Točenje sej wobhladać
Konjecy. Tele dny su w Delanach probowe točenja za móžny Němski centrum za astrofyziku zahajili. Po wšěm zdaću maja wone pjeć do šěsć tydźenjow trać. Zajimcy budu sej najskerje wot srjedź měrca točenske dźěła wobhladać a na městnje wjace wo móžnym wulkoprojekće a wo dźensnišich móžnosćach astrofyziki zhonić móc. Předwidźane je to za mjeńše skupiny a šulske rjadownje, kotrež su rady witane. Zajimcy měli so za to sčasom přizjewić, a to e-mailnje pod .
Pokazaja nowu wustajeńcu
Budyšin. Z tysaclětnymi stawiznami Hornjeje Łužicy zaběra so nowa wustajeńca, kotraž budźe wot soboty, 19. februara, w Muzeju Budyšin widźeć. W přehladce prezentuja wuslědki dwulětneho projekta Interreg, zaběraceho so ze slědami słowjanskeho wobsydlenja na terenje historiskeje Hornjeje Łužicy. Sakski krajny zarjad za archeologiju a antropologiski institut Wrócławskeje uniwersity stej na wjacorych městnach wokoło Budyšina a wuchodnje Nysy zemske přepytowanja přewjedłoj. Jich wuslědki budu we wustajeńcy do konteksta hižo znatych namakankow zarjadowane.
W prózdninach do fabriki
Hórnikecy. Kajke bě dźěło w briketowej fabrice, rozłoža zajimcam we wosebitym prózdninskim poskitku w Hórnikečanskej energijowej fabrice, a to jutře, 16., kaž tež štwórtk, 17. a pjatk, 18. februara, stajnje w 10.30 hodź. We wobłuku wodźenja po fabrice wobdźělnicy zhonja, kak strašne a mazane tam dźěło něhdy bě, kak su wulke mašiny posłužowali a kotre nadawki ludźo na wšelkich městnach mějachu. W kwisu maja dźěći na najwšelakoriše prašenja wo brunicy, briketach a fabrice wotmołwić. Jenož te, kotrež derje připosłucha, změje na kóncu dosć briketow w swojim bowje. Jako myto móža sej mali wobdźělnicy wosebity briket sobu domoj wzać.
Nalětnja pycha za cyrkwje
Šulerjow přizjewić
Budyšin. Kónc februara a spočatk měrca móža starši swoje dźěći do přichodneho 5. lětnika Serbskeje wyšeje šule Budyšin za šulske lěto 2022/2023 přizjewić. Dokładne terminy su 24. a 25. februara stajnje wot 8 do 12 hodź. kaž tež 28. februara a 1. do 3. měrca. stajnje wot 7 do 16 hodź. Komuž so tele dny njehodźa, móže sej swójski termin dorěčeć, a to pod telefonowym čisłom 03591/ 527 350 abo e-mailnje pod . Za přizjewjenje trěbne su wupjelnjeny přizjewjenski formular, kubłanske doporučenje, narodźenske wopismo, połlětna informacija wot 11. februara 2022 a dopokaz šćěpjenja pře wosypicy.
Zanjesetaj drohoćinki
Kamjenc. Renoměrowanaj hudźbnikaj staj sobotu, 12. februara, we wobłuku 53. Kamjenskich Lessingowych dnjow z hosćom. Staj to husler Kolja Lessing a gitarist Johannes Monno. Jeju koncert „Drohoćinki z baroka a romantiki“ dožiwja zajimcy wot 19 hodź. w Kamjenskej radnicowej žurli. Zastupne lisćiki za 17 eurow, potuńšene dźewjeć eurow, poskićuja w Kamjenskej měšćanskej informaciji. Při wječornej kasy płaći lisćik 18,50 eurow.
Šulerjow přizjewić
Ralbicy. Lětsa stej dwě móžnosći šulerki a šulerjow do 5. lětnika Serbskeje wyšeje šule Ralbicy přizjewić, wosobinsce w času wot 28. februara hač do 4. měrca abo z listom (póštu). Na šuli budźe to k sćěhowacym časam, při dodźerženju płaćiwych hygieniskich předpisow, wosobinsce móžno: 28. februara wot 8 do 14 hodź, 1. měrca wot 10 do 18 hodź., 2. měrca wot 8 do 12 hodź., 3. měrca wot 8 do 14 hodź. a 4. měrca wot 8 do 10 hodź. Z póštu dyrbi přizjewjenje hač do 2. měrca w šuli předležeć. Starši njech na trěbne podłožki njezabudu.
Staršisko-dźěćacy kruh
Z dźěćimi hornčerić
Radźićeljo wuradźuja
Worklecy. Wobstarać a natwarić wobchad změrowacu připrawu budźe jedna z temow přichodneho posedźenja Worklečanskeje gmejnskeje rady. Jeje čłonojo zetkaja so zajutřišim, štwórtk, w 19 hodź. w jědźerni Worklečanskeje wyšeje šule. Dale zaběraja so radźićeljo z wotnajenskim zrěčenjom za kupowy hat kaž tež z prašenjom, hač měł wjesnjanosta přichodnje dale čestnohamtsce abo snano hłownohamtsce skutkować. Zajimcy su wutrobnje přeprošeni.
Poskićuja lisćiki
Informuja radźićelow a zajimcow
Chrósćicy. „Trjebaja małe gmejny w Sakskej hłownohamtskeho wjesnjanostu?“, rěka hesło informaciskeho zarjadowanja, kotrež je jutře, wutoru, w 19 hodź. w Chróšćanskej wjacezaměrowej hali „Jednota“. Na nje přeproša zarjadniski zwjazk Při Klóšterskej wodźe radźićelow wšěch pjeć přisłušacych gmejnow kaž tež zajimowanych wobydlerjow. Přednošować budu wjacori referenća.
Za wiki so přizjewić
Slepo. Wulke rjemjeslniske a burske wiki budu jedna z atrakcijow we wobłuku swjedźenskeho kónc tydźenja wot 17. do 19. junija k 750. róčnicy wobstaća Slepoho. Za nje móža so rjemjeslniske zawody, wikowarjo a towarstwa hišće přizjewić. Doba přizjewjenja je hač do 10. februara podlěšena. Formular nadeńdu zajimcy pod .
Sadowcy prawje wurězować
Wojerecy. Sadowcy prawje wurězować, to móža zajimcy 19. februara wot 9 do 12 hodź. na Wojerowskej dźěćacej a młodźinskej farmje nawuknyć. Pod fachowym nawodom nazhoniteje zahrodnicy Janiny Gräulich wobdźělnicy na městnje někotre sadowcy wurězaja. Za to měli sej woni porjadne zahrodniske nožicy a snano tež mału piłu sobu přinjesć. Wobdźělenje płaći na wosobu dwanaće eurow. Na kóždy pad je přizjewjenje pod trěbne.
Zastupne lisćiki dobyć
Budyšin. Wobdźělenska a wobhospodarjenska towaršnosć Budyšin (BBB) swjeći lětsa 30. róčnicu wobstaća. Při tej składnosći wulosuja kóždy měsac 30 atraktiwnych mytow. W februaru móža zajimcy 30 swójbnych zastupnych lisćikow (stajnje za dweju dorosćeneju a dwě dźěsći) za błudźišćo při Małowjelkowskim prazwěrjencu dobyć. Wobdźělić móža so zajimcy hač do 28. februara na internetnej stronje . Hač do srjedź přichodneho měsaca dobyćerjow wulosuja a jich pisomnje informuja.
Durje wirtuelnje wotewrjene
Sport za muži
Prózdninski poskitk
Smjerdźaca. Za dźěći w starobje sydom do dźesać lět poskići Serbske šulske towarstwo prózdninske dny wot 14. do 17. februara w kubłanskim srjedźišću LIPA w Smjerdźacej a to wšědnje wot 9 do 15 hodź. Na šulerjow čakaja zabawa w sněze, wopyt w muzeju, rejwanje, zaběra ze skludnym psom, wotputanje z jogu, wuspytanje dźěła jako pjekar, hudźenje a paslenje. A wězo chcedźa zhromadnje hry hrać a wjesołe a zajimawe prózdninske dny dožiwić. Tež swójske ideje su prašane a witane. Přizjewjenja přijimuja hač do 9. februara pod pro abo pod telefonowym čisłom 0 35 91 / 55 02 07. Poskitk płaći na šulerja 40 eurow inkl. zastaranje.
Za projekt so přizjewić
Chrósćicy. Za nowu serbsku spěwohru „Z TOBU – Bohu swjećene lěto“ su dźěći do wulkeho chóra prošene. Spěwohra nawjazuje na CD, kotruž běše Towarstwo Cyrila a Metoda z.t. zhromadnje ze Załožbu za serbski lud w lěće 2000 wudało. Předstajić chcedźa ju w oktobru w Chróšćanskej „Jednoće“. Nadrobnje wopisany je projekt w Katolskim Posole.
