Kapacita wukubłanišća dawno wučerpana
Narć (FAG/SN). Wot lětušeho nalěća zwoprawdźeja na terenje Narćanskeje wohnjowoborneje šule za katastrofowy škit wulkej twarskej naprawje. Tam nastawatej internat z połsta městnami kaž tež wukubłanske a zarjadniske twarjenje z wjacorymi specielnje wuhotowanymi wukubłanskimi rumnosćemi. Mjeztym zo ma internat kónc lěta dokónčeny być, chcedźa tamne twarjenje hižo za něhdźe dwaj měsacaj přepodać.
Kapacity wohnjowoborneje šule běchu dawno wučerpane, čehoždla hižo dlěši čas wo tym rozmyslowachu, zarjadnišćo rozšěrić. Nětko wužiwaja za to srědki tak mjenowaneje wukubłanskeje ofensiwy Swobodneho stata Sakskeje.
Kóždolětnje wukubłuja w Narću něhdźe 4 000 ludźi w najwšelakorišich wu- a dalekubłanskich kursach. Potrjeba pak je wo wjele wjetša, wšako dohromady něhdźe 80 wšelakich kursow poskićeja. Wot spočatka 1970tych lět Narćanska šula wobsteji. Je to jeničke centralne wukubłanišćo wobornikow w Sakskej.
Wo antiserbskich nadpadach
Wuhotuja dworowy swjedźeń
Dubrjenk. Mjeztym wosmy raz wuhotuje Krječmarjec swójba w Dubrjenku dworowy swjedźeń, a to njedźelu, 25. awgusta. Wot 11 hodź. porjedźeja tam wobjed, k čemuž zaklinči dujerska hudźba kapały „Hochsteinmusikanten“. Wot 14 hodź. wubědźuja so jěcharjo w kałanju wěnca, w 16 hodź. přizamknje so napřemojězdźenje konjacych zapřahow. Nimo toho budu jězby z konjacymi zapřahami móžne, wot 15.30 hodź. poskića potom kofej a tykanc. Na wopytowarjow čakaja dale paslenje za dźěći, skakanski hród a samotwarjene awta typa Hot Rod.
Saněruja farsku bróžnju
Wochozy (AK/SN). Šwjelowu bróžnju we Wochozach nětko saněruja, zdźěli wjesny předstejićer Mario Weber. Ćěslojo z Dźěwina su bróžnju za Wochožanskim farskim domom wottwarili. W Dźěwinje nětko jednotliwe dźěle saněruja a po potrjebje wuměnja. Na to chcedźa bróžnju zaso natwarić a za wšelake kulturne zarjadowanja a zetkanja wužiwać.
Policija (21.08.19)
Wotpadki zapalił
Budyšin. Wotpadkowe sudobjo je so předwčerawšim dopołdnja na Budyskej Jordanowej paliło. Wjacorym wobydlerjam so poradźi płomjenja zhašeć, prjedy hač wohnjowi wobornicy přijědźechu. Cyle w bliskosći spalenych zbytkow wuhladachu pasanća poł hodźiny pozdźišo muža, kiž drje chcyše runje spěrawe wotpadki zapalić. Přiwołani policisća na to 32lětneho identifikowachu. We wobłuku přepytowanja dyrbi kriminalna policija nětko zwěsćić, hač bě muž tež wotpadkowe sudobjo zapalił.
Radźićelka mandat cofnyła
Ćežki rozsud za Mułkečansku wjesnu předstejićerku
Slepo (CK/SN). Po tym zo je prawniski dohladowanski zarjad Zhorjelskeho wokrjesa płaćiwosć komunalnych wólbow w Slepjanskej gmejnje wobkrućił, je so tam wčera gmejnska rada skonstituowała. Z ćežkej wutrobu Manuela Wolf (wólbne zjednoćenstwo ST Lok Slepo) zwurazni, zo swój mandat w gmejnskej radźe cofnje. Wona je dźakowna za wólby, tež na čestnohamtske dźěło w gmejnskej radźe je so wjeseliła. „Wot lěća pak dyrbju swojeju staršeju hladać, tak zo dźěło we wjesnej radźe a zdobom w gmejnskej radźe njezmištruju“, Manuela Wolf swój rozsud wopodstatni. Tři tydźenje bě wo tym rozmyslowała. Ale žiwjenje „je druhdy hinaše, hač sej je přeješ“, wona rjekny. W Mułkečanskej wjesnej radźe pak chce dale sobu dźěłać.
Žonopowe bowy jara požadane
W chorowni darmotnje do syće
Stajnje a wšudźe internetnje z cyłym swětom zwjazany być zdawa so dźeń a samozrozumliwiše. Po tym zo města a hotele swojim wopytowarjam darmotny přistup zmóžnjeja, poskićeja nětko tež w chorownjach W-lan.
Wojerecy (SN). Wot spočatka awgusta funguje we Wojerowskim klinikumje łužiskeje jězoriny za pacientow škričkowa syć do interneta. Po tydźenjomaj pospytneho časa su za tónle projekt oficialnje zelenu swěcu dali.
W-lan wužiwać je za pacientow klinikuma dosć jednore. Štóž so za to zajimuje, praša so w recepciji za płaćiwym přistupnym kodom, nawjaza ze swojim mobilnym nastrojom kaž smartphonom abo tabletom zwisk k syći „LSK-Gast“ a zapoda na prěnjej stronje swoje přistupne daty. Jeli dlěši čas w chorowni přebywa, móže sej po potrjebje dalši přistupny kode wotewzać, rěka w nowinskej zdźělence klinikuma.
Dźiwadłowy ćah do Choćebuza dojěł
Chcedźa žiwu serbskosć w Budyšinje demonstrować(7)
Štó a što tči za serbskimi projektami, kotrež su we wobłuku wubědźowanja Sakskeho fondsa „Čiń sobu!“ mytowali? W lětušim lětnim serialu Serbskich Nowin wam projekty předstajamy.
Tomaš Suchy z Hrubjelčic prócuje so jako Budyski Serb stajnje wo žiwu dwurěčnosć w měsće. Zhromadnje z přećelemi załoži wón hižo před tójšto lětami Škit Budyšin, mjeztym zapisane towarstwo. Woni su hłownje za swoje wolejbulowe kmanosće znate, wobdźělichu pak so w běhu časa mjez druhim hižo někotre razy na schadźowance a zestajichu samo serbski online-spěwnik.
Składnostnje staroměšćanskeho swjedźenja zarjadowa Škit Budyšin loni na zahrodźe Serbskeho ludoweho ansambla prěni „škitny wječor“. Běše to zabawne serbske zarjadowanje ze zhromadnym spěwanjom, z reju a hudźbu. W podobnej formje chcedźa wuspěch lětsa rady wospjetować. Za to dobychu myto we wobłuku wubědźowanja Sakski fonds „Čiń sobu!“.
Krótkopowěsće (21.08.19)
Inwesticiske naprawy rozłožił
Trjebin. Šef sakskeje statneje kenclije Oliver Schenk je dźensa dopołdnja w Trjebinje infrastrukturne inwesticije w gmejnomaj Slepo a Trjebin rozłožił. Naprawy bě sakski kabinet hakle wčera w Drježdźanach wobzamknył. Změny rewěroweho koncepta za Wochožansku jamu a njewotbagrowanja dźělow mjenowaneju gmejnow dla dyrbja na wsach nětko masiwne infrastrukturne zastatki nachwatać.
50 000 eurow wjac za projekty
Drježdźany. Wulkeho wothłosa dla rozšěri sakske ministerstwo za wědomosć a wuměłstwo (SMWK) fonds za małe kulturne projekty na wsach wo dalše 50 000 eurow. Dotalne spěchowanske srědki dohromady 200 000 eurow, kotrež bě SMWK Sakskej kulturnej załožbje w meji přewostajiło, su z połsta přizwolenymi próstwami hižo wučerpane.
Lupina kóncuje domjace kwětki
