Móhło dawno jasne być
Nowy naćisk kónc februara předpołožić
Choćebuz (HA/SN). Domowinska župa Delnja Łužica hotuje so na swoju lětušu hłownu zhromadźiznu 9. měrca w Depsku. Z wjerškom w lětnym skutkowanju je so župne předsydstwo na swojim wuradźowanju minjeny štwórtk w Choćebuzu zaběrało. Jako hosći wočakuja na „hłownu“ braniborsku knježerstwowu społnomócnjenu za serbske naležnosće, statnu sekretarku dr. Ulriku Gutheil (SPD), a krajneho radu wokrjesa Sprjewja-Nysa Haralda Altekrügera (CDU).
Něhdźe 70 delegatam z 41 skupin a 25 towarstwow chce předsydstwo wo zdokonjanym rozprawjeć. Mjez druhim wo tym, kak je so župa zhromadnje z druhimi gremijemi a towarstwami prócowała loni do serbskeho sydlenskeho ruma přiwzate komuny do serbskeho žiwjenja zapřijeć. Na hłownej zhromadźiznje chce runje tak sylnje wabić za europsku iniciatiwu Minority SafePack a za krajne wubědźowanje „Serbska rěč je žiwa.“
Za Dźeń Saksow so přizjewić
Budyšin (SN/bn). Domowina namołwja serbske towarstwa a kulturne skupiny, na lětušim Dnju Saksow so wobdźělić. Swjedźeń wotměje so tónraz wot 7. hač do 9. septembra w Torgauwje. Zajimcy móža so nětko na internetnej stronje organizatorow přizjewić.
Referent Domowiny za kulturu a wukraj Clemens Škoda na to skedźbnja, zo wobsteji móžnosć, sej jězbne wudawki zdźěla narunać dać. Za to pak dyrbja so požadarjo hač do 1. měrca zawjaznje přizjewić. Domowinski zarjad skići w tym nastupanju podpěru. Serbja měli „swoju kulturu a rěč na swjedźenju towarstwow předstajić“, rěka k tomu w nowinskej zdźělence třěšneho zwjazka.
Dźeń Saksow – najwjetši ludowy a domizniski swjedźeń w swobodnym staće – je dotal stajnje něhdźe 250 000 hač do 600 000 wopytowarjow přiwabił. Lětsa zarjaduje jón kuratorij pod nawodom prezidenta Sakskeho krajneho sejma dr. Matthiasa Rößlera (CDU) 27. raz. Minjene lěta bě jeničce muski chór Delany prawidłownje serbsku kulturu na nim zastupował. Lětsa pak so spěwarjo terminowych přičin dla wobdźělić njemóža.
Njemóža přidatne projekty přewjesć
Budyšin/Choćebuz (SN/JaW). Lětuši hospodarski plan Domowiny je jedne z ćežišćow, z kotrymž chcedźa so čłonojo jeje zwjazkoweho předsydstwa přichodny pjatk w internaće Choćebuskeho Delnjoserbskeho gymnazija rozestajeć.
Byrnjež lětuši plan wurunany etat předwidźał, Domowinje nachwilne hospodarjenje ćeže načinja. Přičina je, zo njeje pobrachowaceho zwjazkoweho knježerstwa dla jeje etat hišće wobzamknjeny. „Dóstawamy tuž najprjedy jenož połojcu spěchowanja. Tohodla njemóžemy žane přidatne a wjetše projekty přewjesć“, rjekny referent třěšneho zwjazka za hospodarstwo Pětr Brězan na naprašowanje našemu wječornikej.
Póstne seminary zahajene
Smochćicy (rl/SN). Něhdźe sto zajimcow je lětuši prěni póstny seminar póndźelu do Domu biskopa Bena w Smochćicach přiwabił. Referentaj, něhdyši Budyski superintendent Reinhard Pappai a něhdyši krajny młodźinski farar ewangelskeje cyrkwje Harald Bretschneider z Drježdźan, tam napominaštaj, zo mamy tež dźensa hladajo na přiběrace brónjenje skedźbliwi być.
Přednošowarjej dopominaštaj na cyrkwinske měrowe hibanje w 1980tych lětach, w kotrychž běštaj wobaj aktiwnaj. „Europa bě tehdy pulwrowy sud“, rjekny farar Bretschneider. Wón skedźbni na symbol „Mječe na radlicy“ – hesło to, kotrež so dwójce w Starym zakonju jewi. Reinhard Pappai, kiž měješe tajki symbol tón wječor na pulowru přišity, skonstatowa hladajo na prašenje „Mječe na radlicy – bě žno to?“, zo „šće to em njebě“. Pokaza pak tež na to, zo dyrbiš druhdy brónje wužiwać, chceš-li agresorow přewinyć. Woprawdźite rozrisanje konfliktow wón z toho přiwšěm njewočakuje.
Za kulojtym blidom wo wožiwjenje serbskosće šło
Budyšin (SN/bn). Minjenu sobotu zetka so skupina 15 ludźi w Röhrscheidtowej bašće Serbskeho ludoweha ansambla, zo by za kulojtym blidom informelnje wo tym wuradźowała, kak hodźało so serbske žiwjenje wosebje zwonka serbskorěčneho žra wobchować a šěrić. „Asimilacija razantnje postupuje, a druhdy so prašam, hač ma serbske dźěło scyła hišće zmysł“, rjekny sobuiniciator zetkanja Mato Krygaŕ. „A tola njesměmy nakromne kónčiny spušćić. Što pak móžemy činić? To rozjimać je wotmysł našeho schadźowanja“, wón rozłoži. Sonja Hrjehorjowa, tohorunja sobuorganizatorka, doda: „Chcemy zwonka hižo wobstejacych strukturow a institucijow móžnosć skićić so prawidłownje zetkawać, mysle sej wuměnjeć a wo namjetach diskutować.“
Schild nowy předsyda Kamjenjaka
Wuměłstwowe towarstwo Kamjenjak ma nowe předsydstwo. Na lětušej čłonskej a wólbnej zhromadźiznje wuzwolichu čłonojo towarstwa Wielanda Schilda za noweho předsydu.
Njebjelčicy (SN/MiR). Dotalny předsyda towarstwa Ludwig Pickert bě čłonam towarstwa loni, krótko do kónca lěta z mejlku zdźělił, zo w zastojnstwje hižo dale skutkować njebudźe. Tuž běchu nowowólby trěbne.
Štyrnaće čłonow towarstwa bě srjedu wječor na zhromadźiznu do Njebjelčanskeho gmejnskeho zarjada přišło. Do wólbow mějachu wo změnje wustawkow wothłosować. Tak ma towarstwo wotnětka nimo němskeho Steinleicht e.V. tež oficialne serbske mjeno Kamjenjak z.t. Dale bě trjeba rozšěrić paragrafy wo zmysle skutkowanja towarstwa. Nimo nošerstwa kulturnych zarjadowanjow zapřijachu nětko mjez druhim starosć wo wuwiće permakultury a wobswětowe kubłanje.
Iniciatiwu dale podpěrać
Wojerecy (SN/at). Z mjezywuslědkami europskeje wobydlerskeje iniciatiwy Minority SafePack budźe so Zwjazkowe předsydstwo Domowiny na swojim přichodnym wuradźowanju 23. februara w Choćebuzu zaběrać. W přihotach na to su čłonojo prezidija temu wčera na posedźenju we Wojerecach rozjimali.
Kaž předsyda Domowiny Dawid Statnik wuzběhny, „je docpěće jednoho miliona podpismow po informacijach FUEN dźeń a bliše. Tróšku zadźiwani smy nad słabym wobdźělenjom w Němskej.“ Prezidij Domowiny namołwja tohodla wšitkich Serbow a jich přećelow, iniciatiwu hišće podpěrać a dalšich zwjazkarjow zdobyć. Podpisma su móžne w interneće pod www.minority-safepack.eu.
Prezidij je dale wo namjetomaj rozsudźił, serbskej ćělesy na zarjadowanja we wukraju delegować. Tak pósćele Domowina hudźbnu skupinu JANKAHANKA na 111. jubilej wobstaća Towarstwa přećelow Serbow 3. měrca w Praze. Zelenu swěcu da tohorunja Serbskemu młodźinskemu towarstwu Pawk, zo by so na nalětnim seminarje MENS kónc měrca w pólskim Opolu wobdźěliło.
Njeznatemu awtorej so wěnowali
Jurij Winger (1872–1918) je w Serbach skerje njeznaty. Tak wěnowaše jemu Towarstwo přećelow Smolerjec kniharnje zańdźeny štwórtk wosebity literarny wječork w kniharni Ludoweho nakładnistwa Domowina.
Budyšin (SN/MiR). „Jurij Winger je krasnu serbšćinu wužiwał“, wuzběhny předsyda towarstwa dr. Franc Šěn nimale na kóncu wosebiteho wječorka. „To pak njeje dźensa hižo wulkej ličbje ludźi znate.“ Dr. Šěn bě so nadrobnje z pismowstwom serbskeho fararja, spisowaćela a přełožowarja zaběrał a za jeho spisami slědźił, štož njebě runjewon lochko. Wšako bě Jurij Winger swoje teksty často jeno z „JW“ signował abo scyła nic. Tak njehodźa so husto jasnje jako Wingerowe identifikować. Skerje namakaja so jeho teksty po analyzy wašnja pisanja. Tež listowanje z rowjenkami Jurja Wingera to a tamne přeradźa.
Nowy předsyda chce kniharnju ideelnje spěchować
Budyšin (SN/MiR). Towarstwo přećelow Smolerjec kniharnje ma nowe předsydstwo. Na swojej wčerawšej čłonskej a wólbnej zhromadźiznje wuzwoli 17 přitomnych z cyłkownje 57 čłonow towarstwa dr. Franca Šěna za swojeho noweho předsydu. Hač do swojeje smjerće loni w septembru bě Kito Lorenc předsyda towarstwa. Z nim mnohe lěta tam jara wusko hromadźe dźěłała bě dr. Ruth Thiemannowa. Po smjerći jeje bratra dr. Franka Stübnera w aprylu minjeneho lěta dowěri wona Francej Šěnej towarstwo jako komisariski naslědnik Lorenca nawjedować.
