Radwor. Přichodne zjawne posedźenje Radworskeje gmejnskeje rady wotměje so srjedu, 14. julija, we 18.30 hodź. w jědźerni Radworskeje šule. Mjez druhim porěča tam wo kóštach wobhospodarjenja pěstowarnjow a wo nakupje jězdźidła za komunalny twarski zawod. Zajimcy su wutrobnje witani.
Prěnje stajne blido
Budyšin. Po wjacorych měsacach přestawki přewjedźe Budyski měšćanski zwjazk CDU srjedu, 14. julija, wot 19 hodź. prěnje stajne blido CDU w tymle lěće. Zarjadowanje wotměje so w hosćencu Sprjewina pensija na Rybarskej hasy 6. Tam chcedźa sej mysle wuměnjeć wo najwšelakorišich temach, kotrež su ludźi w minjenym času zaběrali. Přizjewjenje njeje trěbne.
Budyšin. Runja mnohim druhim komunam tež město Budyšin swoje kubłanišća z digitalnej techniku wuhotuje a na te wašnje stare tafle a tak mjenowane whiteboardy naruna. Te móža nětko towarstwa a priwatne wosoby za symbolisku płaćiznu kupić. Štóž so za tajke nastroje zajimuje, njech přizjewi so w měšćanskim zarjadnistwje pod telefonowym čisłom 03591/ 534 501.
Porěča wo medijach
Kamjenc. „Nowinarska swoboda – su medije woprawdźe swobodne?“ rěka hesło zarjadowanja Kamjenskeje měšćanskeje skupiny Lěwicy wutoru, 13. julija, w 19 hodź. w Kamjenskim měšćanskim dźiwadle. Redaktor nowiny Neues Deutschland Robert D. Meyer porěči tam wo trěbnej změnje medijow a wo pobrachowacej dowěrje k rozprawnistwu. Zastup je darmotny.
Wotewru wučbnu šćežku
Smochćicy. Konrada Adenauerowa załožba w Sakskej a kubłanišćo swj. Bena Smochćicy přeprošatej wot 8. do 11. julija na diskusiju wo kubłanju w dźensnišim času. Zajimcy móža so pod přizjewić. Wědomostnicy ze wšelakich disciplinow diskutuja wo wuznamje kubłanja w našej towaršnosći jako zakładnym wuměnjenju za swójske wuwiće. Mjez wobdźělnikami budu sakski ministerski prezident Michael Kretschmer kaž tež wšelacy profesorojo, mjez druhim z Němskeje, Wulkeje Britaniskeje, Francoskeje a USA. Zjawne zarjadowanje wotměje so na widejokonferencnym toolu ZOOM. Wobdźělenski přinošk wučinja 25 eurow.
Na koncert z Pytkom
Budyšin. Rěčny centrum WITAJ přeproša na čitanski dyrdomdej, kotryž wotměje so lětsa na Budyskich wěžach. Pjatk, 9. julija, přewjedźe RCW znowa w kooperaciji z Němsko-Serbskim ludowym dźiwadłom z 20 šulerjemi 3. a 4. lětnika serbskich šulow wosebite čitanje. W starym měsće wopytaja wobdźělnicy tři wšelake wěže, zhonja wo jich stawiznach a čitaja sej na wěžach mjez sobu ze swojich najlubšich serbskich knihow. Piknik, zabawne hry a kónčny kwis zhromadne dožiwjenja skulojća. Na prašenja wotmołwja Michaela Hrjehorjowa w RCW pod telefonowym čisłom 03591 /550414.
Wuznamjenja najlěpše ideje
Kulow. Dobyćerjo idejoweho wubědźowanja Leaderoweje kónčiny Hornjołužiska hola a haty 2021 přijmu swoje myto tónle pjatk, 9. julija, w 10 hodź. při Krabatowej steli na Kulowskim torhošću. Tam prezentuja potom tež dobyćersku ideju „Bachtać ze Šajatovićom“. Wšitcy zajimcy, kotřiž chcedźa z časom być informowani, su přeprošeni. Wothłós na wubědźowanje k sylnjenju małeje turistiskeje infrastruktury běše chětro wulki. Dóšło je 22 přinoškow z cyłeho regiona.
Kamjenc. Župa „Michał Hórnik“ Kamjenc a Serbske wjesne towarstwo Domizna Chrósćicy přeprošatej na kubłansku jězbu do Błótow. Sobotu, 17. julija, chcedźa čołmikować a hudźbny wječor ze skupinu Kula Bula w Bórkowach dožiwić. Wotjězd je w 16.30 hodź. z Chrósćic, a nawrót budźe na samsnym městnje wokoło 0.30 hodź. Jězba płaći na wosobu 25 eurow (bus a čołmikowanje). Přizjewić móža so zajimcy hač do srjedy, 7. julija, w Chróšćanskim regionalnym běrowje Domowiny pod telefonowym čisłom 035796-96254 abo z mejlku na .
Wustajeja karikatury
Wojerecy. Wustajeńca wo změnje klimy pod hesłom „Škituj nas Božo“ wabi tuchwilu do Wojerowskeho Domu Martina Luthera Kinga. Přistupna je ekspozicija stajnje njedźelu po Božej słužbje kaž tež we wotewrjenskim času běrowa cyrkwje a w domje zaměstnjeneho wobchoda. Chceće-li sej hinaši termin wučinić, přizjewće so pod telefonowym čisłom 03571 /972073 abo z mejlku na . Wustajeńca nasta w zhromadnym dźěle ze Slepjanskej wosadu. Dokelž nimaja městno za wšitke tafle, budu tam dotal pokazowane karikatury 25. julija wuměnjene.
Zejicy/Brno. Tornado na Morawje a jeho sćěhi za ludnosć pohnuwa Towarstwo Cyrila a Metoda k pomocy. Ze swojej akciju „Łužica pomha“ chce wone pjenjezy zběrać a je Brnjanskemu biskopstwu přepokazać. Biskopstwo je zwólniwe pjenjezy potrěbnym wosadam dale posrědkować. TCM ludźi tuž k darniwosći namołwja. Pjenjezy přepokazać móža darićeljo na konto TCM pod IBAN čisłom: DE 65 750 90 300 000 828 23 66 a pod wužiwanskim zaměrom MORAWA.
Dróha zaraćena
Mały Wjelkow. Na Nowej dróze w Małym Wjelkowje hač do 30. julija medije kładu, čehoždla je wona za wobchad zawrjena. Wobydlerjam wostanje přijězd na ležownosće dalokož móžno dowoleny. Za busowe linije płaći nětko hinaše rjadowanje. Bus njemóže tuchwilu na hłownej dróze zastać. Linija 190 jědźe tuž wot zastanišća Mały Wjelkow Wulkodubrawska direktnje na zastanišćo Budyšin Wojerowska. Analognje je to w nawopačnym směrje.
Próstwa wo podpěru
Budyšin. Jutře, 25. junija, wotewru w Budyskim Kamjentnym domje wustajeńcu -dieniemandsrose- Budyskeje wuměłče Heike Dittrich. Hač do 30. julija móža sej zajimcy wobhladać rysowanki a fotografije, kotrež so ze židowskimi stawiznami 20. lětstotka w Budyšinje rozestajeja. Jako zakład za swoje twórby je Dittrich wužiwała lětnej spisaj měšćanskeho muzeja z dokumentaciju židowskeho žiwjenja w měsće. Titul přehladki je ze zwjazka basnjow Paula Celana „Die Niemandsrose“. Zajimcy njech přizjewja so z mejlku na abo telefonisce pod čisłom 03591/5319972. Trěbnej stej škitny nahubnik kaž tež negatiwny koronatest z testowanskeho centruma, nic starši hač 24 hodźin. Druhe šćěpjenje, znajmjeńša dwě njedźeli stare, tohorunja akceptuja.
Kedźbu, serbscy škotowarjo
Lejno. Skónčnje móža seniorojo-škotowarjo zaso karty placać. Kaž Měrćin Nowak z Lubija zdźěli, zetkaja so woni wutoru, 29. junija, w 14 hodź. w Lejnjanskim hosćencu „K lipje“. Wobkedźbować maja so postajenja korony dla. 14. septembra chcedźa sej kartyplacarjo potom do Błótow wulećeć.
Wopomnišćo zaso přistupne
Horni Hajnk. Jutře, štwórtk, na swjatoh Jana w 20 hodź. wotměje so w Hornim Hajnku na zahrodźe za domom Jurja Brězana wosebite čitanje. Awtorojo předstaja swoje teksty z literarneje zběrki „Susodźa“, kotruž je Ingrid Juršikowa w Ludowym nakładnistwje Domowina wudała. Na zahrodźe budźe městno za něhdźe połsta zajimcow. Čitać budu Beno Budar a jeho wnučk Filip, Měrka Mětowa, Lydija Maćijowa a Měrana Cušcyna. Zajimcy, kotřiž su hižo wot 19 hodź. witani, njech sebi mały piknik sobu přinjesu. Napitki budu tam na předań.
Zaso přistupnej
Budyšin. Čitarnja Serbskeje centralneje biblioteki kaž tež Serbski kulturny archiw stej po tuchwilu płaćiwych zakonskich postajenjach zaso wotewrjenej. Zajimcy njech přizjewja so telefonisce pod čisłom 03591 /4972-0 abo sćelu mejlku na . Sobu přinjesć měli čitarjo dopokaz dospołneho šćěpjenja na covid-19, dopokaz wustrowjenja, nic starši hač šěsć měsacow, abo negatiwny koronatest. Wupožčenje resp. wróćenje medijow wotměwa so dale w zachodnej rumnosći Serbskeho instituta, tak zo je čitarnja jeničce za rešeršowe dźěło a studij literatury wužiwajomna.