Najlěpše kubło w Huskej
Huska (SN/mwe). Hušćanske kubło „Kubło lěćne duby“ Eriki Busch słuša k najwoblubowanišim prózdninskim burskim dworam Němskeje. Tole wuchadźa z 21. naprašowanja portala LandReise, kotrež dowole na burskich domicilach registruje. Tak su hosćo na posudkowych kartach kaž tež online wot septembra 2015 do awgusta 2016 zapodali, hdźe so w dowolu najlěpje čujachu. Hódnoćili su w štyrjoch kategorijach. Oficialnje gratulować budu dobyćerjam klětu na „Zelenym tydźenju“ w Berlinje.
Dźěći zela zeznali
Łaz (AK/SN). Wulke wjeselo mějachu dźěći w nazymskich prózdninach we Łazowskim Domje Zejlerja a Smolerja ze zelami. Njedawno zhotowichu tam zelowy dresing. K tomu wužiwachu zela kaž tymian, koprik (Dill), majron, ławrjenc (Lorbeer) a tójšto dalšich. Bleše wostanu tu štyri tydźenje stejo, potom je dresing hotowy. Birgit Kieschnick, sobudźěłaćerka přirodoweje stacije w biosferowym rezerwaće hornjołužiske hola a haty holcy a hólcow nawjedowaše.
Praksa w dobrych rukach
Přećiwo stresej
Smochćicy. Nowy rjad seminarow zahaja klětu w Smochčanskim Domje biskopa Bena. Tam chcedźa zajimcam zbližić, kak móžeš na přirodne a strowe wašnje stresowe situacije na dźěle abo druhdźe zmištrować. Zarjadowar a nawoda seminarow budźe Volker Bertleff, terapeut w fachowej klinice Badenweiler. Hižo lětsa kónc oktobra/kónc nowembra wón dźěłowe wašnje a metody seminara na třoch kóncach tydźenja předstaji.
Lisćiki za bal
Budyšin. 29. a 30. oktobra wotměje so w Němsko-Serbskim ludowym dźiwadle lětuši Budyski jewišćowy bal. Sobuwuhotowar je Serbski ludowy ansambl ze swojim orchestrom a baletom. Wobdźělene budu dale Baba Jaga a dalše wjery, tak zo smědźa so wopytowarjo na wosebity program wjeselić. Lisćiki poskića dźiwadłowa kasa pod tel. 03591/ 584 225.
Při kitesurfowanju so zranił
Swójske wobrazy zapodać
Budyšin. Prěni raz wěnuje Budyski Serbski muzej wot 9. oktobra hač do 1. měrca 2017 wosebitu wustajeńcu wo stawi- znach fotografije we Łužicy a zaběra so z prašenjom, wot hdy jewjachu so w fotach serbske elementy jako wotmolowanjahódny motiw. Tak su we łužiskich archiwach a muzejach kaž tež pola priwatnych wosobow njesměrnje wjele originalnych fotografijow přehladali. Přiwšěm pytaja dalše zajimawe historiske wobrazy z časoweje doby 1850 hač do 1930. Štóž tajke doma ma, njech poskići je Serbskemu muzejej za čas wustajeńcy abo jenož na wobmjezowanu chwilu. Za to stej dwě wosebitej sćěnje rezerwowanej. Zajimcy njech so w muzeju přizjewja, zo móhli motiwy wupytać. Na te wašnje móža k tomu přinošować, zo so wustajeńca stajnje znowa měnja.
Rědki jubilej
Kamjenc. Na 175lětne wobstaće zhladuje tele dny w Kamjencu wobchod Paul Lehmann. Mějićel Claus Lehmann poskića w nim hrajki, škleńčane twory, dary a małe elektriske nastroje. Serbscy kupcy móža so w předawanišću na torhošću tohorunja w swojej maćeršćinje poradźować dać. Jutře, 1. oktobra, změje wobchod wotewrjene.
Přednošuje w muzeju
Budyšin. „Wothódnoćace nastajenje napřećo druhim: Na přikładźe Serbow“ rěka němski přednošk dr. Měrćina Wałdy jutře, srjedu, we 18 hodź. w Budyskim Serbskim muzeju. Zastup je darmotny. Zarjadowanje wotměje so we wobłuku lětušich interkulturnych tydźenjow. Zajimcy su wutrobnje přeprošeni.
Wo jatbowych systemach
Budyšin. Nawoda Zhorjelskeho jastwa Frank Hieckel přednošuje jutře, w 19 hodź. w Budyskim wopomnišću wo jatbowych systemach w NDR a wo podźělu Budyšina po puću k prawostatnemu jastwu. Hieckel bě hižo za čas NDR w jastwje dźěłał a je so z tym po přewróće rozestajał. W přednošku wěnuje so wón nimo toho podawkam w Budyskim jastwje w přewrótowym času.
Wotewru wustajeńcu
Choćebuz. Wosebitu wustajeńcu Choćebuskeho Serbskeho muzeja „Zachowane drohotnosće“ wotewru srjedu, 28. septembra, w 19 hodź. w Choćebuskim měšćanskim muzeju na Dwórnišćowej 22. K wotewrjenju porěči Steffen Krestin. Wo hudźbne wobrubjenje postara so duwo Słowjanske barwy. Zajimcy su wutrobnje přeprošeni.
Štó chce sobu hrać?
Budyšin. Němsko-Serbske ludowe dźiwadło pyta za swoju nowu inscenaciju „Wir sind keine Barbaren“ Phillippa Löhle sobuskutkowacych za wobydlerski chór. Za to přewjedu srjedu, 28. septembra, w 19 hodź. we hłownym domje dźiwadła casting (jewišćowy zachod na Seminarskej). Wosebje wjesela so nad muskimi zajimcami. Premjera budźe 26. nowembra. Hłownu rólu změjetaj mjez druhim Marian Bulank a Měrko Brankačk. Wot spočatka oktobra budu proby. Wone wotměja so spočatnje dwójce wob tydźeń a stajnje sobotu dopołdnja, w premjernym tydźenju kóždy wječor.
Na serbske blido
Lipsk. Serbja w Lipsku a wokolinje njech njeskomdźa přichodne serbske blido. Zajimcy zetkaja so wutoru, 27. septembra, w 19 hodź. w kofejowni Grundmann na Bebelowej 2. Organizatorojo wjesela so na prawje wjele wopytowarjow.
Zhromadnje hriby pytać
Kulow. Składnostnje prěnjeho europskeho dnja hribow přewjedźe Herbert Schnabel z Kulowskeje skupiny NABU jutře, sobotu, hribowu ekskursiju. Wobdźělnikam chce wón zajimawostki wo prawakach a kozakach rozłožić. Nimo toho wón pokaza, kotre dalše su jědźne hriby. Zajimcy zetkaja so w 9 hodź. na parkowanišću při Kulowskej kupjeli. Wobdźělenje płaći dwaj euraj.
Porěči wo rěči
Budyšin. Přichodne zarjadowanje Budyskeho kluba wuchowarjow rěče wotměje so wutoru, 27. septembra. W Budyskim hosćencu Sprjewina pensija porěči wot 19 hodź. dr. Peter Ulbrich na temu „Rěč w zwjazkowej republice“. Wšitcy zajimcy su witani, zastup je darmotny.
Ryba a přiroda
W piwarni znowa swjeća
Kulow. 25. raz wotměje so wot jutřišeho hač do njedźele piwarniski swjedźeń w Kulowskej piwarni. K jutřišim rejam hraje kapała Božemje Cryers. Sobotu a njedźelu stajnje w 13 a 15 hodź. zajimcow po piwarni powjedu. Sobotu w 16 hodź. započnje so piwarniske wubědźowanje. Wječor hraje kapała nA und. Njedźelu wočakuja tam dubl Rolanda Kaisera.
W parku předawaja rostliny
Wochozy. Wulka nazymska bursa rostlin wotměje so sobotu a njedźelu, 24. a 25. septembra, we Wochožanskim parku błudźenkow. Wjacore zahrodniske zawody a štomownje kaž tež plahowarjo žadnych rostlinskich družin chcedźa tam swój poskitk předstajić. Někotři wikowarjo so prěni raz wobdźěla. Rostlinske wiki, organizowane wot spěchowanskeho towarstwa parka, budu wobaj dnjej wot 10 do 18 hodź. přistupne.
Hudźbny nyšpor
Budyšin. Lubowarjo chóroweho spěwa njech njeskomdźa hudźbny nyšpor jutře, sobotu, w Budyskej cyrkwi swj. Pětra. Jón wuhotuje chór Budyšin. Mjez druhim zanjesu spěwarki a spěwarjo twórbu „Liturgia Trinitatis“ Sebastiana Elikowskeho-Winklera. Wšitcy zajimcy su wutrobnje přeprošeni. Hudźbny nyšpor započnje so w 17.15 hodź.
Nazhonjenja z demokratiju
Budyšin. Kotre nazhonjenja su wobydlerjo Hornjeje Łužicy po přewróće ze zawjedźenjom demokratije měli? Kak hodźi so demokratiska kultura w Hornjej Łužicy zesylnić? Wo tutej a wo dalše prašenja póńdźe na diskusijnym forumje wutoru, 20. septembra, we 18 hodź. w Budyskim Kamjentnym domje. Zarjadowar je Budyski Zwjazk 90/Zelenych.
Sportnišćo nětko přepodadźa
Serbske Pazlicy. Wulki wokomik budźe jutře za Njebjelčanske sportowe towarstwo. Jeho nowe sportnišćo w Serbskich Pazlicach chcedźa w 17.30 hodź. oficialnje přepodać. K tomu budźe kopańca za dźěći, kotrež móža so tež na skakanskim hrodźe wucychnować.
Wustajeńca so skónči
Budyšin. Přehladka Budyskeho Serbskeho muzeja „Pruhi, kruhi, třiróžki – Pisane serbske jutrowne jejka“ so njedźelu, 18. septembra, skónči. Tón dźeń budźe wot 15 hodź. poslednje wodźenje po wustajeńcy starodawnych mustrow a ornamentow w ludowym wuměłstwje. Wot 16 hodź. zahudźa čěscy a němscy hudźbnicy na zhromadnym koncerće na žurli muzeja. Serbski muzej je jedna ze stacijow koncertneho rjadu we wokolinje němsko-čěskeje mjezy z wobdźělenjom Turnowskeho orchestralneho zwjazka. Repertoire zestaja so ze staršich a nowšich kompozicijow.
Swjedźeń a muzejowa nóc
Reje za wšitkich
Haslow. Wobdźělnicy wulěta dekanatneje młodźiny zajutřišim, njedźelu, do Sakskeje Šwicy zetkaja so wječor k rejam w Haslowskej bróžni. Tam pak su wot 19.30 hodź. tež wšitcy dalši zajimcy wutrobnje witani, kotřiž so na wulěće njewobdźěla. Za nich płaći zastup tři eura. K rejam hraje skupina Sorbian Art Trio.
Durje dźiwadła wotewrjene
Budyšin. K zahajenju noweje sezony přewjedźe Němsko-Serbske ludowe dźiwadło njedźelu, 11. septembra, w swojim hłownym domje dźeń wotewrjenych duri. Z literarnymi a hudźbnymi programami, z wurězkami wšelakich inscenacijow, z čitanjemi a dalšimi poskitkami chcedźa wopytowarjow wot 14 hodź. na nowu sezonu wćipnych činić. Mjez druhim zahrajetaj Marian Bulank a Julija Klingnerec w 16 hodź. na probowym jewišću 2. inscenaciju „Zhubjene a namakane“. Wosebje skedźbnjeja na zakónčenje tohole dnja. We 18 hodź. pokazaja na hłownym jewišću zhromadnu produkciju NSLDź a SLA „Jurij Brězan – ze studnje jeho lět“. Zastup je zajutřišim za wšitke jednotliwe poskitki darmotny.
Rěčne hodźiny
