Gmejna Halštrowska Hola wustawki za wobtwarjenski plan wobzamknyła

Lejno (AK/SN). Na 31,2 hektaraj wulkej přestrjeni chce gmejna Halštrowska ­hola nowy solarny park natwarić. Tuchwilu ratarsce wužiwany areal leži w gmejnskim dźělu Nowa Łuka, blisko přemysłownišća při Lejnjanskej dróze. Radźićeljo gmejny Halštrowska hola su minjeny tydźeń zakład za to na swojim posedźenju tworili: Jednohłósnje su wustawki za wotpowědny wobtwarjenski plan wobzamknyli.

„Bližimy so ke kóncej procesa schwalenja wobtwarjenskeho plana. Dohromady dwaj stej nam předležałoj. Aktualnje měnjenja a stejnišća na to pokazuja, zo nas nowe ćeže njewočakuja“, praji Heidrun Eger, kotraž je za naležnosć ­zamołwita sobudźěłaćerka twarskeho zarjada. Wobtwarjenski plan je wuměnjenje za natwar a wobhospodarjenje fotowoltaikoweje připrawy kaž tež trěbnych pódlanskich připrawow. „Při tym smy přirodoškitne a lěsniske aspekty, ale tež aspekty regionalneho planowanja a wurunanskich płoninow sobu wobkedźbowali“, wona wuzběhny.