Nowa wustajeńca widźeć
Wojerecy. Wot minjeneho pjatka pokazuja we Wojerowskim měšćanskim muzeju nowu wosebitu wustajeńcu wuměłca Michaela Krusche. Moler a fotograf je so 1961 we Wojerecach narodźił a bydli dźensa jako swobodnje skutkowacy w Berlinje. Ze swojimi mólbami zapopaduje wón zaćišće na swojich jězbach do wšelakich kónčin swěta. Wot lěta 1990 poby wón mjez druhim w Maliju, Andaluziskej, New Mexiku a Jemenje.
Stajne blido nachwataja
Rakecy. Tradicionalne wobydlerske stajne blida w jednotliwych wsach Rakečanskeje gmejny dyrbjachu minjeny čas korony dla wupadnyć. Nětko je tamniši wjesnjanosta Swen Nowotny (CDU) nachwata. Mjeztym zo je wón tajke móžnosće rozmołwy w Stróži a Komorowje hižo poskićił, wotměje so přichodne stajne blido jutře, wutoru, w 19 hodź. we wjesnym towarstwowym domje Psowje (Oppitz). Tam móža zajimowani wobydlerjo aktualne problemy wsy kaž tež gmejny narěčeć, pokiwy dawać a so wo wuwiću komuny informować.
Wo serbskich naležnosćach
Čorny Chołmc. Serbskopolitiske krajne kruhi Zwjazka 90/Zelenych, Lěwicy a SPD w Sakskej přeprošeja na forum ze zastupjerjemi swojich a dalšich stron kaž FDP a CDU składnostnje wólbow přichodneho Němskeho zwjazkoweho sejma. Zjawny dialog wotměje so wutoru, 7. septembra, we 18 hodź. w Čornochołmčanskim Krabatowym młynje. Kandidatki a kandidaća za zwjazkowy sejm přednjesu swoje předstawy a ćežišća k naležnosći zastupnistwa Serbow w přichodnym zwjazkowym sejmje a přijmu zdobom nastorki, přeća a ideje wolerkow a wolerjow. Tež prěčne linije, profile a diferency jednotliwych stron k temje hodźa so rozjimać. Planowane su krótke předstajenje kandidatow a jich politiske ćežišća za Serbow w zwjazkowym sejmje, prašenja a nastorki přitomnych hosći kaž tež wotmołwy kandidatow na přinoški hosći a ewentualnje diskusija. Předewšěm měło hić wo kubłanje, strukturnu změnu, medije, financowanje a dalše. Zarjadowanje, kotrež Cosima Stracke-Nawka z Budyšina moderěruje, budźe dwurěčne.
Žony w srjedźišću
Kedźbu, gymnaziasća!
Žona na druhim městnje
Radwor. Škotowy turněr serbskich seniorow wčera w Radworskej „Zelenej hałžce“ je cyłkownje nawjedowacy Křesćan Weclich z 3 123 dypkami dobył. Druhe městno wobsadźi Sonja Krječmarjowa jako jenička žona w kole muži z 2 601 dypkom před Geratom Šmelingom (2 117). Z Měrkom Šmitom a Joachimom Mejglom móžachu kartyplacarjo dweju nowačkow witać. Přichodny turněr wotměje so 28. septembra w Haslowskim Bizoldec hosćencu.
Běchmy – smy – budźemy
Spominaja na maćicarja
Zakónča dźěłarničku
Miłoćicy. Wot 16. awgusta wobdźěli so 15 wuměłcow na lětušej mjezynarodnej rězbarskej dźěłarničce při Miłočanskej skale. Z finisažu ju jutře, sobotu, a njedźelu zakónča. Jutře wot 19 hodź. přeproša na hudźbny wječor. Njedźelu wot 10.30 hodź. poskića darmotne wodźenja při skale, při čimž jednotliwi wuměłcy wo swojich nastatych twórbach porěča. Nimo toho změja wšelake darmotne akcije za dźěći přihotowane. Hižo wot 10 hodź. zaklinči čěska dujerska hudźba, wot 13.30 hodź. budźe live-hudźba na klasiskich instrumentach słyšeć. Wo ćělne derjeměće budźe na woběmaj dnjomaj postarane.
Fundus sej wobhladać
Nowa Jaseńca. W nowowotewrjenym drastowym fundusu Moniki Cyžoweje na Hłownej 29 w Nowej Jaseńcy změja zajimcy njedźelu, 29. awgusta, wot 15 do 18 hodź. składnosć, sej we wobłuku dnja wotewrjenych duri rumnosće wobhladać. Wšitcy su wutrobnje witani.
Zetkaja so we wustajeńcy
Wot póndźele S 106 ponowja
Słona Boršć. W zwisku z nowym kružnym wobchadom pola Słoneje Boršće chcedźa wot póndźele, 30. awgusta, hač do 17. septembra statnu dróhu S 106 ponowić. Kaž wokrjes zdźěli, ma so to w dwěmaj wotrězkomaj stać. Wot 30. awgusta hač do 1. septembra ponowja puć wot kružneho wobchada hač k wotbóčce do Małeho Wjelkowa. Wottam hač ke kružnemu wobchadej pola Chelna přizamknje so druhi wotrězk. Hač do 17. septembra wobstaraja zbywace dźěła. Wšón čas budźe S 106 dospołnje zawrjena a wokołopuć wupisany.
Lisćiki skazać
Smochćicy. Na zhromadne čitanje dźiwadźelnikow Romana Knižki a Thomasa Arnolda přeprošuje Smochčanske kubłanišćo swjateho Bena 7. septembra w 19.30 hodź. Wobaj čitataj z twórbow židowskich awtorow Stefana Zweiga, Josepha Rotha a dalšich. Nimo toho powědataj stawiznički ze wšědneho žiwjenja. Zastupne lisćiki za 15 eurow, potuńšene za 7,50 eurow, dóstanu zajimcy pod internetnej adresu www.lausitz-festival.eu.
Lisćiki za oratorij skazać
Termin njezabyć
Za poetryslam so přizjewić
Wotrow. Wot přichodneje póndźele hač do 25. awgusta přewjedźe kubłanska referentka Domowiny za młodźinu Virginia Hanuzowa dźěłarničku serbskich a druhich młodych poetow. Jessy James LaFleur dźěłarničku pod hesłom „Zhubjeni poeća“ nawjeduje. Štóž chce so wobdźělić, njech přizjewi so hač do zajutřišeje njedźele e-mailnje pod virginia. .
Hudźba při sportnišću
Němske Pazlicy. Składnostnje Kamjenskeho měšćanskeho swjedźenja, kiž so takrjec město Boršće wotměje, přeproša zajutřišim, njedźelu, wot 17 hodź. na 19. koncert dujerskeje hudźby k Němskopazličanskemu sportowemu a wólnočasnemu centrumej. Koncert wuhotuje Kamjenski dujerski orchester.
