Wo přichodźe žiwjenja na wsach diskutowali
Njebjelčicy (JK/SN). „Wutworić na wsach přijomne wuměnjenja za dobre a wnučkam kmane žiwjenje, je nadawk za cyłu towaršnosć a rozdźělne politiske nahlady přesahowacy nadawk.“ To rjekny Njebjelčanski wjesnjanosta Tomaš Čornak (CDU) k zahajenju zarjadowanja sakskeje SPD wčera wječor w Njebjelčicach. Zhromadnje ze zapósłancom krajneho sejma Haraldom Baumannom-Hassku stej zapósłanča Europskeho parlamenta, ratarska politikarka Maria Noichl, a kandidatka Budyskeho wokrjesa za Sakski krajny sejm Katrin Michel (wšitcy třo SPD) wo tym rěčałoj, kak hodźeli so na wsach runohódne žiwjenske poměry wutworić. Při tym dźěše politikarjam w prěnim rjedźe wo to, što scyła wupraja zapřijeće wnučkokmanosć a što wočakuja wjesni wobydlerjo za to wot politiki.
Krótkopowěsće (30.07.19)
Kandidatow namjetować
Budyšin. Zwjazkowe předsydstwo Domowiny namołwja sakske župy, towarstwa a zwjazki, zapodać kandidatne namjety za wólby Rady za serbske naležnosće Sakskeje na dobu 2019–2024. Namjety maja hač do 15. awgusta do Domowinskeho zarjeda dóńć. Dalše informacije su wozjewjene na internetnej stronje www.domowina.de/hsb/aktualnosce.
Komolka ministerce Ernst pisała
Choćebuz. Kathleen Komolka ze staršiskeje iniciatiwy za wučbu serbšćiny je braniborsku ministerku za kubłanje, młodźinu a sport Brittu Ernst (SPD) wo wosobinsku rozmołwu do wólbow prosyła. Komolka chce ministerce rozłožić staw peticije wo zachowanju wučby a jej přepodać lisćiny podpismow a komentary. Dalša tema ma być perspektiwa serbskeho šulskeho postajenja.
Nowy šef centruma DEBAG
Frontalnje do štoma zrazył
Awtorka čita
Budyšin. Přichodne zarjadowanje Budyskeho kluba wuchowarjow rěče wotměje so jutře, wutoru, we 18 hodź. w Budyskim hosćencu „Sprjewina pensija“. Tam budźe awtorka Annelies Schulz z hosćom. Wona čita z manuskripta swojeho romana „Holunderzeit“. Hosćo su kaž stajnje lubje witani. Zastup je darmotny.
Na wopyće w měsće
Budyšin. We wobłuku swojeho wólbneho boja chce kandidat SPD za wólby Sakskeho krajneho sejma Harald Baumann-Hasske jutře, wutoru, hromadźe ze zapósłanču Europskeho parlamenta Mariju Noichl Budyšin wopytać. Wot 9.30 do 12.30 hodź. budźetaj wobaj w žónskim centrumje na Karla Marxowej 7. Maria Noichl poda swój wid na aktualne połoženje Europy a wotmołwja tohorunja na prašenja wopytowarjow. Zajimcy su tuž wutrobnje witani. Mjez druhim chcedźa wo tym rěčeć, hač je čłonstwo w EU za ludźi w Hornjej Łužicy scyła wažne abo nic.
Wosebity poskitk zwěrjenca
Bizonam jednora trawa dosaha
Němske Pazlicy (SN/MWj). Eksotiske zwěrjata mjeztym ani tak eksotiske hižo njejsu. Na lamy a alpaki smy so nimale hižo zwučili a tež pisane papagaje tu a tam wuhladaš. Wulke bizony pak znajachmy dotal jeno ze zwěrjenca abo z indianskich filmow. Nětko móžeš tele wulke skoćata takrjec live dožiwić, mjenujcy hdyž po kolesowanskej šćežce z Njebjelčic do Němskich Pazlic jědźeš. Tam Volker Synatschke wot lońšeho awgusta pjeć tychle wulkich zwěrjatow, kotrež słušeja do skupiny howjadow, plahuje.
„Chcych swoju łuku někak zmysłapołnje wužiwać, ale na někajke wosebite wašnje. Přez němski zwjazk plahowarjow bizonow sym so z tymlemi zwěrjatami bliže zaběrał a tak sym swoju ideju poněčim zwoprawdźił“, powěda Kamjenčan, kiž poprawom w metalowej branši dźěła. Z porjadnej twarskej dowolnosću a z přihłosowanjom lěsnistwa kaž tež ratarskeho a přirodoškitneho zarjada je potom swoju łuku z wysokim milinowym płotom wobhrodźił a bizonam škit před dešćom natwarił. Nimo toho stwori jara masiwnu metalowu připrawu, kotraž skoćatam přistup na pastwu zmóžnja abo nic.
Policija (29.07.19)
Mopedy přiběrajcy požadane
Šěrachow. Mopedy z časa NDR typa S 50 a S 51 su tak požadane, zo so w přiběracej měrje paduši na nje měrja. Tak je so kónc tydźenja tajke jězdźidło w Šěrachowje zhubiło. Jeho hódnotu trochuje policija na 1 800 eurow. Dalši moped S 51 pokradnychu njeznaći něhdźe w samsnym času na Grodkowskej dróze w Zhorjelcu. Škoda, kotruž je wobsedźer tak poćerpjeł, wučinja w tymle padźe něhdźe 1 400 eurow.
Termin nětko jasny
Při Hórnikečanskim jězoru hladaja z wulkej nadźiju do přichoda
Wulke Ždźary (AK/SN). Rebelojo Hórnikečanskeho jězora chcedźa wuwiće při jězoru dale kritisce přewodźeć. „Prócujemy so wo dohlad posudka wo stabiliće skłoninow přez sakski wyši hórnistwowy zarjad“, praji předsyda towarstwa Rebelojo Hórnikečanskeho jězora Werner Petrick. Wot awgusta 2013 towarstwo wobsteji. Jako swoju najnowšu akciju zasadźowachu so za hnydomne wotewrjenje kupanskeho pobrjoha na Wulkoždźarowskim boku. Runje tak chcychu docpěć, zo so dospołne zawrjenje kołowokoło jězora zběhnje. „To běštej našej wulkej cilej. Bohužel njejsmy jej docpěli“, předsyda rozłožuje. „Smy tež swoje namjety za masterski plan Hórnikečanskeho jězora zapodali.“ Při tym dźe wo jeho dalše zmysłapołne a dołhodobne wužiwanje. Něhdźe w aprylu 2022 ma Hórnikečanski jězor za kupanje zaso přistupny być. Tež potom pak budu hišće zbywace dźěła. „Potrjecheni trjebaja wěstosć, zo móhli na swojich ležownosćach nowy započatk planować“, měni Werner Petrick.
Swjedźeń z dobrym niwowom
Serbske Pazlicy (aha/SN). Před 28 lětami přewjedźechu w Serbskich Pazlicach w zamołwitosći wjesneho kluba prěni wjesny swjedźeń po politiskim přewróće. Kaž tehdyši předsyda Achim Kral wčera hódnoćeše, „njemóžeš tehdyše spočatki z dźensnišim niwowom přirunać. Tež zajim je kóžde lěto přiběrał.“ Jedne pak so změniło njeje: Stajnje mějachu posledni kónc tydźenja w juliju rjane wjedro.
Etat přizwoleny, dyrbja pak lutować
Wojerecy (AK/SN). Dwójny hospodarski plan města Wojerecy za lěće 2019 a 2020 je přizwoleny. Přiwšěm pak namołwja prawniski dohlad wokrjesa Budyšin město dale zaměrnje lutować a podawa w swojim přizwolenju wjacore pokiwy k tomu. Wo tym je Wojerowski wyši měšćanosta Stefan Skora (CDU) měšćansku radu na swojim minjenym posedźenju pisomnje informował.
Krótkopowěsće (29.07.19)
Film Vouka wuznamjenjeny
Kolkata. Krótkofilm Nature_Nature, kotryž je tuchwilu we wobłuku wustajeńcy „PŘECHOD 03 – WOBRAZY KRAJINY“ w Budyskim Serbskim muzeju widźeć, bě na 8. mjezynarodnym krótkofilmowym festiwalu w indiskim Kolkata (bywše Kalkutta) z mytom za najlěpši třih wuznamjenjeny. Hač do 25. awgusta je film hišće w Budyšinje widźeć, potom w Słowjenskej, Awstriskej a w Choćebuzu.
VVO winu wotpokazuje
Drježdźany. Na železniskimaj čaromaj Kamjenc–Drježdźany a Kinspork–Drježdźany jězdźa město ćahow tuchwilu busy. Čarje wobhospodarjace předewzaće Sakska měšćanska železnica bě zwiski minjeny štwórtk financnych ćežow dla njejapcy zastajiła. Wobchadny zwjazk VVO kóždužkuli zamołwitosć wotpokazuje.
Na kursaj čěšćiny
