Ralbicy (SN). Mjeztym druhi króć zarjaduje Ralbičanska wyša šula powołanske wiki. Wutoru, 1. oktobra, wot 9.30 hodź. su šulerjo, starši a zajimcy do delanskeho kubłanišća přeprošeni. Něhdźe 50 wukubłanskich zawodow, kotrež pochadźeja z Ralbic abo wokoliny, so tam ze swojimi poskitkami prezentuje. Mjez nimi su tohorunja serbske institucije a zawody, na přikład Ludowe nakładnistwo Domowina z Budyšina. A wězo je tam tež ramikowy program předwidźany. Wotrjad za powołanske poradźowanje Budyskeje agentury za dźěło přeprosy na přednošk „Powołanske puće po wotzamknjenju na wyšej šuli“. Radworske předewzaće za zamóženske poradźowanje Franka Lehdera přednošuje na temu financy. Astro­centrum Łužica předstaji zajimcam aktualne wuwiće slědźerskeho centruma we Łužicy. Tež wučomnicy, kotřiž skutkuja jako posoljo Drježdźanskeje industrijneje a wikowanskeje komory, chcedźa w Ralbicach wo dualnym powołanskim wukubłanju rozprawjeć.