Krajny sejm žada sej rehabilitaciju njesprawnje wobwinowaneju
Drježdźany/Stróža (SN/MkWj). Sakske statne knježerstwo dyrbi dweju něhdyšeju sobudźěłaćerjow statneho lěsnistwoweho zawoda zjawnje rehabilitować. To je krajny sejm wobzamknył. W dotal njesłyšanym padźe běchu zamołwići lěsnistwoweho zawoda a wobswětoweho ministerstwa sobudźěłaćerjomaj korupciju, wobohaćenje a njeswěru wumjetowali a jeju z powołanja wuhnali.
Před lětomaj bě so něhdyši předsyda biosferoweho rezerwata Hornjołužiska hola a haty (BROTH) Andreas Skomudek na peticiski wuběrk krajneho sejma z próstwu wo pomoc wobroćił. Lěsnistwowy zawod, wot lěta 2008 za jenički biosferowy rezerwat Sakskeje zamołwity, bě nawodnistwo rezerwata krótkodobnje wuměnił. Andreas Skomudek žada sej zhromadnje z 200 podpisarjemi dospołnu rehabilitaciju njesprawnje wobwinowaneju a ze zastojnstwa wuhnateju. „Sym jara hněwny. Tam běchu zasadne zmylki w personalnej politice. Sobudźěłaćerjo su wědomje łželi.“