Nětko móža twarić
Smječkecy. Za štyri planowane nowe twarske ležownosće při Winicy w Smječkecach su wšitke běrokratiske zadźěwki přewinjene, tak zo móža tam młode swójby twarić započeć. Kaž Worklečanski wjesnjanosta Franc Brusk (CDU) zdźěli, su trěbne planowanske jednanja wotzamknjene a prěnja próstwa wo twar jednoswójbneho domu na gmejnskim zarjedźe mjeztym předleži. Hakle před dobrym lětom bě gmejnska rada Worklecy wobzamknyła, za Smječkečansku Winicu twarski plan nastajić.
Přidatne předstajenje
Budyšin. Za inscenaciju Budyskeho lětnjeho dźiwadła NSLDź „Olsenowa cwólba a wulki pozadnik“ je dale jara wulki zajim. Tohodla je so dźiwadło rozsudźiło, přidatnu inscenaciju do programa přiwzać, a to wutoru, 5. julija, w 19.30 hodź. Dalšich přidatnych terminow pak hižo njebudźe. Z tym potom po wšěm zdaću 37 razow stawiznu wokoło Egona a jeho cwólby pokazaja. Hižo k premjerje 9. junija běchu wšitke lisćiki rozpředate. Minjenu njedźelu bě prěnje přidatne předstajenje. Kaž NSLDź připowědźi, čaka klětu na wopytowarjow pokročowanje „Olsenowa cwólba wupućuje“.
Kołowokoło muzeja
Njeswačidło. Dwanaty muzejowy swjedźeń wotměje so zajutřišim, njedźelu, wot 13 hodź. na Njeswačanskim torhošću. W domizniskim muzeju wotewru wosebitu wustajeńcu „Domjace nastroje wokoło lěta 1900“. Bošečanscy dujerjo popołdnjo hudźbnje wobrubja. Na woblubowanych wikach wobdźěli so 26 rjemjeslnikow. Wětrowske towarstwo oldtimerow prezentuje swoje drohoćinki, a holcy a hólcy Njeswačanskeho dźěćaceho domu „Maks a Moric“ wjesela so hižo na to, swój nazwučowany program předstajić móc. Z čěskeje partnerskeje gmejny Lučany wustupi aerobikowa skupina. Tež wuhlad z cyrkwineje wěže budźe móžny. Wodźenja po muzeju a po hrodźe kaž tež po parku su planowane. Towarstwo přećelow domizny a kultury wjeseli so na mnohich hosći.
Swjeća wosadny jubilej
Wo wotbagrowanych wsach
Kamjenc. Na přednošk Roberta Lorenca přeproša Kamjenske stawizniske towarstwo jutře, pjatk, w 19 hodź. do tamnišeho Röhrmeisteroweho domu. Berlinjan porěči wo brunicy dla wotbagrowanych wsach. Přednošowar wěnuje so tomule procesej w jeho rozdźělnych časowych formach, tematizuje wuměłske předźěłanje dewastowanja wsow we Łužicy a wěnuje so tohorunja stawiznam praksy wotškódnjenja. Lorenc praša so za sćěhami za serbsku wjesnu kulturu a skedźbnja dale na tuchwilne połoženje před pozadkom cyłoněmskeje energijoweje debaty. Na jeho přednošk su wšitcy zajimcy witani.
Wólbam znapřećiwili
Koncertuja na hrodźe
Njeswačidło. Prěni lětuši hrodowy koncert w Njeswačidle wotměje so njedźelu, 22. meje, w 15 hodź. Pod hesłom „Nóc połneje zbóžnosće ...“ prezentuje trio Belcantissimo filmowe šlagry dweju lětstotkow. Towarstwo přećelow domizny a kultury wjeseli so na mnohich hosći.
Powjedu po hrodźišću
Wotrow. Župa „Michał Hórnik“ přeproša wšitkich zajimcow na wodźenje po Wotrowskim hrodźišću. Zarjadowanje Muzeja zapadneje Łužicy budźe wutoru, 31. meje, we 18 hodź. Zajimcy zetkaja so pod hrodźišćom při informaciskich taflach. Za lěpše planowanje prosy župa wo přizjewjenje pod telefonowym čisłom 035796/ 96 254 abo e-mailnje pod .
Rejuja wokoło meje
Protokolowa kniha wušła
Lejno. Wotpisk rukopisneje protokoloweje knihi něhdyšeje Lejnjanskeje gmejnskeje rady je jako brošura wušoł. Wjes bě wot lěta 1839 hač do zagmejnowanja do Pančic-Kukowa 1974 samostatna gmejna. Brošura wobsahuje wšitke protokole z časa wot 1839 hač do 1950 a tuž mnohe informacije wo stawiznach wsy. Zajimcy dóstanu ju pola Alfonsa Ryćerja w Šunowje (tel. 035792/ 50 348).
Wo měsće w telewiziji
Budyšin. „Laut, rechts, sächsisch?“ rěka reportaža, kotruž wusyła telewizija ZDF njedźelu, 15. meje, we 18 hodź. W njej podadźa so na slědy tak mjenowanych roznjemdrjenych wobydlerjow w Clausnitzu, Budyšinje a druhdźe a prašeja so, čehodla maja někotre komuny problem z prawicarstwom. Autor Carsten Thurau je zwěsćił, zo stej neonacistiska kultura a njetolerantnosć w někotrych kónčinach Sakskeje fenomen wšědneho dnja.
Intensiwny kurs čěšćiny
Budyšin. Wot 1. do 6. awgusta 2016 zarjaduje Rěčny centrum WITAJ intensiwny kurs čěšćiny w Smjerdźacej. Čech Pavel Šlechta chce tam wšědnje šěsć hodźin wuwučować. Po popołdnjach budu čěscy hóstni referenća w maćeršćinje k čěskej kulturje a stawiznam přednošować. Nimo wulěta do Čěskeje su zabawne wječorki z čěšćinu planowane. Dalše informacije pod http://www.witaj-sprachzentrum.de/…/recne-kursy-ces…/cescina
Z busom na zjězd katolikow
Radwor. Štóž chce sej na 100. zjězd katolikow Němskeje do Lipska dojěć, ma k tomu z busom dwě móžnosći. Radworske Šmitec wozydłownistwo poskića jězbje sobotu, 28. meje, kaž tež njedźelu, 29. meje. Zajimcy měli so pola Šmitec přizjewić, a to pod telefonowym čisłom 03 59 35 / 28 60.
Witaja zaso na wustajeńcu
Njeswačidło. Prěnju wustajeńcu tohole lěta wotewru njedźelu, 10. apryla, w 15 hodź. na Njeswačanskim hrodźe. Seniorojo města Budyšina a wokrjesa pokazaja tam swoje twórby wuměłskeho razu. Woni mjenuja wustajeńcu „To je moje žiwjenje – mój swět“. Towarstwo přećelow kultury a domizny wšitkich zajimcow cyle wutrobnje přeproša.
Wandrowski přednošuje
Budyšin. Wo swojich lětach wandrowstwa přednošuje Chróšćan Franc Čornak štwórtk, 14. apryla, we 18 hodź. na žurli Budyskeho Serbskeho domu. Z wobrazowym přednoškom předstaji wón swoje třilětne pućowanje po štyrnaće krajach a swoje dožiwjenja w nich. Wšitcy zajimcy su wutrobnje přeprošeni.
Twórby šulerjow widźeć
Budyšin. Pod hesłom „pappesatt“ budu w Budyskej měšćanskej bibliotece přichodne tydźenje twórby šulerjow widźeć. Zhotowili su je holcy a hólcy tudyšeho Serbskeho gymnazija we wuměłstwowej wučbje. Wustajeńcu wotewru wutoru, 19. apryla, w 17 hodź. Wona budźe hač do srjedź meje přistupna.
Powjedu po přehladce
Do piwarnje přilećałoj
Kulow. Nic aprylski žort, ale skerje wjeselo bě, štož přistajeni Kulowskeje piwarnje minjeny pjatk wuhladachu. Tamniše baćonjace hnězdo na starym wuhenju běštej piwarniskej baćonaj Hopf a Malzi wobsadźiłoj. Tak móžeće jej nětko zaso na internetnej stronje piwarnje www. wittichenauer.de live wobkedźbować.
Warja klewernje a kreatiwnje
Pančicy-Kukow. Kak w kuchni žiwidła zlutniwje zasadźeš a žane preč njemjetaš, to budźe tema přichodneho zarjadowanja „Klewernje a kreatiwnje warić“ w zežiwjenskim a zelowym centrumje klóštra Marijineje hwězdy w Pančicach-Kukowje. Zežiwjenska wědomostnica Silvia Ulrich chce srjedu, 13. apryla, w 19 hodź. z wobdźělnikami regionalnje a sezonalnje typiske jědźe warić. Wona podawa tež pokiwy k přihotowanju runje tak kaž k zlutniwemu nakupowanju. Wobdźělenje płaći šěsć eurow na wosobu. Zajimcy njech přizjewja so pod telefonowym čisłom 035796/ 97 1 10. Dalše informacije wo terminach a temach warjenskich wječorow namakaće pod rubriku „zarjadowanja“ na internetnej stronje www.ekz-marienstern.de.
Baletny wječor ze zawodom
Budyšin. Swoju baletnu inscenaciju „Što zwostanje?“ předstaji Serbski ludowy ansambl jutře, štwórtk, w 19.30 hodź. na swojej žurli w Budyšinje. K tomu poskići wot 19 hodź. zawod do krucha w předrumnosći Röhrscheidtoweje bašty. W baletnej formje rozestajeja so wuměłcy z lokalnymi temami Hornjeje Łužicy.
Nowa antilopa widźeć
Wojerecy. Po prěnich dnjach zažiwjenskeho časa pokazuje so nětko we Wojerowskim zwěrjencu nowa antilopa. Dotal mějachu tam dwě skoćeći družiny „Rappenantilope“. Jedne z njeju z mjenom Agnes pak dyrbjachu wysokeje staroby dla kónc februara zasparnić. Za Malindu namakachu w Kopenhagenskim zwěrjencu nowu połdralětnu towaršku, kotruž su srjedź měrca do Łužicy přiwjezli. Mjeno wona hišće nima. Zo by so na swoju dźesaćlětnu towaršku kaž tež na hladarjow zwučiła, je nowa wobydlerka zwěrjenca najprjedy hišće we wosebitym wotdźělu, hdźež pak ju hižo hdys a hdys wuhladaš, kaž Wojerowski zwěrjenc w nowinskej informaciji zdźěli.
Znowa za dobry skutk
Jutře do muzeja
Wojerecy. W rjedźe „Wutoru do měšćanskeho muzeja“ wotměje so jutře w 17 hodź. we Wojerowskim měšćanskim muzeju přednošk „Prěni krajni radźa Wojerowskeho wokrjesa – swójba von Götz auf Hohenbocka“. Z njeje wuńdźechu třo krajni radźa. Přednošować budźe bywši wyši měšćanosta Horst-Dieter Brähmig. Zastup płaći tři eura.
Koncertuja k jubilejej
Łaz. Składnostnje 200. narodnin Jana Arnošta Smolerja wěnuje jemu Serbski ludowy ansambl wosebity koncert. Wón wotměje so pjatk, 18. měrca, w 19 hodź. we Łazowskej cyrkwi a jutrowničku, 27. měrca, we 18 hodź. na Budyskej žurli SLA. Za hornjo- a delnjoserbskich komponistow wšelakich žanrow a generacijow běše a je Smolerjowa zběrka „Pěsničkow“ drohotny pokład a zdobom wužitny nastork, štož so w chórowych sadźbach kaž tež w instrumentacijach za serbske ludowe instrumenty wotbłyšćuje. Nimo hižo znatych twórbow swědča předewšěm prapremjery tohole koncerta znowa wo wunošnym rozestajenju z kulturnym namrěwstwom. Lisćiki dóstanu zajimcy w Serbskim ludowym ansamblu (tel. 03591/358 111 abo z mejlku na adresu ).
Spušćadło ponowjeja
