„Widźomna mnohotnosć“
Smochćicy. Hišće hač do 30. septembra móžeće sej w Smochčanskim kubłanišću swj. Bena wustajeńcu wo nabožinach w Sakskej wobhladać a to w tamnišej cyrkwi w bróžni. Nimo časa kemšow je wona wšědnje wot 8 do 18 hodź. přistupna. Zastup je darmotny. Pod titulom „Widźomna mnohotnosć“ znazornja wona na přikładźe wosom nabožnych zhromadźenstwow mnohotnosć nabožinow w Sakskej. Fokus leži při tym na wosobinskim žiwjenju z wěru. To na zakładźe interviewow, fotow a widejow dokumentuja.
Kermuša w Hodźiju
Hodźij. Gmejna Hodźij woswjeći přichodny kónc tydźenja swoju kermušu. Na swjedźenišću je za to stan natwariła. Sobotu, 14. septembra, je dźeń towarstwow. Towarstwa gmejny zabawjeja was wot 11 do 18 hodź. z pisanym programom. Tež Domowina wobdźěli so ze stejnišćom při gmejnskim zarjedźe. Njedźelu woswjeći so w 9.30 hodź. swjatočna Boža mša w Hodźijskej cyrkwi swjateju Pětra a Pawoła. W 11 hodź. zahraja Bošečanscy dujerjo k rańšemu piwku w swjedźenskim stanje. Popołdnju maja tam mjez druhim tež šulerjo Zakładneje šule Hodźij swój wulki wustup.
Filmowy wječor
Zarjadniski zwjazk přeproša
Pančicy-Kukow. Zarjadniski zwjazk „Při Klóšterskej wodźe“ přeprošuje na zjawnu zhromadźiznu, kotraž wotměje so wutoru, 17. septembra, w sydarni zarjadniskeho zwjazka na Póštowej 8 w Pančicach-Kukowje.
Winkler wustaja
Běła Woda. „Dazwischen und weiter ...“ rěka „wobšěrna personalna wustajeńca z pastelemi, kolažemi, asemblažemi a objektami“ Choćebuskeje wuměłče Bettiny Winkler, kotraž je wot njedźele hač do 22. nowembra w Běłowodźanskej ludowej uniwersiće Třikrajowy róžk přistupna. Wernisaža z wustajowacej wuměłču a muzikaliskim wobrubjenom šulerkow a šulerjow Wokrjesneje hudźbneje šule Třikrajowy róžk započnje so w 16 hodź.
W hrodźišću so swjeći!
Gmejnska rada w Radworju
Radwor. Radworska wjesnjanostka Madeleine Rynčowa přeprošuje na zjawne posedźenje gmejnskeje rady a to srjedu, 11. septembra, we 18.30 hodź. do jědźernje Serbskeje zakładneje a wyšeje šule na Grólmusowej 3 w Radworju.
Dźeń zjawneho warnowanja
Budyšin. Štwórtk, 12. septembra, so po cyłej Zwjazkowej republice warnowanske systemy přepruwuja. Mjez druhim wuńdu na tutym dnju w 11 hodź. warnowanske zdźělenki přez appy, rozhłós atd. kaž tež w 11.45 hodź. zdźělenki wo zakónčenju warnowanja. Runočasnje testuje Budyske wokrjesne zarjadnistwo tež wokrjesnu sirenowu syć. W 11 hodź. zaklinča sireny ze signalom „warnowanje před strachom“ a w 11.45 hodź. ze signalom „kónc warnowanja“.
Nazymski koncert
Njebjelčicy. Chór dorosta a rejowanska skupina Serbskeho gymnazija chcetej ludźi njedźelu, 15. septembra, w Njebjelčanskej Bjesadźe z nazymskim koncertom zawjeselić. Program započina so w 16 hodź., wot 15 hodź. přeprošujetej na šalku kofeja a tykanc.
Na Dnju bibliotekow do SI
Na koncert do muzeja
Budyšin. Pjatk, 13. septembra, we 18 hodź. zahraje z mytom Menuhina wuznamjenjeny pianist Helge Antoni koncert pod titulom „Nadźija 2024“ na swjedźenskej žurli Serbskeho muzeja w Budyšinje. Zajimowanym poskićuja muzejownicy hižo w 16.30 hodź. wodźenje po wustajeńcy muzeja.
Wodźenje po sotrowni
Mały Wjelkow. Na dnju wotewrjeneho pomnika njedźelu, 8. septembra, přeprosy tež towarstwo Małowjelkowska sotrownja wšitkich zajimcow na serbske wodźenje. Tute započnje so w 14 hodź. před sotrownju na Naměsće Zinzendorfa w Małym Wjelkowje a chce wosebje serbske aspekty kołowokoło zhromadneho žiwjenja žonow a sotrow předstajić.
Přednošuje wo Bukecach
Hwězdne stawizny Heraklesa
Budyšin. Towarstwo Ad astra Budyšin přeprošuje sobotu, 7. septembra do Budyskeje šulskeje hwězdarnje na nowe wudaće swojeje serije přednoškow wo grjekskej mytologiji „Hwězdne stawizny Heraklesa“. Hwězdarnja wotewri so wot 19 hodź. Zarjadowanje same započina so w 19.30 hodź. a traje hač do 22 hodź. Po přednošku móžeće z teleskopom tež „realne“ objekty hwězdnišća wobkedźbować. Napoje a přikuski so poskićuja. Zastup płaći 10, za dźěći 5 eurow.
Na serbskeho pčołarja spominać
Budyšink. Składnostnje jeho dźensnišich 300. narodnin přeprošuje Towarstwo pčołarjow Šěrachoweje towaršnosće hromadźe z wosadu a gmejnu Malešecy sobotu, dnja 7. septembra, na wopomnjenske zarjadowanje do Budyšinka, zo bychu najsławnišeho pčołarja 18. lětstotka Hadama Bohuchwała Šěracha počesćili. Dźeń zahaja w 10 hodź. w domje Šěracha z přednoškami wo jeho žiwjenju a skutkowanju. W 13 hodź. su wopomnjenske kemše w tamnišej cyrkwi, po tym poswjeći so pomnik Šěracha na cyrkwinskim dworje.
Dźeń wotewrjeneho pomnika
26. přirodowe wiki w Stróži
Počasowa hudźbna jězba
Běła Woda. Sopranistka Liga Jankovska a organist Teófanes Gonzáles wuhotujetaj srjedu, 4. septembra, „Lětni koncert“ w Běłowodźanskej ewangelskej cyrkwi. W 19 hodź. zahrataj kompozicije na přikład Henryja Purcella, Antonija Vivaldija, Wolfganga Amadeusa Mozarta a Arva Pärta. Zastup je darmotny, pjenježne dary pak so njewotpokazuja.
Beethoven w Smochćicach
Smochćicy. Ansambl Quator Danel z Brüssela zahraje jutře, 4. septembra, w Smochčanskim kubłanišću swjateho Bena Beethovenowy smyčkowy kwartet. Koncert we wobłuku Łužiskeho festiwala započnje so w 19.30 hodź. w tamnišej cyrkwi w bróžni.
Na Šěracha spominać
Budyšink. Składnostnje 300. posmjertnych narodnin serbskeho pčołarja, fararja a prócowarja Hadama Bohuchwała Šěracha přeprošuje Domowina sobotu, 7. septembra, na wopomnjensku swjatočnosć do Budyšinka. Dźeń zahaji so w 10 hodź. z přednoškami wo žiwjenju a skutkowanju Šěracha w domje Šěracha. W 13 hodź. su wopomnjenske kemše w tamnišej cyrkwi a w 14 hodź. poswjeći so pomnik Hadama Bohuchwała Šěracha na kěrchowje při cyrkwi.
Pittkunings zahraje
Stróža. Serbski pěsnjer Bernd Pittkunings přeprošuje pjatk, 6. septembra, w 19 hodź. na koncert w Starej wowčerni w Stróži pola Malešec. W swojich serbskich a němskich spěwach tematizuje mjezy mjez serbskej, němskej a globalizowanej kulturu a wašnjom žiwjenja kaž tež žiwjenja bjez domizny a pytanjom za zhromadnosću.
Bursa za dźěćacu drastu
Budyšin. Zakładna šula Maria-Montessori a Katolski dźěćacy dom w Budyšinje zarjadujetej bursu za dźěćacu drastu a to sobotu, 7. septembra, na žurli šule w Tzschirnerowej 12. Wot 14 do 16 hodź. móža tu starši, dźědojo a wowki na něhdźe 40 stejnišćach trjebane dźěćace drasty, modu za samodruhe, hrajki a dalše artikle z „dźěćaceho swěta“ za tunju płaćiznu kupić. Tež wo ćělne derjeměće stej so zarjadowarjej postarałoj.
Gmejnska rada w Njebjelčicach
Astrocentrum přeprošuje
Zhorjelc. Astrocentrum Łužica (DZA) přeprošuje wšitkich zajimcow wutoru, dnja 3. septembra wot 17.30 hodź. do Konječan towarstwoweho domu na třeću rozmołwu při grilu. Na lońšim zarjadowanju běše załoženski direktor DZA prof. Günther Hasinger na swojej gitarje zahrał a publikum hudźbnje po swojich powołanskich stacijach wjedł. Nětko chce hromadźe z Konječan muskim chórom spěwajo wopytowarjow zahorić. Po tym wjeseli so naš dźeń a wjetši bywacy team sobudźěłaćerjow DZA na zajimawe a inspirěrowace rozmołwy z publikumom wo přichodźe a zašłosći DZA kaž tež wo wuwiću cyłeho napjateho uniwersuma!
Na Kofej w třoch do muzeja
Seniorowy škot – wuslědki
Lejno. Serbscy seniorojo su so wutoru, 27. awgusta, na swój tradicionelny seniorowy škot zešli. Jako nowačka mjez 27 hrajerjemi su Matthiasa Mögela powitali. Dobyćer dnja běše Wolfgang Kühn z 2 977 dypkami. Druhe město docpě Rudij Schmidt z 2 586 dypkami. Eberhard Krautwurst a Herbert Kretschmer sej z 2 477 dypkami třeće městno dźělitaj. Přichodny škotowy termin za seniorow přewjedu 24. septembra w Kozarcach.
Poetry slam w Kulowje
Kulow. Pod hesłom „Demokratija a wšelakorosć“ přinjesu kulturne towarstwa Livelyrix, Spektakl kolektiw Kamjenica a Highslammer zarjadowanje poetry slama nětko tež do Kulowa. Ze zabawnymi tekstami tematizuja přednošowarjo demokratiju w našim času a přihotuja nas na cyle njeortodoksne wašnje na njedźelniše wólby. Zarjadowanje wotměje so pjatk, 30. awgusta, w 19 hodź. w Kulowskim Jakubecowym wustawje. Zastup je darmotny.
Njewšědne dohlady
