Policija (12.09.22)
Njezbožo njewjedra dla
Nowe Bóšicy. Na statnej dróze S11 je pjatk popołdnju njedaloko Nowych Bóšic šoferka wosoboweho awta marki Opel na prawy bok z jězdneje jěła. Na to so jězdźidło přewali a awto wosta na třěše ležo. Čłonojo wohnjoweje wobory su žonu wuswobodźili. Na to dyrbjachu ju do chorownje dowjezć. Dróha běše něhdźe hodźinu za wobchad zawrjena.
Policija (09.09.22)
Škleńcy z bydlenja mjetał
Wojerecy. Njemało dźiwali su so pasanća předwčerawšim rano na Škodowskej dróze we Wojerecach. Z woknom bydlenja mjetaše něhdźe w 6.30 hodź. něchtó bleše a škleńcy na puć. Po wšěm zdaću pak so při tym nichtó z nimo ducych zranił njeje. Kaž Zhorjelska policajska direkcija rozprawja, měješe 35lětny mějićel bydlenja najskerje psychiske problemy. Policisća Wojerowskeho rewěra zakročichu a wołachu lěkarja k pomocy. Tón zapokaza młodeho muža k dalšemu wobkedźbowanju do chorownje. Hromadu črjopow před bydlenskim domom zrumowachu. Přećiwo mužej přepytuja nětko strašneho zapřimnjenja do nadróžneho wobchada dla.
Policija (07.09.22)
Pjenjezy pokradnyć chcył
Wudwor. Dwě kaseće z pjenjezami je njeznaty předwčerawšim dopołdnja we Wudworju z jednoswójbneho domu pokradnył. Swědk je jeho při wopušćenju domu wobkedźbował. Dalši swědk myleše připołdnju skućićela w bliskosći, jako chcyše kaseće wočinić. Njeznaty ćekny w awće z madźarskim čisłom do směra na awtodróhu A 4 a wostaji kaseće ležo. Štóž je dalše nadrobnosće wobkedźbował, njech so pola policije přizjewi.
Policija (06.09.22)
Kolesowar a motorski znjezbožiłoj
Hamor. Při wobchadnym njezbožu předwčerawšim w Hamorje je so kolesowar ćežko zranił. 65lětny přeprěči ze swojim e-bikeom zwjazkowu dróhu B 156, njeje pak předjězbu motorskeho wobkedźbował. 49lětny wodźer Kawasaki so snadnje zrani. Wuchowanske mocy so wo znjezboženeju starachu. Kolesowarja dowjezechu z helikopterom do chorownje.
Policija (05.09.22)
Ćeknył a znjezbožił
Słona Boršć. Bjez zapłaćenja tankował je sobotu popołdnju pólski wodźer Opela při awtodróze A 4 pola Słoneje Boršće. Hnydom alarmowana policija chcyše jeho pola Zhorjelca zadźeržeć. Muž so najprjedy wuwiny, na to pak znjezboži. Pozdźišo so wukopa, zo bu awto w nocy na sobotu w Durinskej pokradnjene.
Policija (02.09.22)
Znowa wobšudźili
Běła Woda. Z trikom su njeznaći předwčerawšim w Běłej Wodźe 64lětneho muža wobšudźili a jemu jeho nalutowane pjenjezy wulišćili. Skućićeljo so přez powěsćowu słužbu jako mužowa dźowka wudawachu, kotraž pječa nuznje pjenjezy trjeba. Na to wón 6 000 eurow přepokaza. Hakle pozdźišo pytny, zo je so z woporom wobšudnikow stał.
Policija (01.09.22)
Při płoće wisajo wostała
Dźěwin. Njekedźbliwosće dla bu předwčerawšim kolesowarka w Dźěwinje snadnje zranjena. 37lětna bě na chódniku Wjesneje dróhi do směra na Brězowku po puću, jako při płoće ležownosće wisajo wosta. Na to žona padny a so zrani. Jeje koleso suny so na jězdnju, hdźež runje w tym wokomiku traktor přijědźe a přez koleso zajědźe. Škoda wučinja něhdźe 600 eurow.
Łastojčku pokradnyli
Bambruch. Mopedy z časa NDR su po wšěm zdaću dale jara požadane, bohužel tež mjez paduchami. Tak je něchtó w rańšich hodźinach minjeneje wutory Łastojčku w Bambruchu pokradnył. Antracitowy Simson bě po informacijach policije něhdźe 3 000 eurow hódny. Policija nětko za paduchom pyta.
Policija (31.08.22)
Diesel wotklumpali
Słona Boršć. Prjedy hač so ćěriwa wot jutřišeho při tankownjach drje zaso podróša, su so njeznaći minjeny kónc tydźenja w Słonej Boršći na cyle hinaše wašnje z nimi zastarali. Woni podachu so na teren firmy při Słonoboršćanskej dróze a wotklumpachu z bagra, nakładowaka a dumpera dohromady něhdźe tysac litrow diesela. Kaž Zhorjelska policajska direkcija zdźěli, nasta potrjechenej firmje škoda něhdźe 2 100 eurow.
Padustwo zwrěšćiło
Wojerecy. Ze zadnjeho dwora na Wojerowskej Liebknechtowej chcychu njeznaći minjene dny elektroroler pokradnyć, štož pak so poradźiło njeje. Kaž dyrbješe wobsedźer předwčerawšim zwěsćić, bě zamk jězdźidła manipulowany, tak zo njehodźeše so wone hižo z klučom zaswěćić. Škoda wučinja 300 eurow.
Policija (30.08.22)
Koleso a telefon sej hrabnył
Němcy. Pječa dołha dla je sej 29lětny muž minjenu sobotu handy a koleso přiswojił. Na parkowanišću Wojerowskeje kupnicy wón najprjedy 25lětnemu do hrudźe dyri a sej na to jeho 450 eurow drohi mobilny telefon k sebi storhny. Na to poda so do Němcow a wza sej tam hórske koleso typa Cube 52lětneho wobydlerja. Wone bě něhdźe 250 eurow hódne. Z woběmaj padomaj so nětko Wojerowski policajski rewěr zaběra.
Policija (29.08.22)
We wulkim stilu kradnyli
Słona Boršć. Dobry čuch mějachu policisća sobotu nawječor při awtodróhowym wotpočnišću „Hornja Łužica“ pola Słoneje Boršće, jako transporter z litawskim čisłom kontrolowachu. W jězdźidle bě mjenujcy 44 drohich kolesow. Dale ležachu tam wšelake kolesowe dźěle kaž tež škitna drasta. Zwotkel šofer wšo to měješe, wón zastojnikam plawsibelnje rozkłasć njemóžeše. Na někotrych kolesach wuhladachu policisća samo hišće originalne předawanske etikety. Kaž so při dalšim přepytowanju wukopa pochadźachu transportowane twory z padustwa w Awstriskej. Rubizna bě dohromady něhdźe 250 000 eurow hódna, kaž Zhorjelska policajska direkcija zdźěli. 38lětneho šofera nachwilnje zajachu. Hromadźe z awstriskej policiju tónle pad njewšědneho padustwa dale přepytuja.
