Krótkopowěsće (26.09.18)
Hartmann na čole frakcije CDU
Drježdźany. Christian Hartmann je nowy předsyda frakcije CDU w Sakskim krajnym sejmje. Wón naslěduje Franka Kupfera, kiž bě zastojnstwo strowotniskich přičin dla złožił. 44lětny Hartmann je so z 32 k 24 hłosam přećiwo Geertej Mackenrothej přesadźił, kotrehož běštaj Kupfer a ministerski prezident Michael Kretschmer (CDU) namjetowałoj.
Chcedźa nakładnistwo rozšěrić
Berlin. Nakładnistwowa skupina Aufbau kupi Berlinske knižne předewzaće Ch. Links. Z akwizu chce so lěpje na přichod nastajić, rěka w zdźělence knižneho bursoweho zjednoćenstwa. Nakład Aufbau bě za čas NDR najwažniši zastupjer branše za nowu a mjezynarodnu literaturu. Mjez druhim publikowaše knihi Jean-Paula Sartreho a Franza Kafki kaž tež Kita Lorenca a Benedikta Dyrlicha.
SŠT nowy Staršiski list wudało
Krótkopowěsće (25.09.18)
Woda za Złokomorowski jězor
Zły Komorow. Złokomorowski jězor je tuchwilu přesunjenja pódy a niskeje wody dla zawrjeny. Nětko chcedźa jón z wodu pjelnić, kotruž bjeru z Lejnjanskeho, Parcowskeho a Nowołučanskeho jězora. Ze stupacym stawom wody ma so zdobom zaso geotechniska wěstota pohórnistwoweho jězora zaručić, kaž stej krajny hórniski zarjad a krajny wobswětowy zarjad Braniborskeje wčera zdźěliłoj.
Próstwy zapodać
Budyšin. Załožba za serbski lud na to skedźbnja, zo kónči so 30. septembra doba zapodaća projektowych próstwow za prěnje połlěto 2019. To potrjechi tež stipendije a spěchowanje wukubłanja za kubłarki/kubłarjow. W zdźělence załožby dale rěka, zo je najjednoriši puć, próstwy sčasom zapodać, wupjelnić formulary na jeje internetnej strony. Projektowa přirada na to wo doporučenjach wuradźuje.
Sněhakowarski wulkoareal
Krótkopowěsće (24.09.18)
Alternatiwne myto Nobela
Stockholm. Załožba Right Livelihood Award je po njej pomjenowane myto spožčiło. Tež jako alternatiwne myto Nobela znate wuznamjenjenje dóstanu ratar Yacouba Sawadoga z Burkina Faso a awstralski wědomostnik Tony Rinaudo kaž tež skupina wojowarjow za čłowjeske prawa w Saudi-Arabskej. Juristomaj Thelmje Aldanej und Ivanej Velásquezej z Guatemale přiznachu čestne myto.
Běłe tigry haj abo nic?
Liberec. Liberecski zwěrjenc měł plahowanje anomalnych běłych tigrow zakónčić. Tele zdźělenje nawody coowa Davida Nejedla je njewočakowano brizantnu reakciju wubudźiło. Mnozy wobydlerjo Libereca dźě maja tute wosebite zwěrjata jako wuznamny symbol města. Tež čłonojo a přiwisnicy městneho lodohokejoweho teama „Běłe tigry“ w datym zwisku swoju njespokojnosć wuprajichu.
Skupiny MENS wuradźowali
Krótkopowěsće (21.09.18)
Ochranowske hesła 2019 wušli
Budyšin. Ochranowske „Wšědne hesła“ su nětko dźewjatnaty raz w LND wušli. Čitaš za kóždy dźeń krótke, jadriwe hrono ze Stareho zakonja a dalše z Noweho zakonja. Runja SMSkam a twitterowym powěsćam su Ochranowske hesła tajke krótke powěsće, kotrež wot lěta 1731 do swěta sćelu. Knižka je znowa zhromadne wudaće ze Serbskim ewangelskim towarstwom, zestajał je ju Hinc Šołta.
Přichod hladanja rozjimali
Wojerecy. Nadrobnu syć z informacijemi wo hladanju chorych a starych w Budyskim wokrjesu je jeje koordinatorka Kerstin Janke na zarjadowanju žonjaceje unije CDU wčera we Wojerecach předstajiła. Nastupajo starosće a wužadanja hladanja w přichodźe rozestajachu so tam praktikarjo z přednoškom wotrjadnika sakskeho socialneho ministerstwa. Jako facit sformulowachu konkretne namjety politikarjam a chorobnym kasam.
Serbski přinošk nominowany
Krótkopowěsće (20.09.18)
Kniha z digitalnej komponentu
Budyšin. Druhi nakład w Ludowym nakładnistwje Domowina wušłeje knihi Madleny Nasticcyneje „Što tam łazy, běha, lěta“ budźe bórze na předań. Tele wudaće je prěnje kompatibelne z digitalnym słuchopisakom BOOKiijom nakładnistwa Tessloff. To rěka, wužiwar móže nimo zwučeneho wašnja předčitanja z knihi sej tež zwuki a rymy naposkać.
8. oktobra nowy termin
Budyšin. Wotprajene 21. posedźenje Budyskeho wokrjesneho sejmika z minjeneje póndźele z wurjadnym posedźenjom 8. oktobra nachwataja. Za to za 29. oktober planowane zeńdźenje wokrjesneho parlamenta njebudźe. Wo tym informowaše wčera Budyski krajnoradny zarjad. Njekorektneho wozjewjenja zjawneho přeprošenja dla bě zarjadnistwo 21. posedźenje wotprajiło.
Prapremjera bajkoweho filma
Krótkopowěsće (19.09.18)
Namołwa nowemu ministrej
Podstupim/Wjelcej. Krajny sejm Braniborskeje je dźensa noweho braniborskeho hospodarskeho ministra Jörga Steinbacha (njestronjan) spřisahał. Syć wot hórnistwa škodźenych sej nětko žada, zo zarjaduje Steinbach skónčnje wot swojeho předchadnika připowědźenu změrcownju za potrjechenych, kotřiž su škody z brunicoweho hórnistwa poćerpjeli. To zdźěli Wjelčanska měšćanska zapósłanča Hanelora Wodtke.
Nowa technika za železnicu
Berlin. Němska železniznica chce we wobłuku přestajenja swojeje syće na digitalnu techniku pjeć pilotowych projektow přewjesć. Jedyn tajki ma čara mjez Magdeburgom a Hórnikecami być. Tam wotpohladuja techniku zasadźić, kotraž zamóže kapacitu wo pjećinu zwyšić. Ćahi móhli tak časćišo jězdźić, kaž ze studije poradźowarnje McKinsey wuchadźa. To by železnicu chětro wolóžiło.
Wumjetowanja wotpokazali
Krótkopowěsće (18.09.18)
Štó wotpadki rumuje, nětko jasne
Budyšin. Budyski wokrjes je wčera z partnerskimi předewzaćemi podpisał dojednanje wo zběranju a rumowanju wotpadkow. Nimo hłowneju nadawkipřijimarjow Neru tzwr & Co. KG a Veolia su to Bóščanske Ryćerjec předewzaće za wotstronjenje wotpadkow a transport, HLD tzwr z Wojerec a Hornjołužiska towaršnosć za rumowanje wotpadkow z Bukec.
NSLDź na wopyće w Čěskej
Praha/Budyšin. Němsko-Serbske ludowe dźiwadło je wčera w Praze swoju inscenaciju „Wójna – Předstaj sej, wona by tu była“ pokazało. Na přeprošenje kontaktneho běrowa Sakskeje w čěskej stolicy předstajichu ju němčinu wuknjacym šulerjam. NSLDź bě we wobłuku swojeho kóždolětneho wulěta k čěskim susodam štwórty raz z hosćom w Praze, lětsa prěni króć z němskorěčnej hru.
Japanjan chce na měsačk lećeć
Krótkopowěsće (17.09.18)
Wustajeńca přećahnyła
Smochćicy. Wustajeńca „Heimat – Domizna. Katolscy Serbja w Hornjej Łužicy 1992–2017“ je nětko w Smochčanskim Domje biskopa Bena přistupna. Přehladka z wobrazami Andreasa Varnhorna, kiž bě wobydlerjow a wjesne žiwjenje krótko po přewróće portretował a někotrych protagonistow 25 lět po tym znowa fotografował, bě dotal w Budyskej Serbskej kulturnej informaciji widźeć.
Nazymske chórowe spěwanje
Budyšin. Cyłkownje pjeć chórow a instrumentalisća su sobotu 24. nazymske chórowe spěwanje wuhotowali. Při měšćanskim nasypje, w awli Schilleroweho gymnazija a w tachantskej cyrkwi, kotraž bě z hudźbnym nyšporom prěni raz hrajnišćo zarjadowanja, wustupichu mjez druhim chór Budyšin, tudyši Schubertowy chór a wokalny ansambl swj. Pětra.
Počesća čestnohamtskosć
Krótkopowěsće (14.09.18)
Dźěle kupy zesunjene
Zły Komorow. Dźěle njezawěsćeneje kupy w Złokomorowskim jězoru su so wčera do wody zesunyli, z čehož nasta poł metra wysoka žołma, kaž hórnistwowe saněrowanske předewzaće LMBV wobkrući. Nichtó njebu zranjeny. Podawk sta so w zawrjenym wobłuku, kotryž je z bojemi markěrowany. Přičiny zesunjenja fachowcy nětko přepytuja.
Wubědźowanje dobyli
Podstupim/Dešno. Lětuše, mjeztym 10. krajne wubědźowanje „Naša wjes ma přichod“ je delnjołužiske Dešno dobyło, kaž ministerstwo za wjesne wuwiće, wobswět a ratarstwo Braniborskeje wčera w Podstupimje zdźěli. Wjesny dźěl gmejny Dešno-Strjažow je we wšěch wobłukach jako „woblubowane bydlišćo a wulětny cil“ runje tak přeswědčił kaž jako „baćonjaca a muzejowa wjes“. Za to dóstanje myto 10 000 eurow.
Mějićelow psow pruwować
Krótkopowěsće (13.09.18)
Frank Kupfer wotstupi
Drježdźany. Předsyda frakcije CDU w Sakskim krajnym sejmje Frank Kupfer zastojnstwo złoži a njebudźe za klětuše wólby krajneho sejma hižo kandidować. Wo tym je dźensa čłonow frakcije a medije informował. Hłowna přičina su wospjet jewjace so depresije, kotrež jemu mocy rubja, kaž 56lětny sam w stejišću pisa. Mandat zapósłanca chce Kupfer hač k wólbam dale wukonjeć.
Lěsny woheń pod kontrolu
Sepicy. Znowa rozpłomjenjeny lěsny woheń w Kinsporskej holi je po informacijach powěsćernje dpa pod kontrolu. Wjace hač sto wohnjowych wobornikow bě wčera zasadźenych. Dźensa chcychu dale hašeć. Woheń bě minjeny štwórtk wudyrił a něhdźe 140 hektarow – w rozhłosu MDR je samo wo 260 hektarach rěč – lěsneje płoniny zničił. Policija zapalerstwo njewuzamkuje.
Rěčny kurs čěšćiny RCW
