Skandinawiska chórowa hudźba

Smochćicy. Chórowy koncert wosebiteho razu móžeće jutře, sobotu, 4. awgusta, w Smochčanskim Domje biskopa Bena dožiwić. Wjac hač 80 spěwarkow a spěwarjow z cyłeje Němskeje přebywa tam na 16. Smochčanskim hudźbnym tydźenju. Pod nawodom znateho politologi prof. Wernera J. Patzelta a Huberta Gößweina su woni zhromadnje zwučowali a sej skandinawiske chórowe twórby přiswojili, na přikład kruchi Edvarda Griega a Jeana Sibeliusa. Jutře w 19.30 hodź. je w tamnišej cyrkwi předstaja. Zastup je darmotny, zarjadowarjo pak proša wo šćedriwy dar.

Festiwal při měšćanskim haće

Kulow. Lubowarjo samočinjeneje hudźby přińdu kónc tydźenja w Kulowje na swoje kóšty. Wot dźensnišeho hač do njedźele wotměwa so tam 6. festiwal při měšćanskim haće. Mjez druhim hudźitej skupinje Rafiki a Acapulco. Wjeršk budźe sobotny koncert kapałow Gruppa Karl Marx Stadt a Milliarden. Event wuhotuja Zjednoćene młodźinske kluby Kulowa. Kombitiket za dźensa a jutře płaći 10,50 eurow, jenož za dźensa sydom a za sobotu wosom eurow. Lisćiki móžeće sej hišće při wječornej kasy kupić.