Budyšin (SN/at). Hdyž płaći z ludźimi přepjelnjena žurla jako měritko připó­znaća za přez lětdźesatki zdokonjane dźěło jako wobrazowy žurnalist a swědomity chronikar, potom sej Budyšenjo Rolfa Dvoraceka jara waža. Sobotu bu jemu wěnowana wosebita přehladka „Rolf Dvoracek – Pytać za perfektnym wokomikom – Budyšin w fotografijach ze šěsć lětdźesatkow“ w Budyskim muzeju swjatočnje wotewrjena. Muzejowy personal dyrbješe bohužel tójšto zajimcam hnydomne wobhladanje ekspozicije poručić – rumnosć wotewrjenskeho zarjadowanja bě hižo poł hodźiny do zahajenja dospołnje wobsadźena.

Wustajeńca je poprawom gratulacija muzeja k lońšim wosomdźesaćinam Rolfa Dvoraceka, a to jenož něšto dnjow do jeho 81. narodnin. Wobdarjeny pak je Budyski muzej. Přetož digitalne žórła tam prezentowanych 492 wobrazow wobohaćeja nětko fotografowy skład muzeja. Rolf Dvoracek bě je přewostajił, za čož so jemu nawoda dr. Jürgen Vollbrecht wutrobnje dźakowaše.