Z dwuhodźinskim programom na žurli Serbskeho kulturneho centruma (SKC) swjećachu pjatk 50. róčnicu Serbskeho folklorneho ansambla Slepo. Slědowaše zhromadna zabawa ansamblowcow a jich přećelow na dworje jako dźak za lěta dołhu swěru.
Slepo (SN/HaJ) Nalada bě hižo wuběrna, jako so sobustawojo ansambla do wustupa za wulke zhromadne foto nastupichu. W ludowej drasće ewangelskich Serbow Slepjanskeje kónčiny a Ćiska so hudźbnicy, rejowarjo a spěwarjo do wulkeje kamery smějachu. Dołholětnu nazwučowarku rejowanskeho ćělesa Alenu Kubańkovu do swojeje srjedźizny zaměstnichu.
Tež wuměłskaj nawodaj Wolfgang Kotissek a Michał Janca smějkotacy so do kamery hladaštaj a wuprudźištaj žiwjenske wjeselo a sprawnu radosć. Wšako běchu tam na dworje sobustawojo, přećeljo, swójbni ansamblowcow a swěrni přewodźerjo awtentiskeje folklory.
