Krajny sejm Schleswigsko-Holsteinskeje je lětsa wobzamknył, podpěrać wobydlersku iniciatiwu Federalistiskeje unije europskich narodnych mjeńšin (FUEN) Minority SafePack. Zdobom wupraja so parlament zwjazkoweho kraja, w kotrymž sydla z Frizami, Danami w Němskej a Sintami a Romami hnydom tři w Němskej připóznate narodne mjeńšiny, za lěpši škit mjeńšin. Ministerski prezident Daniel Günther (CDU) wobydlerjow tehdy namołwi, so na podpismowej akciji FUEN wobdźělić. Serbske Nowiny su z nim wo iniciatiwje rěčeli.
Sće iniciatiwu hižo podpisał?
D. Günther: Haj. Tež krajne knježerstwo Schleswigsko-Holsteinskeje Minority SafePack podpěruje a je w juliju na swojej internetnej stronje namołwu wozjewiło ju podpisać. Nimo toho smy na našej internetnej stronje zarjadowali wotkaz k online-portalej iniciatiwy. Štóž so za mjeńšinowu politiku w našim kraju zajimuje, toho tež wo akciji FUEN awtomatisce informujemy.
Serbja w Němskej maja porno druhim mjeńšinam w Europje hižo dosć dobry mjeńšinowy škit. Čehodla měli woni wobydlersku iniciatiwu FUEN podpěrać?