Smjerdźaca (aha/SN). Dobry wothłós žněješe minjeny štwórtk dalekubłanske zarjadowanje za kubłarki z dźěćacych dnjowych přebywanišćow w nošerstwje Němskeho čerwjeneho křiža (DRK) a Dźěłaćerskeho dobroćelstwa (AWO), kotrež je Serbske kubłanske srjedźišćo LIPA přewjedło. Zaměr bě, přewažnje němskim kubłarkam posrědkować trěbne znajomosće kołowokoło serbskich temow.
Młoda serbska wučerka Michaela Gedikowa předstaji spočatnje serbske jutrowne nałožki, při čimž skedźbni na křižerske procesiony w katolskich Serbach a na wosebite jutrowne tradicije w Slepjanskej kónčinje. Dale wujasni wona stawizniski pozadk nałožka, zo móža so dźěći zeleny štwórtk na dar wot kmótrow a kmótow wjeselić. W praktiskim dźělu při debjenju jutrownych jejkow pokaza Michaela Gedikowa na edicije Ludoweho nakładnistwa Domowina wot Jěwy-Marje Čornakec, w kotrychž je jutrowna tematika rozjimana. Dale překwapi wona z nahladnej přehladku swójsce debjenych jejkow. Techniku wóskowanja a bosěrowanja bě sej wona hižo jako dźěćo wot swojeje wowki Hany Koklineje w Róžeńće přiswojiła.