcej móžu jenož poručić, so tež raz w tutej sportowej družinje wuspytać.

Awtor dźensa

Jan Macka

Lubi sportowcy, je zaso čas domchowanki a kermušow. Rjane słónčne wjedro je nam hišće tu abo tamnu překwapjenku kónc tydźenja w kopańcy wobradźiło. Kaž w medijach čitamy, wjetše a mjeńše mustwa nětko hižo bilancuja, što su prawje abo wopak činili. Mnozy pak so prosće takle zwuraznjeja: „Pola nas lětsa wulkotnje běži.“ abo „To sy hižo po prěnjej hrě spóznał, zo so ćežko změja.“ abo „Pola nas zaso njedosaha.“

Moje postupne mustwa, kotrež sym minjene hrajne lěto na lisćinje měł, chcu skrótka wobswěćić, a to z optimizmom na hišće dołhu hrajnu dobu. Pola RB Lipska njewidźu stracha, zo do krizy padnje. Start bě za nowačka w 1. zwjazkowej lize optimalny. Wosebje dobyće přećiwo Dortmundej je jemu dalšich fanow wobradźiło a z 1:1 nětko pola 1. FC Köln je w načolnej skupinje zaměstnjeny. To same zdaše tež za Dynamo Drježdźany móžno być, tola přěhraty derby doma přećiwo Aue a poražka w Kaiserslauternje woznamjenja jenož srjedźne městno, štož nikoho z nas tak prawje njezwjesela. Tež wčerawše 2:2 přećiwo Würzburgej nic.

Jako aktiwneho běharja přez wjac hač šěsć lětdźesatkow zajimuje mje wosebje lochkoatletika. A tak sym sej tež we wusyłanjach telewizije wo njedawnych 28. olympiskich lětnich hrach w Rio de Janeiru předewšěm wurisanja w tejle sportowej družinje wobhladał. A tam mje najbóle mjetanje hlebije jima. Hdyž widźu wysoko na njebju lětadło lećeć, kotrež ćehnje za sobu kondensacisku smuhu, da mam stajnje gracilnosć lěta tajkeje hlebije před wočomaj. A z tajkej gracilnosću a jara daloko lećeše na olympiadźe tež hlebija olympiskeho dobyćerja Thomasa Röhlera z Jeny. Po wurjadnych 90,30 metrach zaštapi wona do trawnika. Přewšo sympatiski 24lětny lochkoatlet bě před štwórć lětom tónle nastroj w finskim měsće Turku samo hižo 91,28 metrow daloko ćisnył, štož je rekord lěta.

Awtor dźensa

Stefan Šmit

Dwě dobyći a dwaj remisaj. W sumje wučinja to wosom dypkow. K tomu maja koparjo Dynama Drježdźany nětko wrotowy poměr 6:3. Za tónle dotal wuběrny wukony steja woni po wčerawšim štwórtym hrajnym dnju na 2. městnje druheje zwjazkoweje koparskeje ligi. Štó z nas bě sej tole na spočatku sezony myslił, wšako njebě zazběhowy program za Dynamo docyła tak lochki. Jako prěni přijědźechu koparjo z Nürnberga. Tydźeń na to wobstachu Dynamowcy suwerenje před wulkotnej kulisu pola Union Berlina. W prěnim kole DFB-pokala porazychu samo­ prěnjeho ligista RB Lipsk. Nimale samsna bě atmosfera před tydźenjomaj, jako bě kultowe mustwo St. Pauli w Drježdźanach. Runja RB Lipskej dyrbješe so mustwo z Hamburga bjez dypka na domojjězbu nastajić. A nětko 2:0 za Dynamo w Hannoveru!