Wopisujetaj swój puć
Chrósćicy. Anke Wagner a Karl Malcher z Badensko-Württembergskeje staj hižo po wšelakich wotrězkach Jakuboweho puća nóžkowałoj – haj, staj so při tym zeznałoj a samo zalubowałoj. Pod hesłom „Dary Jakuboweho puća“ wopisujetaj mandźelskaj swój puć wot Basela přez Francosku do Santiaga de Compostela, a to jutře, 2. měrca, w 19.45 hodź. w Chróšćanskej putniskej hospodźe. W 16 hodź. hižo su dźěći na kino přeprošene.
„Stary lud“ so rozžohnuje
Budyšin. Poslednje zarjadowanje we wobłuku wustajeńcy „Stary lud – ze žiwjenja Łužičanow a Milčanow“ je w Serbskim muzeju w Budyšinje njedźelu, 3. měrca. W 15 hodź. započnje so wodźenje po wustajeńcy w němskej rěči, w 16 hodź. přizamknje so serbskorěčne z kuratorku Andreju Pawlikowej.
Nowačkow přizjewić
Ralbicy. Přizjewjenje šulerjow přichodneho 5. lětnika na Serbskej wyšej šuli Ralbicy budźe wot 4. do 8. měrca, a to póndźelu wot 8 do 14 hodź., wutoru wot 10 do 18 hodź., srjedu wot 8 do 12 hodź., štwórtk wot 8 do 14 hodź. a pjatk wot 8 do 11 hodź. Komuž so žadyn z terminow njehodźi, tón sej pod telefonowym čisłom 035796/ 96 836 hinaši čas wučini.
