W Budyskim studiju LUCIJA dźěłaja tuchwilu na njewšědnym projekće

Budyšin (SN/lmc). Tuchwilu namakaće na stronje www.lucija.de digitalne prezentacije najwšelakorišich serbskich muzejow, na přikład Serbskeju muzejow w Budyšinje a w Choćebuzu.

Po nazymskich prózdninach namakaće tam tež prěnju wirtuelnu třidimensionalnu wersiju muzeja Měrćina Nowaka-Njechorńskeho. Na tutej dźěła Worklečan šuler 10. lětnika Kilian Bjarš pod nawodom Michała Cyža wot minjeneje póndźele w Budyskim Serbskim domje. Rozsudny techniski nastroj w projekće su nawoči za wirtualnu realitu (VR). Šuler 10. lětnika je so hižo někotryžkuli raz na medijowej dźěłarničce Skawtow wobdźělił. Tuchwilu je w prózdninskim dźěle w studiju LUCIJA. „Wosebje lubi so mi dźěło z VR-nawočemi – to je hinaši swět hač na wobrazowce. Z nimi mam mjenujcy móžnosć, mnoho městnow na swěće, kotrež mi hewak přistupne njejsu, wirtuelnje wopytać“, rozłoži Kilian Bjarš fascinowany.