Załožbowa rada etat za lěto 2018 wobzamknyła

Budyšin (SN/CoR). „Wjeselimy so, zo maja serbske institucije za lěto 2018 wěstotu nastupajo planowanje a zo móžemy tarifowe zwyšenja bjez skrótšenja zaručić“, praji direktor Załožby za serbski lud Jan Budar po wčerawšim nazymskim posedźenju jeje rady w Budyskim Serbskim domje. Klětuši etat wučinja – ručež budu hospodarske plany pjenjezydawarjow płaćiwe – cyłkownje 18,725 milionow eurow. Přidatnje trěbne pjenjezy za tarifowe zwyšenja – to je hač do lěta 2020 dohromady 186 000 eurow – zalutuja přez to, zo 60 procentow wot njewužiwanych personalnych a wěcownych wudawkow institucijam njepřewostaja a inwesticije – wothladajo wot zaplanowanych 151 000 eurow za wobnowjenje Choćebuskeho Serbskeho muzeja – najprjedy přestorča.