Budyšin stanje so pjeć dnjow a nocow ze sakskej stolicu dźiwadła, wšako wabi Němsko-Serbske ludowe dźiwadło z 33 zarjadowanjemi do swojeju domow. 9. sakski dźiwadłowy festiwal wot 18. do 22. meje ma po słowach indendanta NSLDź Lutza Hillmanna najhusćiši program měć a ma so stać z woprawdźitym magnetom za publikum.

Drježdźany/Budyšin. Wjacore zarjadowanja su hižo tak požadane, zo rozmysluja wo třećim poskitku, na přikład za „Chroniki kenguruwa“ Wintersteinoweho dźiwadła Annaberg-Buchholz, rjekny Hillmann zastupjerjam krajneje nowinarskeje konferency minjeny pjatk w Drježdźanskim statnym činohrajnym domje. Z wjele lubosću předstajichu hosćićeljo program zetkanja, nětko na biennalu wozjewjeneho. Tasso Schille hraješe Gershwina, Ralph Hensel a Lutz Hillmann staj Předhru Goethy na dźiwadle přednjesłoj. Dalša překwapjenka so přizjewi: Ministerski prezident Stanisław Tilich­ (CDU) wobdźěli so na zahajenju, hdźež hraja Budyšenjo swoju němskorěčnu inscenaciju Jurja Kochoweho krucha­ „Mój wuměrjeny kraj“.