Cliff Stevens Band, kanadiska koryfeja blues rocka, je tuchwilu z ...
Handrij Lubjenski
Wo knihach a kniharni (11.04.25)
Jutrownu póndźelu woswjeći nestor serbskich basnikow, lawreat Myta Ćišinskeho Benedikt Dyrlich, swoje pjećasydomdźesaćiny. Ludowe nakładnistwo Domowina je składnostnje jubileja wudało tři nowinki wjelestronskeho awtora: słuchoknihu „Cuza hospoda“ z powědkami, čitanymi wot awtora sameho, zwjazk z esejemi a přizjewjenjemi k słowu „Nachklänge – Dozynki“ a dalšu němsko-serbsku zběrku basnjow a lyriskeje prozy „Sicheltage – Serpowe dny“. Poslednjej wudaći předstaješe LND na lětušich Lipšćanskich knižnych wikach swojim wopytowarjam.
Zběrka „Sicheltage – Serpowe dny“ změje 24. apryla w Smolerjec kniharni knižnu premjeru, a to wuwzaćnje hižo we 18 hodź.
Podpěruje zjawnostne dźěło LND
Dušan Šołta podpěruje hižo měsacaj team Ludoweho nakładnistwa Domowina (LND) jako manager za marketing a zjawnostne dźěło. 43lětny Budyšan ma hłownje medijowe dźěło a nakładnistwowe publikacije na starosći. Nimo toho spjelnja nadawki za knižny wobłuk. Aktualnje přinošuje z kreatiwnymi idejemi k zhotowjenju noweje knihi składnostnje 800. jubileja Chróšćanskeje wosady a přewodźa proces wozjewjenja.
Dušan je serbšćinu, matematiku a chemiju studował a njeskutkuje powołansce jenož w Budyšinje, ale tež w Lipsku a Drježdźanach. Jako swobodny docent na wšelakich uniwersitach podawa kursy wo redukowanju stresa a kedźbnosći. Z tym podpěruje wón docentow, wučerjow a studowacych, wučo jich, kak móža wědomišo a spušćomnišo ze stresom wobchadźeć. Zo by so wobstajnje dale kubłał, bě Dušan časćišo we wukraju po puću. Na přikład je so na kursach w Francoskej, Indiskej, Čěskej, Pólskej kaž tež w Nepalu wobdźělił a tam swoje znajomosće rozšerił.
Šumjacy swjedźeń z rekordom
Lětuše Lipšćanske knižne wiki přiwabichu znowa rekordnu ličbu wopytowarjow. Na štyrjoch dnjach zličichu dohromady 296 000 hosći, něhdźe 13 000 wjace hač loni. Dnjowe zastupne lisćiki za sobotu běchu hižo štwórtk wupředate. Pozitiwny facit Martina Buhla-Wagnera tuž njepřekwapja, kiž na hesło zarjadowanja „Worte bewegen Welten“ nawjazujo zjima: „Słowa pohibuja swěty – a wone pohibuja ludźi! Wiki běchu lětsa w zmysle słowa publikum přićahowacy magnet. Wjeselimy so jara nad hoberskim wothłosom a zahoritosću runje młodych ludźi za čitanje a towaršnostne temy. 2025 budźemy sej definitiwnje jako šumjacy swjedźeń w pomjatku wobchować.“ Podobnje reziměrowaše předstejićerka Bursoweho towarstwa němskeho knihikupstwa Karin Schmidt-Friderichs: „Wiki su wužadanjam w branši a towaršnosći z čitanskej zahoritosću a z wjeselom nad debatu wotpowědowali. W halach so ludźo mjerwjachu, knižni fanojo kóždeje staroby swjećachu literaturu a wjelorakosć. Knižna a kreatiwna branša nastorči wažne towaršnostne a politiske debaty a podkładuje je z faktami.
Serbskej utopiji a historiske paski
Dźěła w „pupku swětnišća“
Socialni asistenća su na serbskich šulach přewšo witani. Wšako su wučerjam sylna podpěra. Jedna z nich je Lucija Bukowa z Pěskec. 27lětna je na katolskej wyšej šuli w Berlinje socialne dźěło studowała po tym, zo je na Budyskim Serbskim gymnaziju maturowała. „Moja mać je mi rjekła, zo je dźěło na socialnym polu přewšo dźakowne“, tak wona powěda, „a sym spěšnje zwěsćiła, zo mam wulke wjeselo při dźěle ze staršimi ludźimi.“ Wona je wšelake praktika na socialnym polu wukonjała a w Połčničanskej Hrodowej klinice w socialnej słužbje skutkowała. Loni pak je rodźenu Wěteńčanku poskitk z Chrósćic wabił. „Mam nětko swoje dźěłowe městno njedaloko ródneje wsy. Tam sej na staršiskim statoku z mandźelskim domske twarimoj.“ To pak njeje jenička přičina za jeje nawrót. „Mi so spodoba, zo ma na Chróšćanskej zakładnej šuli ,Jurij Chěžka‘ serbska rěč wosebje wulku hódnotu. Kóždy dźeń čaka z nowymi nadawkami, štož so mi jara spodoba. Wučerjo runje tak kaž šulerjo mi dowěrjeja a nimam ženje wostudu.“
Wulki zajim za zhladowanje na kónc wójny
Budyšin (SN/bn). We wobłuku rjadu referatow Archiwoweho zwjazka Budyšin přednošowaše domizniski slědźer Eberhard Berndt wčera wo drje najzahubnišim stawizniskim kapitlu Hornjeje Łužicy. Pod nadpismom „Wojowanja wo Wóspork a Budyšin w aprylu 1945 – wróćohladanje po 80 lětach“ wobswětli wón poslednju fazu Druheje swětoweje wójny, zapřijawši najnowše dopóznaća na zakładźe žórłow, kotrež po jeho słowach dawno dowuslědźene njejsu. Zajim na zarjadowanju bě tak wulki, zo njewotmě so w sydarni archiwa, ale na žurli Kamjentneho domu. Přiwšěm městna njedosahachu, tójšto hosći čakaše podarmo na snano tola hišće swobodne sydadło. Łoskoćiweje tematiki dla pokaza policija prewentiwnu prezencu.
Festiwal z wosebitej chłóšćenku
Berlin/Zhorjelc (AK/BŠe/SN). We wobłuku Łužiskeho festiwala wuměłče a wuměłcy ze wšeho swěta region zaso na wulke jewišćo změnja. Festiwal so lětsa wot 24. awgusta do 14. septembra wotměje. Nimo rejow, dźiwadła a koncertow poskića organizatorojo tež sceniske čitanja. Mnohe zarjadowanja so na njewšědnych hrajnišćach wotměja. Za festiwal su awtorojo tež wosebite inscenacije nadźěłali. „Njeńdźe jenož wo to, region jako stejnišćo za wobnowjomne energije powabić, ale kónčina dyrbi tohorunja wutrobu měć a dušu narěčeć“, wuzběhny sakski ministerski prezident Michael Kretschmer (CDU) na wčerawšim předstajenju programa Łužiskeho festiwala w Berlinskim zastupnistwje Sakskeje.
„Poselstwo je jasne“, wozjewi nawodnica Braniborskeje statneje kenclije Kathrin Schneider (SPD). „Łužica so přeměnja. Wona je zajimawa, swětej wotewrjena a skići wjele překwapjenkow.“ Předań tiketow za něhdźe 30 zarjadowanjow festiwala w južnej Braniborskej a wuchodnej Sakskej je so zahajiła.
