Na mejemjetanje
Konjecy: 21. a 22. meje swjeća w Konjecach zaso wjesny swjedźeń. Započatk je sobotu w 16 hodź. z dźěćacym swjedźenjom pod hesłom „wohnjowa wobora“. Tu chcedźa překwapić mały, ale tež starši publikum. Snano dyrbja wohnjowi wobornicy na alarm chwatać? Njedźelu dopołdnja wotměje so wubědźowanje čestnohamtskich wohnjowych woborow wokolnych wsow. Wjeršk swjedźenja je njedźelu w 14.30 hodź. mejemjetanje młodźiny w Šunowje. K zakónčenju w 16.30 hodź. budźe požohnowanje noweho wohnjowoborneho awta. Zastupjerjo wokrjesa a gmejny je wobornikam oficialnje přepodadźa.
Hórki: Wjesne towarstwo a Hórčanska młodźina přeprošujetej sobotu, 21. meje, wot 17 hodź. na mejemjetanje. Běhej wo wjeršk meje přizamkny so program wjesnych dźěći a mejska reja młodźiny. Wječor su wšitcy witani na spěwny wječork ze skupinu „Brankački“.
Chrósćicy: W Chrósćicach poběža młodźency hižo w 16 hodź. za wjerškom meje. Wjeselće so na zhromadne popołdnjo z kofejom a tykancom. K zabawje hudźa Chróšćanscy muzikanća. Na dźěći čaka skakanski hród. Dale přihotuja za wšitkich přitomnych tombolu, livestream na kopańcu a reje.
Na dworowy swjedźeń
Worklecy. We Worklecach, na tamnišej zakładnej a wyšej šuli „Michał Hórnik“, wjesela so wučerjo a šulerjo na tónle pjatk, wšako wotměja tam swój tradicionalny dworowy swjedźeń. W tymle ramiku přeproša Worklečanski hort wot 18 hodź. wšitkich zajimcow na dźeń wotewrjenych duri do zarjadnišća.
Wo instrumentach
Łaz. „Hudźbne instrumenty w změnje časa“ rěka aktualna wustajeńca w domje Zejlerja a Smolerja we Łazu. Tamniše Spěchowanske towarstwo wita zajimcow na wotewrjenje přehladki pjatk, 20. meje, we 18 hodź. Wustajeńca, kotraž budźe wot póndźele do štwórtka stajnje wot 10 do 17 hodź. wotewrjena, ma być hač do kónca julija přistupna.
Wabjacy nalětni swjedźeń
Mytowanski koncert njebudźe
Budyšin. Dobyćerski koncert 12. wubědźowanje młodych hudźbnych talentow „Serbska hudźba“ njedźelu, 22. meje, wupadnje. Koncert pak chcedźa nachwatać, zdźěli wuhotowar wubědźowanja Serbski ludowy ansambl. Přičina za postupowanje je, zo njeje wulkemu dźělej dobyćerjow móžno, so na koncerće wobdźělić. Ručež budźe nowy termin jasny, chce SLA informować.
Wjesnjanosta zmylki nječinił
Njebjelčicy. Komunalnoprawniski dohlad Budyskeho wokrjesa je po wobšěrnym pruwowanju zwěsćił, zo je Njebjelčanski wjesnjanosta jednał po zakonjach. Tež gmejnska rada je po prawje postupowała. Na internetnej stronje „wahrheit-krabat.com“ wozjewjene wumjetowanja nimaja tuž za komunalneho politikarja z wida zarjada sćěhi. Tuchwilu slědźi policija za iniciatorami poskitka w syći.
Radźićeljo wuradźuja
Róžant. Hnydom tři gmejnske rady so zajutřišim, štwórtk, k wuradźowanju zetkaja. Posedźenje parlamenta Ralbic-Róžanta započnje so we 18.30 hodź. w Róžeńčanskim gmejnskim zarjadnistwje. Mjez druhim póńdźe wo dalše ponowjenje trawerzow sportnišća w Ralbicach.
Chrósćicy. W 19 hodź. přizamknje so posedźenje Chróšćanskeje gmejnskeje rady w gmejnskim a kulturnym centrumje. W jednym z dypkow dnjoweho porjada zaběraja so z njeplanowanymi wudawkami za nakup trjebaneho multicara z připowěšakom.
Worklecy. Hospodarski plan lěta 2022 budźe jedna z temow posedźenja Worklečanskeje gmejnskeje rady. Wona schadźuje so tohorunja zajutřišim, ale hakle w 19.30 hodź., a to w jědźerni wyšeje šule.
Na koncert
Poskića zhromadne popołdnjo
Worklecy. Dnjowa hladarnja „Při Krabatowym puću“ we Worklecach přeprošuje wšitkich zajimcow wutoru, 24. meje, wot 14.30 hodź. na zhromadne popołdnjo. Tam chcedźa zajimcam swoje poskitki předstajić a jim zhromadnosć při bjesadźe wuhotować. Přizjewjenja přijimuja hač do 20. meje pod tel. čo. 035796 942470. Za wudawki wuproša sej organizatorojo přinošk pjeć eurow na wosobu.
Nowe ideje z rabarberom
Wojerecy. W rjedźe „Klewernje a kreatiwnje warić“ steji srjedu, 18. meje, w 19 hodź. rabarber w srjedźišću přichodneho zarjadowanja na Wojerowskej dźěćacej a młodźinskej farmje. Wobdźělnikam sposrědkuja nastorki, kak móžeš rabarber w kuchni wužiwać a předźěłać. Wobdźělenje płaći sydom eurow na wosobu. Přizjewjenja přijimuja pod telefonowym čisłom 03571/ 979 164 abo emejlnje pod .
Na slědach baćonow
Na mejemjetanje
Pančicy-Kukow. Młodźina Pančic-Kukowa přeprošuje wot dźensnišeho hač do njedźele na mejemjetanje. Po dźensnišim dźěćacym kinje budźe wječor diskoteka w stanje. Jutře přizamknje so mejemjetanje w 16 hodź. Wječor přeprošuja na mejske reje z kapału Holaski a diskotekarjom. K njedźelnemu rańšemu piwku zahraja Chróšćanscy muzikanća. Popołdniši kofej wobrubi šulski chór a wot 15.30 hodź. wustupi Wudworski folklorny ansambl.
Diskutuja wo pomniku
Smochćicy. We wobłuku rjada Smochčanski forum zaběraja so póndźelu, 16. meje, w 19.30 hodź. w Smochčanskim kubłanišću swjateho Bena z pomnikom Bismarcka, kiž chcyše towarstwo Bautzener Liedertafel na Čornoboze nastajić. Hłowny wuběrk města bě tomu přihłosował, měšćanska rada namjet wotpokaza. Diskutować budu wyši měšćanosta AlexnderAhrens, dr. Friedrich Pollack ze Serbskeho instituta a dr. Justus H. Ulbricht z towarstwa Denk Mal Fort.
Koncert a galerija
Njeswačidło. Prěni lětuši koncert w Njeswačanskim hrodźe wotměje so njedźelu, 15. meje, w 15 hodź. Zaklinča filmowa hudźba a šansony 1920- do 1940tych lět. Kapała „Štyri capriole“ kaž tež Njeswačanske domizniske a kulturne towarstwo wjeselitej so na mnohich wopytowarjow. W Małej galeriji wustaja Budyšan Andreas Rochor swoje mólby.
Ludowe wuměłstwo widźeć
Dešno. K mjezynarodnemu muzejowemu dnjej njedźelu, 15. meje, wotewru w 16 hodź. w Dešnjanskim domizniskim muzeju nowu wosebitu wustajeńcu. Ekspozicija „Ludowe wuměłstwo w NDR“ prezentuje wysoku kwalitu wuměłskich dźěłow a mnohe fakty k stawiznam kaž tež wuwiću wuměłskeho ludoweho tworjenja z něhdyšeho wobwoda Choćebuz. Wo hudźbne wobrubjenje stara so skupina „Drjewjanki“.
Na hłownu a wólbnu
Chrósćicy. Předsydstwo Towarstwa Cyrila a Metoda (TCM) přeprošuje wšitkich čłonow towarstwa, čłonow sekcijow a korporacijow kaž tež zajimowanych hosći na swoju hłownu a zdobom wólbnu zhromadźiznu pjatk, 13. meje, do Chrósćic. Započatk budźe w 19 hodź. z Božej mšu w cyrkwi. Přizamknje so zhromadźizna na farje.
Po přestawce zaso kofejownja
Budyšin. Budyski ekumeniski tachantski wobchod přewjedźe pjatk, 13. meje, wot 18.30 hodź. zaso literarnu kofejownju. Ullrich Schollmeyer z Budyskeho měšćanskeho muzeja wustupi tam jako kantor August Bergt, kiž bě před něhdźe 200 lětami organist w Budyskej cyrkwi swjateho Pětra. Jako hudźbny wučer na wučerskim seminarje je wón kantorow Hornjeje Łužicy wukubłał. Wo hudźbne wobrubjenje wječora staraja so dujerjo skupiny Consonare pod nawodom Evelyn Fiebiger. Zarjadowanje wotměje so na Pětrowej žurli wosadneho domu Při měšćanskim nasypje 12.
Pytaja wikowarjow
Serbske popołdnjo tež lětsa
Wochozy. Po lońšim wuspěšnym serbskim popołdnju we Wochožanskim parku błudźenkow chcedźa tam tajke zarjadowanje lětsa znowa přewjesć. Wone wotměje so njedźelu, 8. meje, wot 14 hodź. Za to je Smjerdźečanska rejwanska skupina nowy program nazwučowała, kotryž nałožk mejemjetanja předstaji. Kaž organizatorojo zdźěla, pojěcha mejski kral z kralownu na konju po parku.
Wotewru přehladku
Wojerecy. Nowu wosebitu wustajeńcu „Manfred Vollmert – metalowy design“ wotewru njedźelu, 8. meje, w 10.30 hodź. w kaminowej stwě Wojerowskeho hrodu. W přehladce prezentuja dźěła Židźinskeho wuměłca z jeho dlěje hač 50 lět trajaceho kreatiwneho tworjenja. Twórby Manfreda Vollmerta su kruty wobstatk wuměłskeho wobraza Wojerec, regiona a mnohich dalšich městow. Dale widźeć budu jeho plastiki a nadawkowe dźěła za sakralne rumnosće.
Poradźuje darmotnje
Na dźeń wotewrjenych duri
Kamjenc. Swój dźeń wotewrjenych duri móže Kamjenska hudźbna šula lětsa zaso w prezencnej formje přewjesć. Wšitke na hudźbje zajimowane dźěći kaž tež młodostni a starši su sobotu, 7. meje, na Kamjensku Macherowu 140a přeprošeni. W času wot 14 do 17 hodź. móža wopytowarjo instrumenty wuspytać a so z hudźbnymi wučerjemi rozmołwjeć. Hudźbny program poda dohlad do skutkowanja kubłanišća. Zajimcy njech přizjewja so pod telefonowym čisłom 03578 7747370.
Wobornicy přeprošeni
Róžant. Dobrowólne wohnjowe wobory zarjadniskeho zwjazka Při Klóšterskej wodźe swjeća jutře, pjatk, dźaknu Božu mšu składnostnje swjedźenja swjateho Floriana. Wona započnje so w 19 hodź. w Róžeńčanskej hnadownej cyrkwi. Wšitcy wohnjowi wobornicy kaž tež dalši hosćo su k tomu přeprošeni. Božu mšu organizuje lětsa Njebjelčanska dobrowólna wohnjowa wobora.
