W lěće 2006 rozsudźichu so štyrjo instrumentalisća Budyskeho Serbskeho ludoweho ansambla, předstajić sekwencu „Stabat mater dolorosa“ (Stała­ mać je bolosćiwa) italskeho mištra­ baroka­ Giovannija Battisty Pergolesija­ – a to wulki pjatk w Smochčanskim Domje­ biskopa Bena. Tak běchu smyčkowy kwartet Chordophone (Zynk trunow)­ załožili. Z prěnjeho wustupa­ bu tradicija, zo wotměwa so kóždolětnje wulki pjatk w Smochćicach koncert duchowneje hudźby.

Smochćicy (CRM/SN). Mjeztym před­staja so „Stabat mater“ na samsnym městnje a w samsnym času z pjera wšelakich komponistow, kotřiž zdobychu sej z hudźbnjenja 20 štučkow wopřijaceho wobspěwanja bolosćow Jězusoweje maćerje Marije pod křižom swojeho syna wulku a w mnohich padach samo swětowu sławu. Za Budyski smyčkowy kwartet – Bettina Witke (1. husle), Matthias Reichel (2. husle), Arthur Malinowski (wiola) a Helfried Knopsmeier (violoncello), je koncert dnjej do jutrow runje tak kaž mnohim zajimcam, mjez kotrymiž je tohorunja­ dosć nahladny rjad Serbow, kruty­ termin.