W Njeswačidle maja wotměnjawy poskitk regionalnych produktow

Njeswačidło (SN/MiR). Poskitk regionalnych produktow w nakupowanišćach přiběra. To njerěka, zo je jich w kóždym padźe po ličbje wjace. Skerje so z pomocu wabjenja sylnišo na nje skedźbnja. K tomu słuša mjez druhim optimalne městno we wulkim předawanišću, hdźež je samoposłužowanje samozrozumliwe.

W Njeswačidle skedźbnjeja wědomje ze serbsko-němskimi napisami na wosebite stejnišćo předawanišća a na poskitki. Za regionalne produkty su tam samo ekstra rumnosć zarjadowali. Tam so předewzaća, zdźěla wulke, ale tež małe, předstajeja. Paleta saha wot produktow z muki a zornjatkow přez mjaso, sad a zeleninu hač k mlokowym produktam a korjeninam. Woblubowane su tež jeja wot wokolnych plahowarjow kokošow a pocpulow.