Krótkopowěsće (01.04.16)
Połojca ma křižerki za móžne
Budyšin. Połojca wobdźělnikow na jutrownym naprašowanju Serbskich Nowin online měni, zo přichodnje tež křižerki w serbskich jutrownych procesionach sobu jěchaja, 46 procentow njemóhło sej to předstajić a štyri procenty su njerozsudźene. Tež dźensa nadeńdźeće w interneće pod www.serbske-nowiny.de nowe naprašowanje
Hans-Dietrich Genscher njeboh
Bonn. Wjelelětny wonkowny minister Němskeje Hans-Dietrich Genscher je njeboh. Politikar FDP je minjenu nóc 89lětny na zaprajenje wutroby a krejneho wobtoka zemrěł, jeho běrow w Bonnje zdźěli. Genscher bě wot 1974 hač do 1992 wonkowny minister a jako tajki na procesu zjednoćenja Němskeje na wusahowacym městnje wobdźěleny.
Bombu znješkódnili
Policija (01.04.16)
Sněh njezboža zawinił
Porchow. Po wšěm zdaću bě sněh dźensa rano na tym wina, zo je k wjacorym njezbožam na zwjazkowej dróze A 4 mjez Drježdźanami a Zhorjelcom dóšło. Krótko po wosmich je wodźerka Opela mjez Ohornom a Porchowom do škitneho wobhrodźenja zajěła. Žona a jeje dźowka so na zbožo zraniłoj njejstej. Jenož něšto mjeńšin po tym sta so dalše njezbožo. Tónraz mjez Porchowom a Ohornom, jenož něšto metrow wot tamneje zražki zdalene. Tu je wodźer awta typa Fiat kontrolu nad jězdźidłom zhubił a prasny tohorunja do škitneho wobhrodźenja. Tež wón a sobujěduca njejstaj so zraniłoj. Do wobeju směrow zwjazkoweje dróhi dóńdźe ke krótkemu haćenju wobchada.
Bodo prazwěrjenc w lěću wopušći
Mały Wjelkow (SN). Dypkownje k zahajenju lětušeje sezony w Małowjelkowskim prazwěrjencu maja tam wosebitu nowosć, kotraž pak njeje jeno zwjeselaca. Z jednym smějatym a jednym płakacym wóčkom je Budyska wobdźělenska a wobhospodarjenska towaršnosć, kotraž so wo prazwěrjenc stara, dźensa zdźěliła, zo woblubowana maskotka Bodo prazwěrjenc spočatk julija wopušći.
Za Boda dóstachu poskitk kaliforniskeho filmoweho studija Sony Pictures k sobuskutkowanju we wospjetowanju kultoweje serije z 1980tych lět „ALF“. Kajka budźe dokładna koncepcija noweje serije, filmowe studijo wězo njepřeradźa. Wěste je: ALF, pochadźacy jako zwonkazemski poprawom z planeta Melmac, zeznaje Boda we wobłuku napjateho pućowanja po zemskich stawiznach a wozmje jeho pozdźišo sobu na nowy planet, kotryž chcetaj wobaj zhromadnje wotkryć. Zrěčenja su mjeztym podpisane a prěnje filmowe přihoty w městačku Culver City, hdźež ma Sony Pictures Animation Inc. swoje sydło, su hižo zaběželi.
Swojeho patrona česćili
Njeměr w biosferowym rezerwaće hladanja dla
Stróža (UM/SN). Štóž bě dźensa na Dnju wotewrjeneje wowčernje w Dołhej Boršći (Förstgen), wuhlada tam we wowčerni spěchowanskeho towarstwa za přirodu hornjołužiskeje hole a hatow porno zašłym lětam tójšto mjeńše stadło wowcow. „Mamy jenož hišće 150 město spočatnje 400 maćernych wowcow“, rozłoži jednaćelka towarstwa Annett Hertweck. Při tym běchu hródź hakle wot lěta 2012 do 2014 na terenje něhdyšeje kormjernje howjadow nowu natwarili – za 600 skoćatow. „Wězo je ta nětko přewulka“, přizna jednaćelka.
Přihotuja twarske ležownosće
Planowanje wulke wužadanje
Projekt přichodneje wokrjesneje dróhi přez Miłoćicy předstajili
Miłoćicy (aha/SN). Bě prawje, zo je Njebjelčanski wjesnjanosta Tomaš Čornak (CDU) na wčerawše posedźenje Njebjelčanskeje gmejnskeje rady přeprosył do socialneho domu „Při žabje“ w Miłoćicach. Wulka ličba Miłočanow wuži składnosć, zo bychu zhonili wo planowanym wutwarje 2,6 kilometrow dołheho wotrězka wokrjesneje dróhi wot Smječkečanskeho kružneho wobchada přez Miłoćicy na statnu dróhu S 100 mjez Pančicami a Kamjencom. Rozłožujo předwidźany projekt pokaza zamołwity planowar dr. Ralf Hennig na wjacore problemy a móžne warianty. Nowa dróha budźe šěsć metrow šěroka a 600 metrow dołhi wotrězk přez Miłoćicy wo poł metra wuši, za to pak w křiwicach sydom metrow šěroki. We wsy připrawja połdra metra šěroki chódnik. Zwonka wsy powjedźe tón jako meter šěroki kolesowarski pućik dale. Trjeba je, zo so wjacore milinowe šćežory přestaja, busowa čakarnja so na druhe městno přepołoži a so dwaj swjatej křižej a pomnik přeměstnja. Wjesny wobraz pak so wulce njezměni.
Sernjansku syć rozšěrja
Hospodarski plan 2016 zaměroweho wopłóčkoweho zwjazka Při Klóšterskej wodźe naliča aktualne a přichodne ćežišća. Kaž zakonsce předpisane, bě dokument zjawnje wupołoženy. Serbske Nowiny su sej jón bliže wobhladali.
Wudwor (AK/SN). Zaměrowy wopłóčkowy zwjazk Při Klóšterskej wodźe (AZV) koncentruje so lětsa kaž tež přichodnje na Wotrow, Jědlicu, Sernjany a Porchow. Tole wuchadźa ze zjawnje wupołoženeho hospodarskeho plana zaměroweho zwjazka.
