Domizniske towarstwo Radiška ­eksistuje wot lěta 1998. Minjeny pjatk su so čłonojo towarstwa w hosćencu „K dobrej naledźe“ w Lemišowje na hłownu zhromadźiznu zešli.

Stróža (SK/SN). „Smy sej wjele předewzali, smy tež wjele docpěli“, je předsydka domizniskeho towarstwa Radiška Jana Pětrowa, na hłownej zhromadźiznje ­zwěsćiła. Hłowny zaměr towarstwa je, zdźerženje a šěrjenje serbskeho kulturneho žiwjenja kołowokoło wjeskow Stróže a Lemišowa na kromje łužiskeje hole. Mjeztym je wone jako sobuwuhotowar němsko-serbskich wikow přirody tež zwonka hranicow Malešanskeje gmejny znate.

Towarstwo stara so nětko tež wo kulturne dźěło we wsy samej. Dohromady třinaće zarjadowanjow za wjesnjanow organizowachu loni. Mjez druhim je wjesnjanka wo swojej dobrowólnej słužbje w afriskej Tansaniji rozprawjała. Tež přednošk wo po cyłej Europje znatym serbskim pčołarju a fararju Hadamje ­Bohuchwałje Šěrachu z bliskeho Budyšinka abo cyłodnjowski poskitk za dźěći 3. lětnikow w šulskim muzeju je towarstwo planowało.