Budyšin (SN/BŠe). Tuchwilu bydli w Budyšinje 81 ćěkancow w bydlenjach, jědnaće w Sprjewinym hotelu a 238 w Greenparku. Zo by so integracija ćěkancow poradźiła, na tym dźěła wosebita syć w Budyšinje, kotraž so we wěstych­ wotstawkach zetkawa. Před třomi lětami, jako sprjewine město prěnich ćěkancow přiwza, běchu so akterojo – sakska policija, chorobne kasy, dźěłowa agentura, nawodźa pěstowarnjow, šulow, a hortow, zastupjerjo cyrkwjow a Budyskich zarjadow kaž tež čestnohamtscy pomocnicy – prěni raz zešli.

Póndźelu wotměchu mjeztym 26. dźěłowu rozmołwu. A kaž so wujewi, wobsteja dale ćeže ćěkancow integrować. Zastupjerce pěstowarnje w Budyskej Strowotnej studni rozprawještej, zo maja ćeže, tołmačerja nańć, kiž měł na přikład wuwićowe rozmołwy mjez staršimi a kubłarku přełožić. Rěčny problem so we wšelakich žiwjenskich wobłukach stajnje zaso pokazuje. W šulach njemóža dźěći ćěkancow wučbu sćěhować, dokelž njeznaja fachowe wurazy, na přikład w biologiji. Šulscy nawodźa tuž namjetuja pruwowanja za ćěkancow w někajkej formje změnić.