Hłowny jednaćel Domowiny Bjarnat Cyž bu dźensa na wuměnk rozžohnowany. Tak nachila so „doba“ w stawiznach třěšneho zwjazka. Z Bjarnatom Cyžom woteńdźe njesprócniwy dźěłaćer na dobro našeho ludu, kotryž je popřewrótowu serbsku politiku bytostnje sobu postajał. W njeměrnych a wichorojtych časach na kóncu NDR přewza wón zastojnstwo předsydy Domowiny. Jeho cil: reformy a womłodźenje, třěšny zwjazk pak njerozbić. To je docpěł. Z krutym rjapom a njepowalnje je Cyž Domowinu přez tele ćežke časy wjedł, kotraž steji dźensa kruta a njepowalna. Dźakowano mjez druhim Cyžej dóstawamy dźensa statne spěchowanje. Wón je tole z aktowej noticu w zjednoćenskim zrěčenju sobu nastorčił. A nětko? Kaž rjekny Serbskim Nowinam, je Domowina za přichodne lěta přihotowana a wón budźe jej dale z radu poboku. Přiwšěm pak wostanje wulka dźěra. Janek Wowčer

Pod hesłom „Kak dale ze ZSW?“ planuje Zwjazk serbskich wuměłcow přewjesć w nowym lěće forum z čłonami towarstwa kaž tež ze wšitkimi za wuměłstwo a kulturne dźěło so zajimowacymi, předewšěm młodymi ludźimi.

Budyšin (AW/SN). Předsydstwo Zwjazka serbskich wuměłcow je wčera w Haslowje wo přichodźe swojeho towarstwa wuradźowało. Dotalne předsydstwo pod nawodom Istvána Kobjele, kotrež ma po rozsudźe hłowneje zhromadźizny z nowembra w Haslowje hač do kónca apryla 2017 dale skutkować, rozjimowaše předewšěm prašenje, kak móhli młodych kandidatow za nowe předsydstwo cyłka zdobyć. Tohodla bě tež Budyšan Bosćan Nawka do wuradźowanja zapřijaty. Wón bě so na zašłej hłownej zhromadźiznje zwólniwy wuprajił w nowym předsyd­stwje sobu dźěłać.

Přitomni so tuž wčera dojednachu, bórze po Nowym lěće w Budyšinje přewjesć z čłonami ZSW a ze wšitkimi zajimcami za wuměłstwo a kulturne dźěło, předewšěm młodymi ludźimi, forum pod hesłom „Kak dale ze ZSW?“. Chcedźa nowe ideje za dalše spomóžne skutkowanje wuspěšneho serbskeho towarstwa zezběrać a zdobom młodych Serbow za sobudźěło zahorić.

Zwjazk serbskich wuměłcow chce w nowym lěće přewjesć forum na temu: Kak dale ze ZSW? Hižo na zašłej hłownej zhromadźiznje je towarstwo tole tematizowało. Tam dyrbjach nazhonić, zo je tež we wuspěšnych a aktiwnych ćělesach ćežko přede­wšěm młodych ludźi za čestnohamtske skutkowanje zdobyć. Znaju situaciju skerje ze spěwnych cyłkow, kaž z muskeho chóra Delany, hdźež starosćimy so runje tak wo dorost a dalewobstaće. Dyrbimy pak přiznać, zo jedna so wo powšitkowny towaršnostny zjaw, kotremuž mamy znapřećiwić. Mam tuž za prawe a spomóžne, zo so ZSW na zjawnosć wobroća. Hač změje na te wašnje wočakowany wuspěch, njemóže wězo nichtó rjec. Ale, zo budu na forumje zjawnje wo naležnosći rěčeć a wupuć pytać, njemóže hižo nichtó prěć. Rěčeć měli tohorunja dalše cyłki ze sobu, mjez druhim Domowina a Serbski sejm. To móže jenož pomhać! Janek Wowčer

Na kónclětnym zarjadowanju Domowinskeje župy „Jan Arnošt Smoler“ w Budyšinje su přitomni zastupjerjo Domowinskich skupin a towarstwow na lětušu dźěławosć zhladowali.

Budyšin (SN/at). Wo skutkowanje Domowiny w Budyskej župje staraja so zwjetša zasłužbni skupinarjo, kotrymž je narodny angažement po tymle puću naležnosć wutroby. Tónle zaćišć je so minjeny štwórtk na žurli Serbskeho domu znowa wobkrućił, hdźež stej županka Jana Pětrowa a regionalna rěčnica Domowiny za župny teritorij Sonja Hrjehorjowa wjerški Smolerjoweho lěta kaž tež hłowne mysle nastupajo klětuše zarjadowanja předstajiłoj. Bohužel njeběchu wšitke ćělesa pod župnej třěchu zastupjene byli.

Jako kruty stołp wopokaza so přede­wzaće ze šulerjemi. 26 B-serbšćinarjow ze zakładnych šulow Bošecy, Bart, Wulka Dubrawa a Hodźij wobdźěli so na pro­jekće k 100. posmjertnym narodninam Jurja Brězana w Hornim Hajnku. Za wubědźowanje Krabat 2.0 pak běchu jeno dźěći­ Wulkodubrawskeje šule swoje dźěła zapodali.