Worklecy (SN/JaW). Smjerdźečanska rejwanska skupina nima starosće nastupajo dorost. Tole potwjerdźi wčera čłonka folklorneje skupiny Sprjewjan Marija Šimanowa w připowědźi na nazymskim koncerće wobeju ćělesow we Worklecach. „Smjerdźečanska skupina ma tuchwilu wjac hač 90 čłonow. A mjeztym tež hižo dźěći w předšulskej starobje rejuja. Tak derje sej mnohe kulturne cyłki nimaja“, spěwarka Sprjewjana podšmórny. Zo nimaja dorostowe starosće, pokazachu Smjerdźečenjo tež sami. Sčasami bě na rejwanskej płoninje na žurli Worklečanskeho hosćenca „Ke kupowemu hatej“ chětro wusko. To pak njewadźeše, wšako je snano runje tole akteram spodobanje wobradźiło, štož so tež na publikum přenjese. Zapal a wjeselo nad rejwanjom knježeštej cyłe popołdnjo na žurli, za čož so publikum kaž tež rejwarjo na swoje wašnje šefchoreografej Dieterej Wendischej dźakowachu.