W nowych rumnosćach maja nětko lěpše wuměnjenja
Budyšin (CS/SN). Nowe rumnosće móže wot minjeneho pjatka Budyska socialna stacija Carity wužiwać. Po saněrowanju tak mjenowaneho zwóńkoweho domu na Cyrkwinskim naměsće maja tam nětko za poradźowanje samodruhich žonow, migrantow a dalšich wjace městna. Dom je z dotalnym twarjenjom Carity zwjazany a je tež jeno přez njón přistupny. W přizemju zatwarichu nuzniki, kotrež móža kemšerjo susodneje cyrkwje Našeje lubeje knjenje wužiwać, za čož připrawichu separatny přistup.
Wobnowjenje traješe něšto měsacow dlěje hač planowane. Poprawom měješe dom hižo w lěću hotowy być. Wšitko pak so dliješe, dokelž běštej twar w hišće špatnišim stawje hač wočakowane a třěcha dospołnje dodźeržana. W swojej dźensnišej formje bě dom wokoło lěta 1800 nastał. W nim wužiwaše cyrkej dwě bydleni, jedne hač do 1990tych lět za zwóńka Serbskeje cyrkwje. Pozdźišo zwučowaše tu šulerska kapała. Na kóncu bě dom tójšto lět prózdny. Farar Wito Sćapan je jón pjatk požohnował, wo hudźbne wobrubjenje postaraštaj so Friedemann Böhme a Karl-Heinrich Starke.
Z ćěkancami kemše swjećili
Budyska wosada Jozuwy w NSLDź njezapomnite hody organizowała
Budyšin (SN/mwe). Wjace hač 450 ćěkancow z cyłeho Budyskeho wokrjesa, mnozy měšćenjo a hosćo z wokolnych wsow su 25. decembra do Budyskeho NSLDź přichwatali, zo bychu tam zhromadnje hodowne kemše swjećili. Přeprosyła je jich Budyska swobodna ewangelska wosada Jozuwy, kotraž hižo lěta jako powšitkownowužitne towarstwo w sprjewinym měsće skutkuje a kotrejež zakład twori ewangelske wěrywuznaće.
Hižo loni bě wosada w Budyskim Sprjewinym hotelu, hdźež su ćěkancy zaměstnjeni, tajku nutrnosć zarjadowała. Farar Clemens Mudrik Serbskim Nowinam praji, zo chcychu z lětušim hodownym zarjadowanjom, kotrež mjenowachu „Joy to the world – Radosć swětej“, zaměraj zwjazać. „Chcemy w Budyšinje witansku kulturu zesylnić, na čimž móža so wobydlerjo aktiwnje wobdźělić. Zdruha chcemy ćěkancam zbližić, čehodla hody swjećimy“, farar Mudrik podšmórny. Tole je wón mjez druhim tež w prědowanju prajił. Hesło rěkaše: „Bóh čini so mały a přińdźe jako čłowjek na swět, zo by nas přewodźał.
Pomoc nadal njeparujomna
Kamjenc (IŠ/SN). Spomóžnu wočerstwjensku akciju za 21 dźěći a dwě přewodnicy, pochadźace z Buda-Košeljowskeho regiona, kaž tež za 20 na diabetes schorjenych dźěći a pjeć přewodnicow z regiona wokoło Minska je Kamjenska iniciatiwa Dźěći z Černobyla lětsa přewjedła. Na te wašnje dźěćom zmóžnichu, so w strowym wobswěće nowych mocow nasrěbać respektiwnje ze swojej chorosću prawje wobchadźeć nawuknyć. Tole běše jenož móžno dźakowano wulkomyslnym pjenježnym a wěcnym daram firmow, wosadow, institucijow a priwatnych wosobow, kiž su po swojich mocach akciju podpěrali. Za to so towarstwo wutrobnje dźakuje, zdźěli jeho předsydka Christina Zickler.
Zhromadnje poprjančki pjekli
Serbske, němske a łaćonske hodowne spěwy je wčera Chróšćanski ...
Za mnohe dźěći prěnje zetkanje z hodami
Budyšin (SK/SN). Mjezynarodna atmosfera knježeše zawčerawšim na adwentničce w Budyskim Serbskim domje. Pjaty raz wotmě so wot Mjezynarodneho europskeho kluba, towarstwa Majak a Budyskeje tafle přihotowane dohodowne zarjadowanje za dźěći wosebiteho razu.
Žurla bě z wjace hač sto dźěćimi a swójbami kopata połna. Zapósłanc krajneho sejma Hajko Kozel (Lěwica) a předsydka towarstwa Majak Natalja Deis witaštaj tež hosći z třoch domow za požadarjow azyla kaž tohorunja němske a serbske dźěći z Budyšina.
Dźiwadłowa skupina Majak předstaji pod režiserom Götzom Schweighöferom hru „Pod jednym pokrywom“. Tež serbsce rěčacy rumpodich měješe za kóžde dźěćo mały dar ze słódkosćemi. Nimo toho wobradźi šćedriwa loterija „Kóždy los dobudźe“ prawu dohodownu napjatosć. Mnozy darićeljo z wobydlerstwa, młodźinska wohnjowa wobora Dobruša/Huska a kupnica Wuchod Torstena Funki běchu k njej přinošowali.
Z wutrobu na prawym městnje
Wojerecy (UH/SN). Za nadpřerězny čestnohamtski angažement su minjeny pjatk we Wojerecach tamnišu ambulantnu hospicnu słužbu z Čestnej jehłu Güntera Petersa wuznamjenili. Lětsa njejsu so za jednotliwu wosobinu rozsudźili, ale na namjet frakcije CDU měšćanskeje rady za Wojerowsku ambulantnu hospicnu słužbu a tak prěni raz za organizaciju. Sabine Mischner, Lydia Tietz a Jolante Wörfel běchu prěni iniciatorojo, kotřiž so tomule nadawkej wěnowachu. Wažni partnerojo su dźensa domjacy lěkarjo a Wojerowski klinikum łužiskeje jězoriny.
Wjace městna za wobšěrny poskitk wobchoda
Pančicy-Kukow (SN/MWj). We wobchodźe klóštra Marijineje hwězdy w Pančicach-Kukowje su sobotu nowe rumnosće požohnowali a za wužiwanje přepodali. Tole bě sobu wjeršk noweje formy adwentnych wikow. Tajke je wobchod tež hižo minjene lěta přewjedł, tónraz su je na klóštersku bróžnju rozšěrili.
W powjetšenych rumnosćach ma klóšterski wobchod nětko wjace městna, swój wobšěrny sortiment předstajić. „Dotal bě tu chětro połne. Nětko je za naš poskitk wjace městna, tak zo móže sej tule tež mać z dźěćacym wozyčkom abo starši čłowjek z rolatorom wšitko woměrje wobhladać“, rozłoži nawodnica wobchoda Karina Čižankowa. Za to su swoju informacisku rumnosć trochu pomjeńšili a tam swój skład a mały běrow zarjadowali. Pjatk a sobotu je so tójšto zajimcow po wobchodźe rozhladowało. Nimo róžowcow, křižow, swjećatkow, protykow a dalšich nabožnych tworow poskićeja tam najwšelakoriše knihi – tež serbske – kaž tohorunja wuběrne wot klóšterskich knježnow zhotowjene likery.
Wotewrjene durje hižo pjatk
Minjene lěta bě sobota do prěnjeho adwenta kruty termin za dźeń wotewrjenych duri w dźěłarnjach za zbrašenych swj. Michała w PančicachKukowje. Lětsa přewjedu tónle dźeń, zwjazany z adwentnymi wikami, hižo jutře, pjatk. To ma swoju přičinu.
Pančicy-Kukow (SN/MWj). Z nowym nawodnistwom w dźěłarnjach za zbrašenych swj. Michała w Pančicach-Kukowje wuwiwaja tam nowe ideje. Jedna tajka je, zo swój kóždolětny dźeń wotewrjenych duri do prěnjeho adwenta sobotu njepřewjedu, ale hižo pjatk, a to wot 9 do 18 hodź. „Tak móža wopytowarjo wšědny dźeń dźěłacych kaž tež přistajenych dožiwić, štož dotal sobotu w tej měrje móžno njebě“, rozłožuje nawoda zarjadnišća Handrij Ošika. Po zwučenym wašnju pak změja tež jutře w kreatiwnym wobłuku małe wiki přihotowane, na kotrymž poskića mjez druhim w dźěłarnjach nastate adwentne debjenki.
