Statnik hižo prěnje rozmołwy ze zapósłancami wjedł
Kubłanje w župje nadal wažna tema
Budyšin (SN). Čłonojo předsydstwa župy „Jan Arnošt Smoler“ Budyšin zeńdźechu so wčera na měsačne wuradźowanje. W zwisku z přihotami na hłownu zhromadźiznu Domowiny wujasnichu w rozmołwje z kubłanskej referentku Katrin Suchec-Dźisławkowej, zo je wutworjenje serbskich rjadownjow w nowych dźěłowych směrnicach Domowiny zakótwjene. To zdźěli regionalna rěčnica Katja Liznarjec. Kito Hendrich, čłon župneho předsydstwa, připowědźi, zo zeńdźe so 6. apryla iniciatiwna skupina wjesnjanow w domje Měrćina Nowaka w Njechornju. Zhromadnje z čłonami župneho předsydstwa chcedźa dźeń wotewrjenych duri přihotować. Tutón so 17. meje wječor wot 18 hodź. wotměje.
W juniju woswjeća w Malešecach 800 lět prěnjeho naspomnjenja. Serbske poskitki přihotuje Domowinska skupina, regionalna rěčnica ju podpěruje. Na žurli hosćenca „K wódnemu mužej“ budźe 15. junija wustajeńca wo towarstwowym žiwjenju we wsy. Dale chcedźa z hosćimi jejka wóskować. W swjedźenskim tydźenju chcedźa chóry z regiona hromadźe spěwać, swjedźenski ćah budźe 22. junija.
Rekord wopytowarjow na přijeću w Serbskim seminarje
Praha (SN). Na lětušim nalětnim přijeću kontaktneho běrowa Swobodneho stata Sakskeje w Praze je so 135 wopytowarjow wobdźěliło. Kaž zarjadowarjo zdźělichu, bě to rekord wopytowarjow. Zabawny wječor w historiskim Łužiskim seminarje měješe čěsko-serbsku temu.
W swojej narěči pokaza zastupowacy kulturny minister Čěskeje David Kašpar na hłuboku zwjazanosć mjez Čěskej a Sakskej. „Kulturne partnerstwo zwjaza ludźi geografisce, ale předewšěm jich daloko sahace kulturelne herbstwo skrući.“ Nawodnica wobłuka kultura a turizm w Sakskim statnym ministerstwje za wědomosć, kulturu a turizm Franziska Brechowa wuspěšne zhromadne dźěło na polu turizma wuzběhny, kotrež ma so lětsa dale wjesć.
Kandidaća za zwjazkowe předsydstwo so předstajeja (2)
Na hłownej zhromadźiznje Domowiny spočatk apryla wola delegaća nowu zestawu gremija
Diana Wowčerjowa
staroba: 50 lět
powołanje: wučerka, nawodnica Wyšeje šule „Dr. Marja Grólmusec“ Radwor
towarstwo: župa „Michał Hórnik“ Kamjenc
Kak dołho sće hižo čłonka zwjazkoweho předsydstwa?
Sym čłonka z lěta 2017.
W kotrych druhich towarstwach/zjednoćenstwach sće aktiwna?
Sym županka Kamjenskeje župy, čłonka NuPraKo, chóra „Meja“, čłonka předsydstwa Serbskeho šulskeho towarstwa a čłonka přirady Ludoweho nakładnistwa Domowina
Čehodla chceće so w Zwjazkowym předsydstwje Domowiny angažować?
Dźěło mi njesměrnje wulke wjeselo čini. Móžu wjele z toho wuzbytkować: wědu, nazhonjenja, zaznawanja a tež kontakty, kotrež mi zaso na dźěle, w župje, w SŠT a w druhich zjednoćenstwach a towarstwach dale pomhaja. Nimo toho wobradźa mi wulke wjeselo, so z druhimi rozmołwjeć a wuměnjeć, nic naposledk jich informować a motiwować za skutkowanje w serbskich gremijach, towarstwach a zjednoćenstwach na dobro Serbow.
Što su po wašim měnjenju najwažniše temy serbskeho ludu?
Janhoefer dale za Serbow aktiwny
„Mi je so dźěło we workshopach spodobało. A mi je so lubiło, zo je zwjazkowe předsydstwo po cyłej Łužicy pućowało.“ To praješe Wylem Janhoefer na kóncu swojeho – po dwanaće lětach – poslednjeho posedźenja jako čłon zwjazkoweho předsydstwa zašły pjatk w Chrósćicach. Nan małeje holcy chce wjac chwile za swoju swójbu měć. Tohodla njebudźe hižo na hłownej zhromadźiznje za mandat w nawjedowacym gremiju třěšneho zwjazka kandidować. Njedawno wšak bu znowa do předsydstwa župy Delnja Łužica woleny, tuž wostanje w narodnej organizaciji dale prezentny. Jara aktiwny je nimo toho jako čestnohamtski zamołwity za serbske naležnosće w hamće Bórkowach, kotremuž šěsć gmejnow přisłuša. Janhoefer bydli w najwjetšej z nich, w Bórkowach, pochadźa pak z Prjawoza.
Prezidij Domowiny so schadźował
Wo wšelake delegowanja za zastupjerjow Serbow na zarjadowanja w tu- a wukraju staraše so prezidij Domowiny. Nimo toho su čłonojo gremija hižo hłownu zhromadźiznu přihotowali.
Budyšin (SN). Na swojim wčerawšim posedźenju je prezidij Domowiny zastupjerja Serbskeho młodźinskeho towarstwa Pawk na jutrowny seminar młodźiny domoródnych narodnych mjeńšin Europy MENS pod hesłom „widźomnosć płaći / visibility matters“ delegował. Tutón wotměje so wot 11. do 18. apryla w pólskim Opole. Seminar organizuje tamniši młodźinski zwjazk němskeje mjeńšiny.
Dale powoła prezidij projektnu managerku Domowiny Melanie Hajnkec jako zastupjerku Serbow do zwjazka „Partnerstwa za demokratiju“ města Budyšin w dobje 2025-2029. Jako zastupowacu čłonku postajichu čłonojo prezidija hłownu jednaćelku třěšneho zwjazka Judit Šołćinu. Zaměry zwjazka su mjez druhim skrućenje towaršnostneho angažementa: spěchowanje demokratiskeje, tolerantneje a wšelakoreje zhromadnosće kaž tež prewencija přećiwo radikalizaciji a ekstremizmej.
Marja Michałkowa so dale angažuje
„Wutrobny dźak za derje přihotowane posedźenja. Sym rady w tutym gremiju dźěłała.“ Pjatk je so Marja Michałkowa po dwěmaj wólbnymaj periodomaj ze zwjazkowym předsydstwom Domowiny rozžohnowała. Chwalobnje wuzběhny 75lětna „zhromadne dźěło Serbow wšelakich generacijow“ w gremiju. Hižo 2023 je sakske předsydstwo towarstwa „donum vitae“ wotedała, kiž bě wot lěta 1999 wukonjała. Byrnjež něhdyša wjelelětna serbska zapósłanča CDU w zwjazkowym sejmje (1990, 1991-1994, 2002-2017) dosć rjaneje zaběry z wnučkami a swójbu měła, so wona dale čestnohamtsce angažuje. Jako předsydka Křesćansko-socialneho kubłanskeho skutka (CSB) leži jej dalewuwiwanje strukturow, nic naposledk za pěstowarnje, na wutrobje. Tola tež kruhej přećelow klóštra Marijiny doł połna elana předsydari. Tak zběra tuchwilu pjenjezy za nowe pišćele. Nowa administratorka, kotraž klóšter nachwilu nawjeduje, so jara za Serbow zajimuje a tež na jutrownych wikach w Budyskim Serbskim domje poby.
Joachim Glücklich kandidat župy
Župa „Handrij Zejler“ Wojerecy je jako kandidata za zwjazkowe předsydstwo Domowiny wučerja na wuměnku Joachima Glücklicha namjetowała. To je župne předsydstwo wčera wobzamknyło.
Wojerecy (SN/mb). Tež sydom delegatow za hłownu zhromadźiznu 5. apryla w Budyšinje, kiž ma wjednistwo třěšneho zwjazka znowa wolić, su wčera postajili. To je županka Gabriela Linakowa našemu wječornikej wobkrućiła. Wona ma tuchwilu wosebje přihoty na saksku krajnu domchowanku na starosći, kotraž so wot 12. do 14. septembra we Wojerecach wotměje. Přichodnu póndźelu w 17 hodź. přeprosy Linakowa na druhe zeńdźenje ze serbskimi towarstwami, kotrež chcedźa so tam wobdźělić. Serbja budu na wšěch třoch jewišćach – při Łužiskej hali, před Léona Foucaultowym gymnazijom a na torhošću w starym měsće – wustupować. Za swjedźenski ćah planuja serbski blok ze wšelakimi wobrazami, a na zelenej mili budu serbske informaciske stejnišća, na přikład župy a syće za serbsku rěč a regionalnu identitu ZARI.
Hłowna zhromadźizna a ekstremizm
Budyšin (SN/bn). Wustawkam Domowiny wotpowědujo wuradźowachu wčera předsyda třěšneho zwjazka a županki a županojo kaž tež předsydźa a předsydki čłonskich towarstwow a zwjazkow w Budyskim Serbskim domje. Ćežišćo bě hłowna a wólbna zhromadźizna, kotraž wotměje so 5. apryla w Budyšinje. Mjez druhim rozłožištaj předsyda Domowina Dawid Statnik a jednaćelka třěšneho zwjazka Judit Šołćina přiměrjenja dźěłowych směrnicow, kotrež maja so na njej schwalić, wudospołnjenja wustawkow, kotrež buchu mjeztym prawnisce pruwowane, a procedere wólbow. Tak ma so kruće do wustawkow zapisać, zo přisteji kóždemu čłonskemu towarstwu znajmjeńša jedne městno w zwjazkowym předsydstwje Domowiny. Dalše sobustawojo tohole gremija wobsadźuja so proporcionalnje po ličbje čłonow jednotliwych zwjazkow/župow. Drje najwažniša změna nastupa tak mjenowanu klawslu ekstremizma.
W Delnjej Łužicy sylna młodźina
Domowinska župa Delnja Łužica je minjeny pjatk swoje nowe župne předsydstwo wuzwoliła, kotrež ma dźěło župy přichodne štyri lěta nawjedować. Na zhromadźiznje wobdźělichu so 50 delegatow a dalši hosćo.
Žylow (HA/SN). Cyłkownje 13 čłonow su na 33. hłownej zhromadźiznje do předsydstwa wuzwolili. Mjez nimi je sydom nowych a tójšto młodych čłonow. Za funkciju přichodneho župana abo županki pak so nichtó přizjewił njeje.
Wotpowědnje rozprawje župneho předsydstwa je ličba čłonow, skupinow a towarstwow loni dale přiběrała. Tak maja cyłkownje nimale 2 800 čłonow w 31 Domowinskich skupinach a 23 towarstwach a zjednoćenstwach. Wosebje horda je župa na to, zo ma nětko na wšěch 600 čłonow w 12 młodźinskich Domowinskich skupinach. Z tym je župa Delnja Łužica mjez pjeć župami we Łužicy dale najwjetša.
