Regionalna konferenca so z Hornjołužiskej holu a hatami zaběrała

Pančicy-Kukow (CS/SN). Při Baltiskim morju maja sej turistikarjo lochko bydlenja zajimcam přenajeć. Poskićowarjam dowolowych bydlenjow w Hornjej Łužicy a předewšěm w krajinje Hornjołužiskeje hole a hatow je tole ćešo. Jich nazhonjenja wotbłyšćuja: Běchu turisća jónu tu, běchu zahorjeni, nawróćeja so a kónčinu dale poručeja. Na regionalnej konferency Hornjołužiska hola a haty (OHTL) wčera w Pančičanskim klóštrje Marijina hwězda, kotruž je Rakečanski regionalny běrow zarjadował, zastupjerjo před wjesnjanostami kónčiny a turistiskimi poskićowarjemi wo swojich aktiwitach rozprawjachu. We wobłuku Leaderoweje wuwićoweje strategije je turizm jedne z wosom wobłukow jednanja. Při tym dźe na jednym boku wo wuwiće turistiskich poskitkow we wjesnych kónčinach a na tamnym boku wo dalewuwiće poskitkow za přenocowanje. W prěnim wobłuku mjenowaše so jako přikład muzej we Łomsku, hdźež su ratarske mašiny wustajene. Muzej priwatnik wjedźe.