CSU je funkcionara Zwjazka wuhnatych za noweho społnomócnjeneho za prašenja wusydlencow a narodnych mjeńšin namjetowała. Mjeńšinowa rada to tuchwilu komentować nochce.
Berlin/Budyšin (SN/at). Štó budźe nowy społnomócnjeny zwjazkoweho knježerstwa za wusydlencow a narodne mjeńšiny? Tele prašenje rozjimachu zastupjerjo Danow, Frizow, Serbow kaž tež Sintow a Romow na posedźenju mjeńšinoweje rady kónc tydźenja w Berlinje.
W nowym zwjazkowym knježerstwje přewozmje CSU nutřkowny ressort. A kaž strona minjenu póndźelu w Mnichowje zdźěli, je Bernd Fabritius jako naslědnik Hartmuta Koschyka w zastojnstwje społnomócnjeneho za prašenja wusydlencow předwidźany. W padźe powołanja by Fabritius, kiž je aktualny předsyda Zwjazka wuhnatych (BdV), prěnja wosoba w tej funkciji był, kiž zwjazkowemu sejmje njepřisłuša. Hačrunjež je pola CSU jeničce rěč wo „społnomócnjenym za prašenja wusydlencow“, wuchadźeja wobkedźbowarjo z toho, zo słuša zamołwitosć za naležnosće awtochtonych mjeńšin w Němskej dale k nadawkam społnomócnjeneho. BdV to z powěsću potwjerdźi.