Předsydka rady Załožby za serbski lud Susann Šenkec hižo wjacore lěta we wobłuku Federalistiskeje unije europskich narodnych mjeńšin (FUEN) na europskej politiskej runinje sobu skutkuje. Wona je mjez druhim wobydlersku iniciatiwu FUEN Minority SafePack sobu załožiła. Serbske Nowiny su so z njej wo iniciatiwje rozmołwjeli.

Sće iniciatiwu hižo podpisała?

S. Šenkec: Wězo, sym dźě ze swojim skutkowanjom w FUEN iniciatiwu takrjec sobu zmóžniła. Jako třeća sym online podpisała, wědźo, kelko podpismow je hač k milionej hišće trěbnych.

Serbja w Němskej maja porno druhim mjeńšinam w Europje hižo dosć dobry mjeńšinowy škit. Čehodla měli woni wobydlersku iniciatiwu FUEN podpěrać?