Hižo w nowembrje su so zastupjerjo jednotliwych towarstwow zetkali, kiž hraja we wólnočasnej koparskej lize Zapadołužiskeho koparskeho zwjazka, zo bychu sezonu 2024 wuhódnoćili a so zdobom na nowu hrajnu dobu přihotowali. Hač do kónca lěta dyrbjachu so towarstwa rozsudźić, hač jich mustwo na wulkim abo na małym hrajnišću nastupi. Zdobom mějachu tež móžnosć, so za pokalne wurisanje přizjewić.

We wokrjesnym pokalnym kole nastupi kaž zwučene mustwo Sokoła Ralbicy/Hórki. Prěni raz wobdźěli so lětsa hrajne zjednoćenstwo SJ Chrósćicy/Zeleno-běli Hórki. Nowačk měri swoje mocy 21. měrca z TSV Wachauom. Sokoljo maja zdobom domjacu lěpšinu, hdyž nastupja přećiwo Hermsdorfej.