Dyrbi to być?
Krótkopowěsće (30.04.19)
Wałporne wohenje budu
Budyšin/Zhorjelc. Móžny zakaz wałpornych wohenjow suchoty dla je z blida. Po dešću zašłych dnjow njewidźi Budyski wokrjesny wohnjowy mišter Manfred Pethran přičiny, je zakazać. Mjeztym su njeznaći wjac hač 21 hromadow w Zhorjelskim a Budyskim wokrjesu dočasnje wotpalili, zdźěli Zhorjelska policajska direkcija. Mjez druhim je so w Hrubjelčicach, Kanecach, Malešecach a Złyčinje paliło.
Akciski tydźeń zahajeny
Drježdźany. Z wjacorymi zarjadowanjemi su dźensa akciski tydźeń „Zhromadne šule w Sakskej – Dlěje zhromadnje wuknyć“, kiž traje hač do 5. meje, zahajili. Wobdźělene su na tym tež Wojerecy, Kamjenc a Žitawa. Dotal předleži 33 815 podpismow, trěbne je 40 000. Zaměr iniciatiwy je, zo dźěći dlěje zhromadnje wuknu a njetrjebaja so po 4. lětniku rozsudźić, hač du na gymnazij abo nic.
Wudrjeńca zaso přistupna
Młodźi Brětnjenjo rejowali a nałožki předstajili
Budyšin (ML/SN). Žurla Budyskeho Serbskeho muzeja bě ćichu sobotu popołdnju z něhdźe 150 hosćimi přepjelnjena, kotřiž přewšo zajimowani hodźinski program Serbskeho rejwanskeho towarstwa z Brětnje sćěhowachu. Štyri pory młodźinskeje rejwanskeje skupiny a wosom staršich a młódšich rejowacych dźěći we Wojerowskej narodnej drasće so publikumej z temperamentnymi a lóštnymi ludowymi rejemi a ze serbskimi jutrownymi nałožkami předstajichu. Młodej holcy z wulkimaj karanomaj w ruce zwobrazništej chodźenje po jutrownu wodu. Jutrownu póndźelu wopytaja mótki hač do dwanaće lět kmótry a kmótow a dóstanu jutrowne dary. Dźakowachu so po tym ze serbskimi a němskimi hrónčkami.
Tři nowosće k jubilejej
Ze štomom, winom a wustajeńcu 25. sezonu w klóšterskej zahrodźe zahajili
Pančicy-Kukow (SN/MWj). Tři winowe pjenki rostu wot wčerawšeho w klóšterskej zahrodźe w Pančicach-Kukowje. Wone běchu jedna z nowosćow, z kotrymiž tam wčera lětušu sezonu zahajichu. Něhdźe 450 ludźi so po derje hladanym zelenišću rozhladowaše. Je to hižo 25. sezona, kotruž wčera zahajichu. Kaž kóžde lěto sadźichu tež tónraz štom lěta, štož je lětsa dołhošiškaty wjaz (Flatterulme). Mjeztym zo činjachu to před lětami hišće při pućiku w Lipju, su nětko hižo wjacore štomy při klóšterskej muri nasadźene. Wčera přimaštaj so tam abatisa Gabriela Hesse a zapósłanc Sakskeho krajneho sejma Alojs Mikławšk (CDU) gratu.
Policija (29.04.19)
Kolesa wotšrubowali a pokradnyli
Biskopicy. Wot sydom nowych wosobowych awtow su njeznaći w nocy na sobotu w Biskopičanskim awtowym domje kolesa wotšrubowali a je pokradnyli. Pod awta połožichu plesternaki, kotrež běchu z dwora zwutorhali. Škoda wučinja něhdźe 28 000 eurow.
Při skale rostliny měnjeć
Miłoćicy. Njebjelčanska gmejna, towarstwo za zachowanje mnohotnosće wužitnych rostlin a towarstwo Kamjenjak přeprošuja na dalšu rostlinsku měnjensku bursu, kotraž wotměje so zajutřišim, srjedu, wot 14 hodź. při Miłočanskej skale. Tam móža wopytowarjo swoje samoćahnjene rostlinki z druhimi měnjeć abo je prosće wotedać. W 14 hodź. přednošuje Thomas Noack wo permakulturje a powjedźe hosći po zahrodźe, kotraž je pod tymle aspektom nastała.
Kak čłowjesce wostać?
Budyšin. We wobłuku wuměłstwoweho projekta „Swětło pozbudźa“ wotměje so srjedu, 1. meje, w 19.30 hodź. w zawodźe Kupke & Partner na Budyskej Njekowej 143 přednošk pod hesłom „Socialna wučba 4.0 – kak móžemy w času digitalizowanja čłowjesce wostać“. Heinrich Wullhorst z Duisburga zaběra so z prašenjom, hdźe su centralne towaršnostnopolitiske wužadanja našeho časa za digitalnu transformaciju a kotry wuznam ma katolska socialna wučba za tele wužadanja. Slěduje diskusija.
Koncertuja w cyrkwi
4 500 wopytowarjow na wikach
Stróža (CS/SN). Přirodowe wiki na dworje zarjadnistwa biosferoweho rezerwata Hornjołužiska hola a haty w Stróži so zawčerawšim znowa jako wopytowarski magnet wopokazachu. Hižo połdra hodźiny do wotewrjenja prěni wopytowarjo takrjec před durjemi stejachu. Woni so tež wot trochu dešća wottrašić njedachu. Scyła bě woda tónraz centralna tema němsko-serbskich přirodowych wikow. Pjeć wosobow wopřijaca dźiwadłowa skupina z čłonami z Lubija a Budyšina předstaji kruch wo potajnstwach Sprjewje, wo jeje třoch žórłach a wo hobru Sprjewniku.
Při pomniku za padłych pólskich wojakow na Fulkec hórce w ...
Krótkopowěsće (29.04.19)
Wo Praskimaj Serbowkomaj
Praha. Hilža Bartaková a Rosalia Jelinková steještej w srjedźišću wčerawšeho zarjadowanja Towarstwa přećelow Serbow w Praskim Serbskim seminarje. Wobě žonje pochadźatej z Łužicy: Hilža Bartková z Demjan (Diehmen) pola Huski a Rosalia Jelinková ze Smjerdźaceje. 90lětnej žonje běštej po wójnje kaž mnozy dalši z Łužicy dźěła dla do susodneho kraja šłoj a hač do dźensa w Praze bydlitej.
Spěchuja kulturne projekty
Lubin. Wokrjes Dubje-Błóta spěchuje lětsa znowa 55 kulturnych projektow. Cyłkownje přewostaja za nje 190 000 eurow. Mjez přizwolenymi su tež šěsć próstwow serbskich towarstwow. Tak dóstanu mjez druhim Spěchowanske towarstwo Tšupčanskeje zakładneje šule podpěru za Witaj-projekt „bilingualne wuknjenje“, wustajeńca „Słowjenjo a Němcy“ w Lubinje a koncertny rjad Bernda Pittkuningsa a Jana Řepki w štyrjoch rěčach.
177 milionow eurow škody
Kołowokoło Butroweje hory kolesować
Biskopicy (SN). Na mjeztym hižo 18. kolesowansku dožiwjensku čaru kołowokoło Butroweje hory přeprošuja 5. meje AOK, Little John Bikes, syć za dźěćace a młodźinske dźěło a hórski hosćenc na Butrowej horje. Projekt podpěrujetej tež lětsa napojowe předewzaće z Wopakeje a energijowy zastaraćel ENSO.
Start budźe w 9.30 hodź. na parkowanišću kupnicy REWE w Biskopicach. Wupruwowany reglement kolesowanskeje jězby je samsny kaž kóžde lěto. Nowa pak je čara, kotraž je kóžde lěto tróšku hinaša. Tež jednotliwe stacije po puću njebudu jenake. Startować smědźa jenož mustwa, kotrež wobsteja ze znajmjeńša dweju wosobow. Za zmištrowanje stacijow po puću dóstanu wone dypki. Přiwšěm nima to ryze wubědźowanje być, ale wjeselo ma w srjedźišću stać. Sobu činić móže kóždy z kolesom, kotrež je za nadróžny wobchad wěste. Młodostni pod 18 lětami trjebaja dowolnosć staršeju, jeli z nimaj hromadźe njestartuja. Tež swójby z mjeńšimi dźěćimi móža so wobdźělić.
